நிலவின் சுற்று வட்டப்பாதையில் நுழைந்தது சந்திரயான் - 2| Dinamalar

பொது செய்தி

இந்தியா

நிலவின் சுற்று வட்டப்பாதையில் நுழைந்தது 'சந்திரயான் - 2'

Updated : ஆக 22, 2019 | Added : ஆக 20, 2019 | கருத்துகள் (10)

பெங்களூரு:'சந்திரயான் - 2' விண்கலம் நிலவின் சுற்று வட்டப்பாதைக்குள் நேற்று வெற்றி கரமாக செலுத்தப்பட்டது.







ஆந்திராவில் உள்ள ஸ்ரீஹரிகோட்டா விண்வெளி ஏவுதளத்திலிருந்து ஜூலை 22ல் புறப்பட்டது சந்திரயான் - 2 விண்கலம். நிலவில் ஆராய்ச்சி மேற்கொண்டுள்ள அமெரிக்கா, ரஷ்யா, ஜப்பான், சீனாவை அடுத்து ஐந்தாவது நாடாக இந்த முயற்சியில் இந்தியா இரண்டாவது முறையாக இறங்கியது.இந்த முறை எந்த நாடுகளின் விண்கலங்களும் சென்றடையாத நிலவின் தென் பகுதியில் சந்திரயான் - 2 விண்கலத்தை இறக்கி ஆய்வுகள் மேற்கொள்வதாக திட்டம்.


‘சந்திரயான்–2’ குறித்து விளக்கிய இஸ்ரோ தலைவர் சிவன்.

‘சந்திரயான்–2’ குறித்து விளக்கிய இஸ்ரோ தலைவர் சிவன்.





குறிப்பாக நிலவில் மனிதர்கள் வசிக்க தேவையான சூழல் உள்ளதா; தண்ணீர் உள்ளதா; அங்குள்ள ரசாயன இருப்புகளை பூமியின் தேவைகளுக்கு பயன்படுத்த முடியுமா என ஆராய்ச்சி மேற்கொள்ள உள்ளனர்.இதற்காக சந்திரயான் - 2 விண்கலத்தில் மூன்று முக்கிய கருவிகள் உள்ளன. 'லேண்டர் ரோவர் ஆர்பிட்டர்' என்ற அந்த மூன்று கருவிகளும்தான் நிலவில் இறங்குவது ஆராய்ச்சிகள் மேற்கொள்வது சுற்றி வருவது ஆகிய பணிகளை மேற்கொள்ள உள்ளன.

இந்த அரிய சாதனைக்காக நிலவை நோக்கி ஏவப்பட்ட சந்திரயான் - 2 விண்கலம் ஆக.14ல் பூமியிலிருந்து பிரிந்து நிலவை நோக்கி பயணித்தது. பெங்களூரு இஸ்ரோ மையத்தில் இருந்தவாறு அந்த விண்கலத்தை நிலவின் சுற்று வட்டப்பாதைக்குள் செலுத்தும் முயற்சியில் விஞ்ஞானிகள் இறங்கினர்.

திட்டமிட்டபடி காலை9:02 மணிக்கு சந்திரயான் - 2 விண்கலத்திலிருந்த திரவ இன்ஜினை
இங்கிருந்தவாறு விஞ்ஞானிகள் பற்ற வைத்தனர். 30 நிமிடங்கள் அந்த விண்கலத்தின்
இன்ஜின்கள் இயக்கப்பட்டன. மிகவும் சிக்கலான இந்தப் பணியை திறமையாக நம்
விஞ்ஞானிகள் கையாண்டனர். அதையடுத்து அந்த விண்கலத்திற்கு வேகம் கிடைத்தது;
நிலவின் சுற்று வட்டப்பாதைக்குள் செலுத்தப்பட்டது.

அந்தப் பணியும் கச்சிதமாக நிறைவேறியது.இன்னும் நான்கு முறை அதன் சுற்று வட்ட உயரம் அதிகரிக்கப்படும். செப்.2ல் லேண்டர் கருவி ஆர்பிட்டரில் இருந்து பிரிந்து பயணம் மேற்கொள்ளும். செப். 7 ல் சந்திரயான் - 2 நிலவில் தரையிறங்கும் என எதிர்பார்க்கப்படுகிறது.

இதயம் நின்று விட்டது!

பெங்களூருவில் நிருபர்களை சந்தித்த இஸ்ரோ தலைவர் கே.சிவன் கூறியதாவது:
சந்திரயான் - 2 விண்கலத்தை நிலவின் சுற்று வட்டப்பாதைக்குள் செலுத்துவதற்கான பணி
30 நிமிடங்கள் நடந்தது. அந்த நேரம் எங்கள் இதயங்கள் நின்று விட்டது போன்ற நிலையில் இருந்தது; பதற்றமாக இருந்தோம். இதற்கு முன் சந்திரயான் - 1 விண்கலத்தை நிலவின் சுற்று வட்டப்பாதைக்குள் செலுத்தியுள்ளோம். அந்த அனுபவம் கை கொடுத்தது.

ஆனால் செப்டம்பர் ௭ல் நிலவில் சந்திரயான் - 2 தரையிறங்கும் போது எங்களுக்கு நிச்சயம் பதற்றம் அதிகரித்து விடும் என நினைக்கிறேன். எங்களுக்கு அதற்கான அனுபவம் இல்லை. எனினும் ஏராளமான பரிசோதனைகள் உந்துதல் பயிற்சிகளில் ஈடுபட்டுள்ளோம். வெற்றிகரமாக அதையும் நிகழ்த்தி காட்டுவோம்.இவ்வாறு அவர் கூறினார்.

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X