சார்ஜா: ஐதராபாத் அணிக்கு எதிரான ஐ.பி.எல்., லீக் போட்டியில் ஏமாற்றிய பெங்களூரு அணி 5 விக்கெட் வித்தியாசத்தில் தோல்வியடைந்தது.

எமிரேட்சில், 13வது ஐ.பி.எல்., சீசன் நடக்கிறது. சார்ஜாவில் நடந்த லீக் போட்டியில் பெங்களூரு, ஐதராபாத் அணிகள் மோதின. ஐதராபாத் அணியில் விஜய் சங்கர் நீக்கப்பட்டு விரிதிமன் சகா தேர்வானார். பெங்களூரு அணியில் ஸ்டைன், ஷிவம் துபேவுக்கு பதிலாக இசுரு உதானா, நவ்தீப் சைனி இடம் பிடித்தனர். 'டாஸ்' வென்ற ஐதராபாத் அணி கேப்டன் டேவிட் வார்னர் 'பீல்டிங்' தேர்வு செய்தார்.

பெங்களூரு அணிக்கு தேவ்தத் படிக்கல் (5), கேப்டன் விராத் கோஹ்லி (7) ஏமாற்றினர். ஜோஷ் பிலிப் (32), டிவிலியர்ஸ் (24), வாஷிங்டன் சுந்தர் (21) ஆறுதல் தர, 20 ஓவரில் 7 விக்கெட்டுக்கு 120 ரன்கள் எடுத்தது. ஐதராபாத் சார்பில் சந்தீப் சர்மா, ஹோல்டர் தலா 2 விக்கெட் வீழ்த்தினர்.
சுலப இலக்கை விரட்டிய ஐதராபாத் அணிக்கு விரிதிமன் சகா (39), மணிஷ் பாண்டே (26), ஹோல்டர் (26*) கைகொடுக்க, 14.1 ஓவரில் 5 விக்கெட்டுக்கு 121 ரன்கள் எடுத்து வெற்றி பெற்றது.