1000 பேருக்கு இலை... பதிவு அதிகாரி விழாவில் 'தங்க மழை!'

Updated : நவ 19, 2019 | Added : நவ 18, 2019
Advertisement
 1000 பேருக்கு இலை... பதிவு அதிகாரி விழாவில் 'தங்க மழை!'

பீளமேடு, சுகுணா கல்யாண மண்டபத்தில், கார்ப்பரேஷன் நடத்திய, 'எழில்மிகு கோவை' கண்காட்சியை சுற்றிப்பார்க்க, சித்ராவும், மித்ராவும் சென்றிருந்தனர். சுகாதாரப்பிரிவினர், நிலவேம்பு கொடுத்து, பார்வையாளர்களை வரவேற்றனர்.''என்னக்கா, வரவேற்பு அமர்க்களமா இருக்கு,'' என்றபடி, மண்டபத்துக்குள் நுழைந்தாள் மித்ரா.

வீட்டிலேயே மக்கும் குப்பையில் உரம் தயாரிப்பதை பற்றி கேட்டறிந்த சித்ரா, ஒவ்வொரு ஸ்டாலாக விசாரித்துச் சென்றாள்.''அக்கா, இங்க பாருங்க, 'ஸ்மார்ட் சிட்டி' ஸ்டால். ஒவ்வொரு குளத்திலும் என்னென்ன செய்யப் போறாம்னு மாதிரி வச்சிருக்காங்க,''

''ஆஹா, சூப்பரா இருக்கே. இதே மாதிரி தத்ரூபமா அமைச்சாங்கன்னா, நம்மூர்ல நல்ல பொழுதுபோக்கு இடமா மாறும். பார்ப்போம் என்ன செய்றாங்கன்னு,''''ஆனா, கிருஷ்ணாம்பதி, நரசாம்பதி குளத்துல கோடிக்கணக்குல செலவு செய்றதுக்கு பதிலா, வேற திட்டங்கள செயல்படுத்தலாம்னு, கார்ப்பரேஷன் ஆபீசர்ஸ் நெனைச்சிருக்காங்க. ஆளுங்கட்சி தரப்புல அழுத்தம் கொடுத்ததால, மறுபடியும் 'டெண்டர்' விட்டுருக்காங்க. கிருஷ்ணாம்பதியில வேலை செய்யற 'டெண்டர்', ஆளுங்கட்சிக்கு வேண்டப்பட்ட கம்பெனிக்கு கொடுப்பாங்கன்னு பேசிக்கிறாங்க...''

''இதென்ன புதுசா, எந்த வேலையா இருந்தாலும் அவுங்கதானே பார்க்குறாங்க. இப்ப, புதுசா குடிநீர் இணைப்பு வாங்குறதுக்கு கூட, ஆளுங்கட்சிக்காரங்க தயவை எதிர்பார்க்க வேண்டியிருக்குது,'' என, அங்காய்த்தாள் சித்ரா.''அதாவது பரவாயில்லை. குடிநீர் இணைப்பு வழங்குறது, சொத்து பெயர் மாற்ற உத்தரவை கூட, விழா நடத்தி கொடுக்குறாங்க. அத நெனைச்சா, காமெடியா இருக்கு...''

''உள்ளாட்சி தேர்தல் வரப்போகுதுல்ல. ஆளுங்கட்சிக்காரங்க என்ன வேணும்னாலும் செய்வாங்க,''''கொஞ்ச நாளைக்கு முன்னாடி, இதய தெய்வம் மாளிகைக்கு போயிருந்தேன். ஜேஜேன்னு கூட்டம் இருந்துச்சு. மேயர் பதவிக்கு, 15 பேரும், கவுன்சிலர் பதவிக்கு, 521 பேரும் விருப்ப மனு கொடுத்திருக்காங்களாம்,''

