தமிழிசைக்கு தனி மரியாதை

Added : அக் 19, 2019
Advertisement
தமிழிசைக்கு தனி மரியாதை

தமிழிசைக்கு தனி மரியாதை

மாநில கவர்னர்கள், மத்திய உள்துறை அமைச்சகத்தின் கட்டுப்பாட்டில் இருப்பதால், அனைத்து கவர்னர்களும், உள்துறை அமைச்சரை சந்தித்து, ஆலோசனை நடத்துவர். சில கவர்னர்கள், பிரதமரையும் சந்திப்பர். ஆனால், சமீப காலமாக, கவர்னர்களைச் சந்திப்பை, பிரதமர் மோடி தவிர்த்து வருகிறார்.'முக்கியமான விஷயம் குறித்து பேச வேண்டும்' என கவர்னர்கள் தரப்பில் தெரிவிக்கப்பட்டாலும், 'எதுவாக இருந்தாலும் உள்துறை அமைச்சரிடம் சொல்லுங்கள்; முக்கியமான விஷயம் என்றால் உள்துறை அமைச்சர், பிரதமரிடம் பேசுவார்' என, பிரதமர் அலுவலகத்திலிருந்து சொல்லப்படுகிறதாம்.தெலுங்கானா கவர்னராக தமிழிசை சவுந்தர ராஜன் பதவியேற்ற பின், சமீபத்தில் டில்லி வந்திருந்தார். உள்துறை அமைச்சர் அமித்ஷாவை சந்தித்தார். பின், பிரதமர் மோடியைச் சந்திக்க நேரம் கேட்டார். பிரதமர் அலுவலகத்தி லிருந்து, உடனடியாக அழைப்பு வந்தது.மோடியிடம், தெலுங்கான விவகாரங்கள் குறித்து, தமிழிசை ஆலோசனை நடத்தினார். அதைத் தொடர்ந்து, தமிழக அரசியல் நிலை குறித்தும், பேசியதாக சொல்லப்படுகிறது. கவர்னர்களைச் சந்திக்க தவிர்க்கும் பிரதமர், தமிழிசையை சந்திக்க எப்படி ஒப்புக் கொண்டார் என, டில்லி அரசியல் மற்றும் அதிகாரிகள் வட்டாரங்கள் ஆச்சர்யப்படுகின்றன. நம்ம ஊர் தமிழிசைக்கு, பிரதமர் தனி மரியாதை கொடுத்தது, அதிகாரிகள் வட்டாரத்தை மட்டுமின்றி, அரசியல் வட்டாரத்திலும், ஆர்வத்தை ஏற்படுத்தி உள்ளது.

அடிபட்ட பிறகும்...

ஹரியானா மற்றும் மஹாராஷ்டிரா சட்டசபை தேர்தல், நாளை நடக்கிறது. காங்கிரஸ் தரப்பில் சோனியா பிரசாரத்திற்கு வருவார் என முதலில் சொல்லப்பட்டது. இரு மாநில காங்கிரசாரும் உற்சாகமாக இருந்தனர். ஆனால், கடைசியில் உடல்நிலையை சுட்டிக்காட்டி, டாக்டர்கள் அறிவுரை கூறியதால், கடைசி நேரத்தில், ரத்து செய்துவிட்டார், சோனியா.ஆனால், அவருக்கு பதிலாக, ராகுல் பிரசாரத்துக்கு ஆஜராகி வருகிறார். அம்மாவை எதிர்பார்த்து காத்திருந்த தொண்டர்களுக்கு, மகனின் பிரசாரம், சுவாரஸ்யம் அளிக்கவில்லை. போகும் இடமெல்லாம், 'மோடி ஒரு பிக்பாக்கெட்; ரபேல் போர் விமானத்தில் ஊழல் செய்து கோடிக்கணக்கில் பணம் அடித்துவிட்டார்; அதனால் தான் ரபேல் விமானத்தை பெற்றுக் கொள்ள, ராணுவ அமைச்சர் ராஜ்நாத் சிங், பிரான்ஸ் சென்றார்' என, பேசி வருகிறார், ராகுல்.லோக்சபா தேர்தலிலும், இதே ரபேல் விமான ஊழல் குற்றச்சாட்டுகள் தான், ராகுலின் பிரதான பிரசாரமாக இருந்தது. அனால், இதுவே மோடிக்கு சாதமாகிப் போனது. விளைவு, 300க்கும் அதிகமான தொகுதிகளில், பா.ஜ., வெற்றி பெற்றது. மீண்டும், ராகுலின் அதே பாணி பிரசாரத்தால், வெறுத்துப் போயுள்ளனர் காங்கிரஸ் தொண்டர்களும், இரண்டாம் கட்ட தலைவர்களும். ராகுலின் பிரசார பாணி மாறாவிட்டால், ஜெயிக்கப் போகின்ற ஒரு சில தொகுதிகளும் போய்விடும் போலிருக்கிறதே என நொந்து போயுள்ளனர், இரண்டு மாநில காங்கிரசாரும். ஆனால், 'ராகுல் தான் எங்களின் பிரசார பீரங்கி; அவர், மோடியை எவ்வளவு திட்டுகிறாரோ, அவ்வளவும் எங்களுக்கு வெற்றிதான்' என்கின்றனர், பா.ஜ., கட்சியினர்.


