கொள்ளையரை விரட்டியடித்த தம்பதிக்கு சுதந்திர தின விழாவில் கவுரவம்| Dinamalar

பொது செய்தி

தமிழ்நாடு

கொள்ளையரை விரட்டியடித்த தம்பதிக்கு சுதந்திர தின விழாவில் கவுரவம்

Added : ஆக 14, 2019 | கருத்துகள் (3)
Share
கொள்ளையரை விரட்டியடித்த தம்பதிக்கு சுதந்திர தின விழாவில் கவுரவம்

திருநெல்வேலி: கொள்ளையரை, தைரியமாக விரட்டியடித்த, முதிய தம்பதியை, சுதந்திர தினத்தன்று, திருநெல்வேலி கலெக்டர், ஷில்பா கவுரவிக்க உள்ளார்.

திருநெல்வேலி மாவட்டம், கடையம், கல்யாணிபுரத்தைச் சேர்ந்தவர், சண்முகவேல், 78; ஓய்வுபெற்ற மில் தொழிலாளி.இவர், ஊருக்கு வெளியே, எலுமிச்சை தோட்டத்துடன் உள்ள வீட்டில், மனைவி, செந்தாமரையுடன் வசித்து வருகிறார். அவர்களது மகன்கள், மகள் வெளியூர்களில் வசிக்கின்றனர்.முதிய தம்பதி தனியே இருப்பதையறிந்த கொள்ளையர், ஆக.,11ம் தேதி இரவில், அவர்களது வீட்டுக்குள் நுழைந்து, தம்பதியை தாக்கி, கொள்ளையடிக்க முயற்சித்தனர். கணவனும், மனைவியையும், அங்கு இருந்த நாற்காலிகள், செருப்பு, வாளியை துாக்கி வீசி, கொள்ளையரை விரட்டியடித்தனர்.

அவர்கள் வீட்டில் இருந்த, 'சிசிடிவி' கேமராவில், அந்த காட்சிகள் பதிவாகி இருந்தன. அந்த, 'வீடியோ' காட்சி, சமூகவலைத்தளங்களில் பரவியது.நேற்று, எஸ்.பி., அருண் சக்திகுமார், கடையம் சென்று, தம்பதியை சந்தித்து, தைரியமாக கொள்ளையரை விரட்டியதற்கும், முன்னெச்சரிக்கையாக, 'சிசிடிவி' கேமரா பொருத்தியதற்கும் பாராட்டு தெரிவித்தார். 'விரைவில், கொள்ளையரை கைது செய்வோம்' என, உறுதியளித்தார்.

இந்நிலையில், நாளை, திருநெல்வேலியில் நடக்கும், சுதந்திர தினவிழாவில், கலெக்டர், ஷில்பா, அந்த தம்பதியின் வீரத்தை பாராட்டி, கவுரவிக்க உள்ளார். முதிய தம்பதியின் வீரத்தை பாராட்டி, கிரிக்கெட் வீரர், ஹர்பஜன்சிங், நடிகர், அமிதாப்பச்சன் உள்பட, பலர், 'டுவிட்டர்' என்ற சமூகவலைதளத்தில், பாராட்டி, கருத்து தெரிவித்துள்ளனர்.

Advertisement


We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X