வென்றது நீதி! ஆர்.டி.ஐ. வளையத்திற்குள் சுப்ரீம்கோர்ட்

Updated : நவ 14, 2019 | Added : நவ 13, 2019 | கருத்துகள் (16+ 5)
Advertisement
ஆர்.டி.ஐ., சுப்ரீம் கோர்ட், தீர்ப்பு, ரஞ்சன் கோகாய், விதிவிலக்கு, எதிர்ப்பு

புதுடில்லி : 'சட்டத்தில் இருந்து யாருமே விதிவிலக்கல்ல' என்பதை, உச்ச நீதிமன்ற தலைமை நீதிபதி ரஞ்சன் கோகோய் தலைமையிலான அமர்வு அறிவித்துள்ளது. 'ஆர்.டி.ஐ., எனப்படும் தகவல் அறியும் உரிமை சட்டத்தின் கீழ், உச்ச நீதிமன்ற தலைமை நீதிபதியின் அலுவலகமும் வரும்' என, தீர்ப்பு அளித்துள்ளது.

அரசு நிர்வாகம் உட்பட பல்வேறு துறைகள் உள்ளிட்டவை தொடர்பான தகவல்களை பொதுமக்கள் அறிந்து கொள்ளும் வகையில் ஆர்.டி.ஐ. எனப்படும் தகவல் அறியும் உரிமை சட்டம் 2005ல் அமல்படுத்தப்பட்டது. ஆனால் இந்த சட்டத்தில் சில விலக்குகளும் உள்ளன. அவ்வாறு உச்ச நீதிமன்ற தலைமை நீதிபதி அலுவலகம் தொடர்பான தகவல்களைப் பரிமாறிக் கொள்வதற்கும் விலக்கு அளிக்கப்பட்டிருந்தது. இந்த நிலையில் தகவல் அறியும் உரிமை சட்டத்தின் கீழ் உச்ச நீதிமன்ற தலைமை நீதிபதி அலுவலகத்தையும் சேர்க்கக் கோரி எஸ்.சி.அகர்வால் என்ற சமூக ஆர்வலர் வழக்கு தொடர்ந்திருந்தார்.

இது தொடர்பான வழக்கை விசாரித்த டில்லி உயர் நீதிமன்றம் 2010ல் அளித்த தீர்ப்பில் 'ஆர்.டி.ஐ. சட்டத்தின் கீழ் உச்ச நீதிமன்ற தலைமை நீதிபதி அலுவலகமும் வரும்' என தெரிவித்தது. இந்தத் தீர்ப்பு அப்போதைய உச்ச நீதிமன்ற தலைமை நீதிபதியாக இருந்த கே.ஜி. பாலகிருஷ்ணனுக்கு பெரும் பின்னடைவாக பார்க்கப்பட்டது. ஆர்.டி.ஐ. சட்டத்தில் உச்ச நீதிமன்ற தலைமை நீதிபதி அலுவலகத்தை சேர்க்க அவர் எதிர்ப்பு தெரிவித்திருந்தார்.

உச்ச நீதிமன்றத்தின் எதிர்ப்பை மீறி அப்போது டில்லி உயர் நீதிமன்ற தலைமை நீதிபதியாக இருந்த ஏ.பி.ஷா, நீதிபதிகள் விக்ரம்ஜித் சென், எஸ்.முரளிதர் அமர்வு தீர்ப்பை வழங்கியது. இதை எதிர்த்து உச்ச நீதிமன்ற பதிவாளர் ஜெனரல் மற்றும் உச்ச நீதிமன்ற மத்திய தகவல் அதிகாரி ஆகியோர் உச்ச நீதிமன்றத்தில் மேல்முறையீட்டு வழக்கை தொடர்ந்தனர். உச்ச நீதிமன்ற தலைமை நீதிபதி ரஞ்சன் கோகோய், நீதிபதிகள் என்.வி.ரமணா, டி.ஒய்.சந்திரசூட், தீபக் குப்தா, சஞ்சீவ் கன்னா அடங்கிய அரசியல் சாசன அமர்வு இந்த வழக்கை விசாரித்து வந்தது.

