தமிழக சட்டசபை தேர்தல் குறித்து, டில்லியில் உள்ள, பா.ஜ., தலைவர்கள் ஆலோசனை நடத்தி வருகின்றனர். தேசிய தலைவர் ஜே.பி.நட்டா, பிரதமர் மோடி மற்றும் அமித் ஷாவிடம் தமிழக தேர்தல் தொடர்பாக ஆலோசனை நடத்தியுள்ளாராம்.

'தி.மு.க., குறைவான தொகுதிகளிலேயே வெற்றி பெற வேண்டும்; 100 தொகுதிகளை தாண்டக் கூடாது' என்பது தான், பா.ஜ.,வின் வியூகம் என்கின்றனர், ஆலோசனையில் ஈடுபட்டுள்ள சீனியர் தலைவர்கள்.இதற்காக, அதிரடி பிரசாரத்திற்கு ஏற்பாடுகள் நடைபெற்று வருகின்றன.

சமூக வலைத்தளங்களில், தி.மு.க.,விற்கு எதிராக, பா.ஜ., தீவிர பிரசாரம் செய்ய உள்ளது. தி.மு.க.,வின் கடவுள் மறுப்பு கொள்கையை எடுத்து வைத்தால், ஹிந்துக்களின் ஓட்டுகள் தங்களுக்கு கிடைக்கும் என, பா.ஜ., நம்புகிறது.

அடுத்து, தி.மு.க.,வின் தேர்தல் ஆலோசகர் பிரசாந்த் கிஷோர் பாண்டே என்ன செய்யப் போகிறார், அவருடைய திட்டம் என்ன என்கிற விபரங்கள், பா.ஜ.,விற்கு, 'லீக்' செய்யப்பட்டுவிட்டதாம். இந்த தேர்தல் முடிவில், தமிழகத்தில், பா.ஜ., தான் பிரதான எதிர்க்கட்சியாக இருக்கும் என, சீனியர் பா.ஜ., தலைவர்கள் சொல்லி வருகின்றனர்.