சேலம் 8 வழி சாலை திட்டம்: பதிலளிக்க ஒரு வாரம் அவகாசம்| Dinamalar

சேலம் 8 வழி சாலை திட்டம்: பதிலளிக்க ஒரு வாரம் அவகாசம்

Updated : ஜூலை 29, 2020 | Added : ஜூலை 28, 2020 | கருத்துகள் (32)
Share
சேலம், 8 வழி சாலை, உச்ச நீதிமன்றம், அவகாசம்

புதுடில்லி: தமிழகத்தில், சென்னை - சேலம் இடையேயான, எட்டு வழி சாலை திட்டம் தொடர்பாக, கூடுதல் அறிக்கை தாக்கல் செய்வதற்கு, மத்திய சுற்றுச்சூழல், வனம் மற்றும் பருவநிலை மாறுபாடு அமைச்சகத்துக்கு, உச்ச நீதிமன்றம், ஒரு வாரம் அவகாசம் அளித்துள்ளது.

சென்னை - சேலம் இடையேயான, 277 கி.மீ., துார சாலையை, 10 ஆயிரம் கோடி ரூபாய் செலவில், எட்டு வழி சாலையாக மாற்றும் திட்டத்தை, மத்திய அரசு அறிவித்தது. இதற்காக, நிலம் கையகப்படுத்தும் அறிவிப்பாணையும் வெளியிடப்பட்டது. இந்த திட்டத்துக்கு, விவசாய நிலங்களை கையகப்படுத்துவதற்கு, விவசாயிகள் எதிர்ப்பு தெரிவித்தனர்.

பல்வேறு அரசியல் கட்சிகளும் போராட்டங்களில் ஈடுபட்டன. இந்த திட்டத்துக்கு நிலம் கையகப்படுத்தும் அறிவிப்புக்கு, சென்னை உயர் நீதிமன்றம், கடந்தாண்டு, ஏப்., 8ல் தடை விதித்தது. இதை எதிர்த்து, மத்திய அரசு, உச்ச நீதிமன்றத்தில் மேல்முறையீடு செய்துள்ளது. இந்த வழக்கு, நீதிபதிகள் அருண் மிஸ்ரா, பி.ஆர்.கவாய், கிருஷ்ண முராரி அமர்வு முன், நேற்று மீண்டும் விசாரணைக்கு வந்தது.

அப்போது, மத்திய அரசு சார்பில் கூறப்பட்டுள்ளதாவது: 'பாரத் மாலா பரியோஜனா' என்ற திட்டத்தின் கீழ், நாடு முழுதும், நெடுஞ்சாலைகள் மூலம் இணைக்க திட்டமிடப்பட்டுள்ளது. சென்னை - சேலம் நெடுஞ் சாலை திட்டத்துக்கு, சென்னை உயர் நீதிமன்றம் தடை விதித்து உள்ளது. இதனால், இந்த திட்டத்தை செயல்படுத்த முடியாத நிலை ஏற்பட்டு உள்ளது. சென்னை உயர் நீதிமன்றம் விதித்துள்ள தடைக்கு, தடை விதிக்க வேண்டும்.

இந்த வழக்கு தொடர்பாக, கூடுதல் தகவல்களை தாக்கல் செய்வதற்கு அவகாசம் அளிக்க வேண்டும். இவ்வாறு, மத்திய அரசு சார்பில் கூறப்பட்டுள்ளது.இதை ஏற்றுக் கொண்ட அமர்வு, ஒரு வாரம் அவகாசம் அளித்துள்ளது. வழக்கின் விசாரணை, ஆக., 6க்கு ஒத்தி வைக்கப் பட்டு உள்ளது.

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X