நவ., 17ல் ஓய்வு பெறும் நிலையில் தலைமை நீதிபதி ரஞ்சன் கோகோய் பல்வேறு வழக்குகளில் தீர்ப்பு அளித்து வருகிறார். அதன்படி இந்த வழக்கில் நேற்று தீர்ப்பு அளிக்கப்பட்டது. ஐந்து நீதிபதிகளும் ஒருமித்த தீர்ப்பு அளித்துள்ளனர். அதே நேரத்தில் தலைமை நீதிபதி ரஞ்சன் கோகோய் நீதிபதிகள் தீபக் குப்தா, சஞ்சீவ் கன்னா ஒரு தீர்ப்பை அளித்தனர். நீதிபதிகள் ரமணா மற்றும் சந்திரசூட் தனித்தனியாக தீர்ப்பு எழுதியுள்ளனர்.

தீர்ப்பில் கூறப்பட்டுள்ளதாவது: தலைமை நீதிபதி அலுவலகம் ஒரு பொது அமைப்பு. அதனால் ஆர்.டி.ஐ. சட்டத்தின் கீழ் இது வரும். அதே நேரத்தில் ஆர்.டி.ஐ. சட்டத்தை ஒரு கண்காணிக்கும் கருவியாக பயன்படுத்தக் கூடாது. வெளிப்படை தன்மை இருக்க வேண்டும் என்பதை ஏற்கிறோம்; அதே நேரத்தில் நீதித்துறை சுதந்திரமும் முக்கியம். அதில் சமரசம் செய்ய முடியாது.

நியமனம் உள்ளிட்டவற்றில் 'கொலீஜியம்' எனப்படும் நீதிபதிகள் குழு எடுக்கும் முடிவுகளில் நியமிக்கப்படும் நீதிபதியின் பெயரை மட்டுமே ஆர்.டி.ஐ. சட்டத்தின் கீழ் வெளிப்படுத்த முடியும்; அவரைத் தேர்வு செய்ததற்கான காரணத்தை அளிக்க முடியாது. அரசியலமைப்பு பணியில் உள்ளோம் என்பதால் நீதித்துறைக்கு முழு பாதுகாப்பையும் அளிக்க முடியாது என்பதை ஏற்கிறோம்.

அதே நேரத்தில் தனிநபர் சுதந்திரத்துக்கான உரிமையையும் வெளிப்படை தன்மையையும் சமமாக பார்க்க வேண்டும். சட்டத்தில் இருந்து யாருமே விதிவிலக்கல்ல. இவ்வாறு அமர்வு தீர்ப்பு அளித்துள்ளது. நீதிமன்றத் தீர்ப்புக்கு ஆர்.டி.ஐ. ஆர்வலர்கள் பலரும் வரவேற்பு தெரிவித்துள்ளனர்.


வறுத்தெடுத்த வழக்கறிஞர்


வழக்கை தொடர்ந்துள்ள எஸ்.சி.அகர்வால் சார்பில் மூத்த வழக்கறிஞர் பிரஷாந்த் பூஷண் ஆஜரானார். வழக்கின் விசாரணையின்போது அவர் வாதிட்டதாவது: தனக்கு எதிரான வழக்கை உச்ச நீதிமன்றம் விசாரிக்கக் கூடாது; ஆனால் வேறு வழியில்லாமல் இந்த விசாரணை நடைபெறுகிறது. ஆர்.டி.ஐ. சட்டத்தின் கீழ் இடம் பெற நீதித் துறை மறுத்து வருவது துரதிருஷ்டவசமானது; வருத்தமளிக்கிறது.