''அடடே... அவ்ளோ போட்டி இருக்கா? மத்த கட்சியில என்ன பண்றாங்க,''''ஆளுங்கட்சி தரப்புல வார்டுக்கு ஐந்து பேர் வீதம் கவுன்சிலர் சீட்டு கேட்டு மனு கொடுத்திருக்காங்க. வார்டுக்கு இரண்டு பேரை இறுதி செய்ய சொல்லியிருக்காங்களாம். யாரு நின்னா ஜெயிக்க வாய்ப்பு இருக்குனு உள்ளூர் உளவுத்துறை மூலமா ஆழம் பார்த்திட்டு இருக்காங்க. யாருக்கு சீட்டு கிடைக்கும்னு கட்சிக்காரங்க கலக்கத்துல இருக்காங்க. தி.மு.க.,வுல விருப்ப மனு கொடுக்க நாளை வரை அவகாசம் கொடுத்திருக்காங்க. கம்யூ., தரப்புல, மேயர் பதவி வேண்டாம்னு சொல்லிட்டாங்களாம். மா.கம்யூ., 25 வார்டு, இ.கம்யூ., 15 வார்டு கவுன்சிலர் 'சீட்' கேட்டு பேரம் பேசிட்டு இருக்காங்களாம்,''

''காங்கிரசை பத்தி, எதுவுமே சொல்லலையே...'' ''அந்தக்கட்சியில ஏகப்பட்ட கோஷ்டி இருக்கு. இப்பதான், மாநில அளவில் ஆலோசனை நடத்தியிருக்காங்க. அடுத்த வாரம் விருப்ப மனு வாங்கலாம்னு நெனைக்கிறாங்களாம்,'' ''அதெல்லாம் சரி, த.மா.கா., 'மாஜி' கவுன்சிலர் வீடு அடமானத்துல இருக்காமே,'' ''ஆமாக்கா, நானும் கேள்விப்பட்டேன், வீட்டை வங்கியில அடமானம் வச்சு, லட்சக்கணக்குல லோன் வாங்கியிருக்காரு. 10 வருஷமா கடனை திருப்பிக் கட்டலை. ஜப்தி செய்றதுக்கு, பேங்க் மேனேஜர் முயற்சி செஞ்சிருக்காரு.''அரசியல் பின்னணி இருக்கிறதுனால, அவரால முடியலை; போலீசை நாடியிருக்காங்க; காசு பெயராதுங்கிறதுனால, கைவிட்டுட்டாங்க. வீட்டை காலி செய்யாமலேயே, வேறொருத்தருக்கு ஏலம் விட்டுட்டாங்க. 'மாஜி' கவுன்சிலர் இன்னமும் அதே வீட்டுல வசிக்கிறாரு. வீட்டை வாங்குனவரு, கலெக்டர் ஆபீசுல மனு கொடுத்திருக்காரு. டி.ஆர்.ஓ., விசாரிச்சிட்டு இருக்காராம்,''

''ஆனா, அரசியல்வாதிகளை பார்த்தா, நம்மூர் அதிகாரிங்க தொடை நடுங்குவாங்களே...'' என, கிண்டலடித்த மித்ரா, மண்டபத்தை விட்டு வெளியே வந்தாள்.''கண்காட்சி நல்லா இருந்துச்சுல்ல,'' என, சர்ட்டிபிகேட் கொடுத்தாள் சித்ரா.

''அக்கா, வெவரம் தெரியாம சொல்லக்கூடாது. கார்ப்பரேஷன்ல ஏகப்பட்ட என்.ஜி.ஓ.,க்கள் வேலை செஞ்சிட்டு இருக்காங்க. அவுங்களோட ஏற்பாடு; ஒவ்வொரு விஷயத்திலும் பிரதிபலன் இல்லாம செய்ய மாட்டாங்க. சில என்.ஜி.ஓ.,க் கள், குப்பையை தரம் பிரித்து வாங்குறதிலேயே, பல லகரம் கரன்சி எண்ணுறாங்க,'' என்ற மித்ரா, ''பெருச்சாளிகள் அதிகமாயிடுச்சாமே...'' என, நோண்டினாள்.

''கார்ப்பரேஷன்ல இருக்குற ஊழல் பெருச்சாளிகளை சொல்றீயா,'' ''எப்ப பார்த்தாலும், கார்ப்பரேஷனை பத்தியே நெனைச்சிட்டு இருங்க. ஜி.எச்.,ல இருக்கற மகப்பேறு வார்டுல ஏகப்பட்ட பெருச்சாளி சுத்துது. போன வருஷம், ஆஸ்பத்திரியில உயிரிழந்த மூதாட்டி உடலை பூனை கடித்து தின்ற விவகாரம் பூதாகரமாக வெடிச்சது. பெருச்சாளி விஷயமும் அப்படி ஏதாவது நடந்த பின்னாடி நடவடிக்கை எடுப்பாங்க போலிருக்கு,'' ''அட போப்பா, பெரிசா ஊழல் வெவகாரத்தை சொல்லுவேன்னு, நெனைச்சா,'' என, இழுத்தாள் சித்ரா, மண்டபத்துக்கு எதிரே இருந்த பேக்கரிக்குள் நுழைந்தாள்.

