அரசியல் செய்தி

தமிழ்நாடு

உள்ளாட்சியில் திமுக - அதிமுக பெற்ற இடங்களில் அதிக வித்தியாசமில்லை!

Updated : ஜன 12, 2020 | Added : ஜன 12, 2020
Advertisement
உள்ளாட்சி, திமுக, ஸ்டாலின், அதிமுக, பழனிசாமி, வித்தியாசமில்லை

சென்னை : மாவட்ட ஊராட்சிகள் மற்றும் ஊராட்சி ஒன்றிய குழு தலைவர்கள், துணைத் தலைவர்களை தேர்வு செய்வதற்கான மறைமுக தேர்தலில் தி.மு.க. - அ.தி.மு.க. கைப்பற்றிய இடங்களில் பெரிய வித்தியாசமில்லை. மாவட்ட ஊராட்சி தலைவர் தேர்தலில் தி.மு.க. 12; அ.தி.மு.க. 14 இடங்களில் வெற்றி பெற்று தேர்தலை முடித்து வைத்தன.

தமிழகத்தில் சென்னை உள்பட 10 மாவட்டங்கள் தவிர்த்து 27 மாவட்டங்களில் 91 ஆயிரத்து 975 ஊரக உள்ளாட்சி பதவிகளுக்கு இரண்டு கட்டமாக தேர்தல் நடந்தது. ஓட்டு எண்ணிக்கை 2ம் தேதி துவங்கி 4ம் தேதி நிறைவடைந்தது. தேர்தல் நடந்த 27 மாவட்ட ஊராட்சிக்கு உட்பட்ட 515 வார்டுகளில் அ.தி.மு.க. கூட்டணி 242 இடங்களிலும், தி.மு.க. கூட்டணி 272 இடங்களிலும் வெற்றி பெற்றன.

314 ஊராட்சி ஒன்றியங்களுக்கு உட்பட்ட 5,090 வார்டுகளில் அ.தி.மு.க. கூட்டணி 2,199 இடங்களிலும் தி.மு.க. கூட்டணி 2363 இடங்களிலும் வெற்றி பெற்றன. புதிதாக வெற்றி பெற்ற உள்ளாட்சி பிரதிநிதிகள் அனைவரும் 6ம் தேதி பதவியேற்றனர். அதைத் தொடர்ந்து மாவட்ட ஊராட்சி தலைவர், துணை தலைவர், ஊராட்சி ஒன்றிய தலைவர், துணை தலைவர் ஆகியோரை தேர்வு செய்வதற்காக நேற்று மறைமுக தேர்தல் நடந்தது.

மாவட்ட ஊராட்சி தலைவர் பதவிக்கான தேர்தலில் அ.தி.மு.க. கூட்டணி அரியலுார், கோவை, சேலம், தர்மபுரி, கடலுார், ஈரோடு, கன்னியாகுமரி, கரூர், நாமக்கல், தேனி, திருப்பூர், புதுக்கோட்டை, துாத்துக்குடி, விருதுநகர் என 14 மாவட்டங்களில் தலைவர் பதவியை கைப்பற்றியது. தி.மு.க. கூட்டணியினர் மதுரை, நீலகிரி, திண்டுக்கல், பெரம்பலுார், கிருஷ்ணகிரி, நாகப்பட்டினம், தஞ்சாவூர், திருவாரூர், திருவண்ணாமலை, திருவள்ளூர், ராமநாதபுரம், திருச்சி என 12 மாவட்டங்களில் மாவட்ட ஊராட்சி தலைவர் பதவியை கைப்பற்றினர். சிவகங்கை மாவட்டத்தில் மாவட்ட ஊராட்சி தலைவர் மற்றும் துணை தலைவர் தேர்தல் ஒத்தி வைக்கப்பட்டது. இங்கு இரு கூட்டணியும் சம பலத்தில் இருக்கிறது.

புதுக்கோட்டை மாவட்டத்தில் தி.மு.க. கவுன்சிலர்கள் அதிகளவில் வெற்றி பெற்றிருந்தும் தலைவர் பதவியை அ.தி.மு.க. கைப்பற்றியுள்ளது. ஊராட்சி ஒன்றிய தலைவர் பதவிக்கான தேர்தலில் நேற்று இரவு வரை 285 ஊராட்சி ஒன்றியங்களில் முடிவு வெளியானது. இதில் 150 இடங்களில் அ.தி.மு.க. கூட்டணியும், 135 ஒன்றியங்களில் தி.மு.க. கூட்டணியும் தலைவர் பதவிகளை கைப்பற்றியுள்ளன. மாவட்ட ஊராட்சி வார்டு ஒன்றிய வார்டுகளில் தி.மு.க.வை விட அ.தி.மு.க.வுக்கு குறைந்த அளவிலான கவுன்சிலர்களே உள்ளனர். ஆனாலும் மாவட்ட ஊராட்சி தலைவர் மற்றும் ஒன்றிய தலைவர் பதவிகளை தி.மு.க.வை விட அதிகமாக அ.தி.மு.க. பிடித்துள்ளது.

போதிய உறுப்பினர்கள் வராதது, தேர்தல் அதிகாரி வராதது உட்பட பல்வேறு பிரச்னைகள் காரணமாக சில ஒன்றியங்களில் தலைவர் மற்றும் துணை தலைவர் பதவிகளுக்கான தேர்தல் ஒத்தி வைக்கப்பட்டுள்ளது. கோவை, கரூர் உட்பட பல மாவட்டங்களில் அனைத்து ஒன்றிய குழு தலைவர் பதவிகளையும் அ.தி.மு.க. கைப்பற்றி உள்ளது. நேற்று நடந்த மறைமுக தேர்தலை தொடர்ந்து பெரும்பாலான மாவட்டங்களில் ஊரக உள்ளாட்சி தேர்தல் முடிவுக்கு வந்தது.

Advertisement




வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை

We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X