நீதிபதிகள் என்ன வேறொரு உலகத்திலா இருக்கின்றனர்? பல்வேறு மாநில அரசுகள் மற்றும் அமைப்புகள் தொடர்பான வழக்குகளில் 'அவை வெளிப்படை தன்மையுடன் இருக்க வேண்டும்' என உச்ச நீதிமன்றம் கூறியுள்ளது. ஆனால் தனக்கென்று வரும்போது அதை ஏற்க மறுப்பது வேடிக்கை.

ஆர்.டி.ஐ. சட்டத்தில் அளிக்கப்பட்டுள்ள பல்வேறு விலக்குகளுக்கு இந்த நீதிமன்றம் எதிர்ப்பு தெரிவித்துள்ளதையும் சுட்டிக்காட்ட விரும்புகிறேன். நீதிமன்றச் சுதந்திரம் என்று கூறுகிறீர்கள். அரசின் கட்டுப்பாட்டில் இருக்கக் கூடாது என்பதற்காக தேசிய நீதி பொறுப்புடைமை கமிஷன் சட்டத்தை உச்ச நீதிமன்றம் ரத்து செய்தது. அதற்காக நீதித்துறை என்பது பொதுமக்களின் கண்காணிப்புக்கு அப்பாற்பட்டதல்ல. இவ்வாறு அவர் வாதிட்டார்.

Advertisement




வாசகர் கருத்து (16+ 5)

  • புதியவை
  • பழையவை
  • அதிகம் விவாதிக்கப்பட்டவை
  • மிக மிக தரமானவை
  • மிக தரமானவை
  • தரமானவை
Darmavan - Chennai,இந்தியா
14-நவ-201916:17:18 IST Report Abuse
Darmavan 1பிரசாந்த் சொல்வது இரண்டு உண்மைகள்.1 .நீதிபதிகள் தங்களுக்கே நீதிபதியாக இருக்க முடியாது.2 இவர்களும் சாதாரண மனிதர்களே எல்லா ஆசாபாசங்களுக்கும் அடிமைப்பட்டவர்களே.அது சரித்திரத்தில் இதுவரை இல்லாமல் 4 நீதிகள் தெருவுக்கு வந்த போது தெரிந்தது
Rate this:
Share this comment
Cancel
Darmavan - Chennai,இந்தியா
14-நவ-201916:09:43 IST Report Abuse
Darmavan நீதி மன்றங்கள் மத்திய அரசுக்கு கட்டுப்பட்டவையே. காரணம் மக்கள் தன் அதிகாரத்தை அரசிடம்தான் கொடுத்திருக்கிறார்கள் அன்றி கோர்டிடம் அல்ல
Rate this:
Share this comment
Cancel
ஜெயந்தன் - Chennai,இந்தியா
14-நவ-201916:00:50 IST Report Abuse
ஜெயந்தன் நீதி மன்றங்களும்.....சட்டங்களும் இந்த நாட்டில் ...இது வரை எத்தனை முறை உண்மையான குற்ற்றவாளிகளை தண்டித்திருக்கிறது ...
Rate this:
Share this comment
THENNAVAN - CHENNAI,இந்தியா
14-நவ-201916:46:42 IST Report Abuse
THENNAVANநேர்மைக்கு கடிவாளம் போடுவது மட்டுமே நீதி, குறுக்கு சால் ஓட்டும் நபர்கள் எப்போதும் ஒட்டிக்கிட்டுத்தான் இருக்கிறார்கள் .காசுக்கு நீதி கிடைக்கிறது உதாரணம்,பொள்ளாச்சி ரேப் கேசு,தினகரன் அலுவலக மனிதர்கள் எரிப்பு கேசு, கிருட்டிணன் கொலை கேசு, சாதிகப்ஸா தற்கொலை கேசு..சர்க்காரியா கேசு,2 ஜி கேசு ,கர்சட் மேக்த கேசு .......தொடரும்.கணக்கில் அடங்காது....
Rate this:
Share this comment
Cancel

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை

We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X