இஞ்சி டீ, பப்ஸ் ஆர்டர் கொடுத்த மித்ரா, ''அக்கா, அரசாங்க அலுவலகத்துல முறைகேடு நடக்காம இருக்குமா. பெரியநாயக்கன் பாளையம் ஒன்றியத்துல, கோவனுார் பக்கத்துல அண்ணன்-தம்பி பள்ளம் இருக்கு. இயற்கை ஆர்வலர்கள், பொதுமக்கள் கைகோர்த்து, சொந்தக்காசு செலவு செஞ்சு, துார்வாருனாங்க.

''ஆனா, அரசாங்க தரப்புல குடிமராமத்து ஸ்கீம்ல செஞ்சதா கணக்கு காட்டப்போறாங்களாம். ரூ.2.80 லட்சத்துக்கு 'பில்' தயார் செஞ்சு வச்சிருக்காங்களாம். கொஞ்ச நாளைக்கு முன்னாடி, கலெக்டர் கூட, கள ஆய்வு செஞ்சிட்டு போயிருக்காரு. இதை கேள்விப்பட்ட மக்கள், கொந்தளிப்புல இருக்காங்க''''அடக்கொடுமையே,'' என, 'உச்' கொட்டிய சித்ரா, ''ஆமா, கலெக்டருக்கு ரூ.50 ஆயிரம் ஏன் அபராதம் விதிக்கக்கூடாதுன்னு ஐகோர்ட் நோட்டீஸ் அனுப்பியிருக்காமே,''

''ஆமாக்கா, நானும் கேள்விப்பட்டேன். விவசாயிகள் விளைநிலம் வழியா வேணும்னே உயர் மின்கோபுரம் அமைக்கிறதுக்கு எதிர்ப்பு தெரிவிச்சு, விவசாயிகள் கோர்ட்டுல வழக்கு போட்டிருக்காங்க. இதுல, கோர்ட் உத்தரவை பின்பற்றாத காரணத்துக்காக, ஏன் அபராதம் விதிக்கக்கூடாதுன்னு நோட்டீஸ் அனுப்பியிருக்காங்க, ''டீ குடித்து விட்டு வெளியே வந்த சித்ரா, ''ஏம்ப்பா, கார்ப்பரேஷன் கண்காட்சி நடத்துறதுக்கு பதிலா, ஒழுங்கா குப்பை அள்ளுனாங்கன்னா, நோய் பரவாம இருக்கும்ல,''

''கரெக்டா சொன்னீங்க. குப்பை விஷயத்தை தொட்டாலே, டன் கணக்குல அளந்து விடுறாங்க. எங்க பார்த்தாலும் ரோட்டுல பரவிக்கெடக்குது; கழிவு நீர் தேங்கி நிக்குது. கொசுத்தொல்லை தாங்க முடியலை. கொஞ்ச நாளைக்கு முன்னாடி, காய்ச்சலுக்கு சிகிச்சை எடுத்துட்டு இருந்த, 7 வயது சிறுமி இறந்துடுச்சு,'' என, பரிதாபப்பட்டாள் மித்ரா.

''கொஞ்ச நாளைக்கு முன்னாடி, டெங்கு தடுப்பு கூட்டம் நடத்தியிருக்காங்க. கூட்டத்துக்கு வந்திருந்த டாக்டர்கள் பலரும் இருமிக்கிட்டே இருந்தாங்களாம்; ஏகப்பட்ட பேருக்கு காய்ச்சலாம்,'' என்ற சித்ரா, ''சிட்டியில ஓடுற சில டவுன் பஸ்களை இஷ்டத்துக்கு 'ரூட்' மாத்துறங்களாமே,'' என, நோண்டினாள்.''உண்மைதான்க்கா, சிவானந்தா காலனி போற, 5ம் எண்ணுள்ள தனியார் பஸ்கள, இஷ்டத்துக்கு 'ரூட்' மாற்றி ஓட்டுறாங்களாம். கூட்டத்துக்கு ஏற்ப சிவானந்தா காலனி போகலாமா, வேண்டாமானு முடிவு செய்றாங்களாம்.