சிந்தியாவை ஆதரிக்கும் பா.ஜ.,
மத்தியப் பிரதேச மாநில காங்கிரஸ் தலைவர், ஜோதிராதித்ய சிந்தியா, ராஜ வம்சத்தைச் சார்ந்தவர். பல முறை, எம்.பி.,யாக பதவி வகித்த இவர், இந்த தடவை, லோக்சபா தேர்தலில் தோற்றுப் போனார். மத்தியப் பிரதேச சட்டசபை தேர்தலில், காங்கிரஸ் வெற்றி பெற்ற போது, சிந்தியா முதல்வராவார் என, கட்சியினர் மத்தியில் எதிர்பார்க்கப்பட்டது. ஆனால், சீனியர் தலைவர், கமல்நாத்தை முதல்வராக்கினார், சோனியா. ஏற்கனவே, சிந்தியாவிற்கும் கமல்நாத்திற்கும் ஆகாது; இப்போது அடிக்கடி தகராறு நடக்கிறது.சில மாதங்களுக்கு முன், இந்த சண்டை தீவிரமானது. 'சிந்தியா, பா.ஜ.,வில் சேரப் போகிறார்; அதனால் தான் இந்த பிரச்னை' என, காங்கிரஸ் கட்சியினர் சொல்லிவந்தனர். அதன் பின், சிந்தியாவை அழைத்து பேசினார், சோனியா. சிறிது காலம் அமைதி நிலவியது. ஆனால், இப்போது, மீண்டும் சண்டை விறுவிறுப்படைந்துள்ளது. 'காங்கிரஸ் ஆட்சிக்கு வந்ததும், விவசாயிகளின் கடன் ரத்து செய்யப்படும்' என, மத்தியப் பிரதேச தேர்தல் பிரசாரத்தின் போது, வாக்குறுதி தரப்பட்டது. கமல்நாத் முதல்வர் பதவியில் அமர்ந்ததும், இதை அமல்படுத்தினார்.ஆனால், 'விவசாய கடன் ரத்து, ஒரு பேத்தல்; இதனால் உண்மையான விவசாயி களுக்கு எந்த நன்மையும் இல்லை' என, ஊர் ஊராக கமல்நாத்திற்கு எதிராக பிரசாரம் செய்து வருகிறார் சிந்தியா. 'அமைதியாக இருந்த சிந்தியாவுக்கு, என்னவாயிற்று' என, காங்கிரசார் அதிர்ச்சியடைந்துள்ளனர். 'நாட்டிலேயே இரண்டு மாநிலங்களில்தான், காங்கிரஸ் ஆட்சி நடக்கிறது; அதற்கும் சிந்தியா வேட்டு வைத்துவிடுவார் போலிருக்கிறதே' என வருத்தப்படுகின்றனர், காங்கிரஸ் மூத்த தலைவர்கள்.'சிந்தியாவை கொம்பு சீவி விடுவதே, பா.ஜ., தேசிய தலைவர் அமித் ஷா தான்' என்று, மீண்டும் காங்கிரசார் கிசுகிசுத்துக் கொள்கின்றனர். முக்கிய தலைவர்கள் பலரை இழுக்க முயற்சி செய்துவரும் பா.ஜ.,வின், பட்டியலில், முதலில் இருப்பது சிந்தியா. அதனால், அவர், நம் கையை விட்டு போய்விடுவாரோ என, குழப்பத்தில் உள்ளது, காங்கிரஸ் மேலிடம்.

Advertisement


வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை

We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X