திருவாரூர்: அமெரிக்க அதிபர் தேர்தலில் வெற்றிப்பெற்று கமலா ஹாரிஸ் துணை அதிபராக உள்ளதை கொண்டாடும் விதமாக தமிழகத்தில் உள்ள அவரது சொந்த ஊர் மக்கள், பட்டாசு வெடித்து, இனிப்பு வழங்கி மகிழ்ச்சியை வெளிப்படுத்தினர்.

அமெரிக்க அதிபர் தேர்தலில் வெற்றிப்பெற்ற ஜனநாயக கட்சியின் கமலா ஹாரிஸ், துணை அதிபராக பொறுப்பேற்க உள்ளார். இதன்மூலம், அமெரிக்காவின் முதல் பெண் துணை அதிபர் என்னும் சிறப்பையும் இவர் பெற்றுள்ளார். இவரது வெற்றியை பல தரப்பினரும் கொண்டாடி வருகின்றனர். இந்தியாவை பூர்வீகமாக கொண்ட கமலா ஹாரிசின் வெற்றியை அவரது சொந்த ஊரான தமிழகத்தின் திருவாரூர் மாவட்டம் மன்னார்குடி அருகே உள்ள துளசேந்திரபுரம் கிராமத்தினரும் கமலாவின் வெற்றியை கொண்டாடி வருகின்றனர்.

துளசேந்திரபுரம் கிராம மக்கள், துணை அதிபராக கமலா ஹாரிஸ் வெற்றிப்பெற்றது கிராமத்திற்கு பெருமையளிப்பதாக வீட்டு வாசலில் கோலமிட்டு தங்கள் மகிழ்ச்சியை வெளிப்படுத்தினர். மேலும், பட்டாசு வெடித்தும், இனிப்பு வழங்கியும் கமலாவின் வெற்றியை கிராமத்தினர் கொண்டாடினர்.

வழிபாடு

அமெரிக்க துணை அதிபர் தேர்தலில் கமலாஹாரிஸ் வெற்றி பெற வேண்டி மன்னார்குடி அருகே அவரது குல தெய்வ கோவிலில் சிறப்பு வழிபாடு நடைபெற்றது குறிப்பிடத்தக்கது.