புதுடில்லி : பிரதமர் மோடி மற்றும் தேசிய பாதுகாப்பு ஆலோசகர் அஜித் தோவலை தாக்குவதற்கு சிறப்பு பயிற்சி பெற்ற பயங்கரவாத குழுவை அனுப்ப ஜெய்சி இ முகம்மது தயார் நிலையில் இருப்பதாக உளவுத்துறை தகவல்கள் தெரிவிக்கின்றன.

காஷ்மீரில் 370 சட்டப்பிரிவு ரத்து செய்யப்பட்டதற்கு பழிவாங்கும் நடவடிக்கையாக பாக்., உளவு அமைப்பான ஐஎஸ்ஐ, ஜெய்சி இ முகம்மது பயங்கரவாத அமைப்புடன் சேர்ந்து இந்த தாக்குதலை நடத்த திட்டமிட்டிருப்பதாகவும் கூறப்படுகிறது. செப்டம்பர் மாதத்தில் இந்தியாவில் பெரிய தாக்குதலை நடத்த வேண்டும் என ஜெய்ஷி இ முகம்மது இயக்க தலைவர் ஷம்ஷர் வானி கைப்பட எழுதிய கடிதம் ஒன்று உளவுத்துறைக்கு கிடைத்துள்ளதாகவும் கூறப்படுகிறது. இது தவிர காஷ்மீர், அமிர்தசரஸ், பதன்கோட், காந்திநகர், கான்பூர், லக்னோ உள்ளிட்ட 30 நகரங்களில் தாக்குதல் நடத்தப்படவும் வாய்ப்புள்ளதாக கூறப்படுகிறது.

விமானப்படை தளங்களை தாக்க பயங்கரவாதிகளை திட்டமிட்டுள்ளதாக விடுக்கப்பட்ட மிரட்டலை தொடர்ந்து பிரதமர் மற்றும் பாதுகாப்பு ஆலோசகரை தாக்கவும் திட்டமிடப்பட்டுள்ளதாக உளவுத்துறை எச்சரித்துள்ளது. பாலகோட் பயங்கரவாத முகாம்கள் மீது நடத்தப்பட்ட சர்ஜிக்கல் ஸ்டிரைக், பயங்கரவாத தடுப்பு நடவடிக்கை உள்ளிட்டவைகளுக்கு பதில் நடவடிக்கையாக இந்த தாக்குதலை நடத்த பயங்கரவாதிகள் திட்டமிட்டுள்ளதாகவும் கூறப்படுகிறது.