இந்திய - சீன தலைவர்கள் இன்று 3 மணி நேரம் பேச்சு | Dinamalar

பொது செய்தி

தமிழ்நாடு

இந்திய - சீன தலைவர்கள் இன்று 3 மணி நேரம் பேச்சு

Updated : அக் 12, 2019 | Added : அக் 12, 2019 | கருத்துகள் (12)
இந்திய - சீன தலைவர்கள்

சென்னை:சென்னை வந்துள்ள சீன அதிபர் ஸீ ஜின்பிங்கும், பிரதமர் நரேந்திர மோடியும், இன்று மாமல்லபுரத்தில், மூன்று மணி நேரம், பேச்சு நடத்த உள்ளனர். பேச்சில், இரு நாடுகள் தரப்பிலும், தலா எட்டு பேர் பங்கேற்கின்றனர்.

இரண்டு நாள் பயணமாக, சென்னை வந்துள்ள சீன அதிபர் ஸீ ஜின்பிங், நேற்று மாமல்லபுரத்தில் உள்ள புராதன சின்னங்களை பார்வையிட்டார். அவருக்கு, பிரதமர் மோடியும், மத்திய அரசின் தொல்லியல் துறை உயரதிகாரிகளும், தமிழக புராதன சின்னங்களின் வரலாறு மற்றும் சிறப்புகளை விளக்கினர்.





முன்னதாக, சென்னை வந்திறங்கிய சீன அதிபருக்கு, இந்திய மற்றும் சீன வகை பாரம்பரிய உணவு வகைகள், மதிய உணவாக வழங்கப்பட்டன. இரவில்,தமிழகத்தின் சைவ, அசைவ உணவு வகைகள் பரிமாறப்பட்டன. குறிப்பாக, அதிக காரம் இல்லாத உணவு வகைகள் இடம் பெற்றன. மதிய உணவில், தக்காளி ரசம், தமிழக செட்டிநாடு வகை உணவுகள் மற்றும் சிக்கன் உணவுகள் இடம் பெற்றன. இன்றைய இரண்டாம் நாள் சந்திப்பில், காலை உணவுக்கு பின், இரு தரப்பினரும், முக்கியத்துவம் வாய்ந்த பேச்சு நடத்துகின்றனர்.
இது குறித்து, இந்திய வெளியுறவு துறை உயர் அதிகாரி ரவேஷ் குமார் கூறுகையில், ''இரு தரப்பிலும், இன்று மூன்று மணி நேரம் பேச்சு நடத்தப்படும்,'' என்றார்.இந்திய, சீன தலைவர்கள் இடையிலான இன்றைய சந்திப்பில், பிரதமர் நரேந்திர மோடியும், சீன அதிபர் ஸீ ஜின்பிங்கும், 40 நிமிடங்கள், தனியாக பேச்சு நடத்த உள்ளனர்.

இந்த சந்திப்பில், மொழி பெயர்ப்பாளர்கள் மற்றும் தனி செயலர்கள் மட்டுமே இடம் பெற உள்ளனர்.அதேநேரம், காலை, 10:00 மணிக்கு, இரு தரப்பின், அதிகார மட்டத்திலான பேச்சு துவங்கும். பிற்பகல், 2:00 மணி வரை, இந்த பேச்சு நீடிக்க வாய்ப்புள்ளது. எவ்வளவு நேரம் பேச்சு நடத்தப்படும் என்பது, சூழலை பொறுத்து முடிவு செய்யப்படும் என தெரிகிறது. இந்தியா மற்றும் சீனா தரப்பில், இரண்டு தலைவர்களுடனும், தலா எட்டு பேர் அடங்கிய குழுவினர் பங்கேற்க உள்ளனர்.இந்திய உயர்மட்ட குழுவில், வெளியுறவு துறை அமைச்சர் ஜெய்சங்கர், தேசிய பாதுகாப்பு ஆலோசகர் அஜித் தோவல், வெளியுறவு துறை செயலர் விஜய் கோகலே, சீனாவுக்கான இந்திய துாதர் விக்ரம் மிஸ்ரி ஆகியோர் இடம் பெறுகின்றனர்.

சீனா தரப்பில், சீன கம்யூனிஸ்ட் கட்சியின் பொலிட்டிக்கல் பீரோ மத்திய கமிட்டி உறுப்பினர் டிங் சுவேஸியாங், வெளிநாட்டு விவகாரத் துறை ஆணைய உறுப்பினர் யங் செய்ச்சி, அரசியல் ஆலோசனை வெளிநாட்டு விவகாரத் துறை அமைச்சர் வாங் யி, சீன பொதுமக்கள் ஆலோசனை கமிட்டியின் தலைவரும், தேசிய வளர்ச்சி மற்றும் மறுசீரமைப்பு ஆணைய தலைவருமான ஹி லைபெங் ஆகியோர் இடம் பெறுவர்.


Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X