'பீக் ஹவர்ஸ்' தவிர, மற்ற நேரத்துல காந்திபுரம் வரைக்கும் ஓட்டுறாங்களாம். கண்டக்டரிடம் கேட்டா, 'யாரிடம் வேண்டுமானாலும் புகார் சொல்லு; நாங்க பார்த்துக்குவோம்'னு மிரட்டுறாராம்,''''அரசு அதிகாரிங்க நேர்மையா இருந்தா, இப்படி திமிறா பேசுவாங்களா,'' என்ற சித்ரா, ''பத்திரப்பதிவு துறையை சேர்ந்த 'செல்வாக்கான' அதிகாரி ஒருத்தரு தடபுடலா அசைவ விருந்து வச்சு, விழா நடத்துனாராமே...'' என, அடுத்த சப்ஜெக்ட்டுக்கு மாறினாள்.

''ஆமாக்கா, நானும் விசாரிச்சேன். உண்மைதானாம். காரைக்குடியில இருந்து சமையல்காரங்களை வரவழைச்சிருக்காரு; துாத்துக்குடியில இருந்து கடல் மீன் வகைகள் வந்திருக்கு. சிக்கன், மட்டன், மீன், முட்டை உருண்டைன்னு தடபுடலா விருந்து நடந்திருக்கு. ஏகப்பட்ட வி.ஐ.பி.,கள் வந்திருந்தாங்களாம். ஹால் நிரம்பி வழிச்சதாம். பொண்ணுக்கு நடத்துன விழாங்கிறதுனால, அன்பளிப்பா, தங்க மழை பொழியுற மாதிரி, மொய் வந்துச்சாம்''

''அப்படியா...'' என, வாயைப்பிளந்த சித்ரா, இவர மாதிரி அதிகாரிகள எல்லாம், 'விஜிலென்ஸ்'காரங்க கண்டுக்கமாட்டாங்களா... அவங்களும் கிடா விருந்துக்கு போயிருப்பாங்களோ...' என்றவாறு, வீட்டுக்கு செல்ல ஸ்கூட்டரை, 'ஆன்' செய்தாள்.பின்னால் அமர்ந்து கொண்ட மித்ரா, ''அக்கா, இதுக்கே வாயை பிளக்காதீங்க. அரசு உதவி பெறும் கல்லுாரிகளில் உதவி பேராசிரியர் நியமிக்கணும்னா, பல்கலை ஒப்புதல் மட்டுமில்லாம, கல்லுாரி கல்வி மண்டல இணை இயக்குனர் அலுவலகத்திலும் பணி நியமன அங்கீகார ஒப்புதல் பெறணுமாம்.

இதுக்கு, வசூல் வேட்டை நடத்துறாத புகார் கெளம்பியிருக்கு.''வழக்கமா, பணி நியமனம் செய்யற கல்லுாரிகளிலேயே, அதிகாரி பெயரை சொல்லி, ரூ.2 லட்சத்துல இருந்து மூன்று லட்சம் வரைக்கு வசூலிப்பாங்களாம். வசூலிச்சு கொடுக்காத கல்லுாரியை சேர்ந்தவங்களா இருந்தா, வேணும்னே 'பெண்டிங்' போட்டுடுவாங்களாம். கடந்த ஒன்றரை வருஷத்துல, 100க்கும் மேற்பட்ட உதவி பேராசிரியர்கள் நியமிச்சிருக்காங்க; ரெண்டு கோடி வரைக்கும் வசூலிச்சு, பங்கு பிரிச்சிருக்காங்களாம். கரன்சி கைமாறாம இருக்கிறதுனால, சிலரது ஒப்புதல் நிறுத்தி வச்சிருக்கிறதா சொல்றாங்க,'' என்றாள்.வீட்டை நோக்கி, ஸ்கூட்டர் சென்றது.

Advertisement


வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை

We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X