சென்னிமலை: ஈரோடு மாவட்டம் பெருந்துறையில், அரசு மருத்துவக் கல்லூரி செயல்படுகிறது. சாலை போக்குவரத்து மருத்துவ கல்லூரியாக செயல்பட்ட நிலையில், இரண்டு ஆண்டுகளுக்கு முன் அரசு மருத்துவ கல்லூரியாக மாற்றப்பட்டது. இங்கு தனியாரைப் போல், ஆண்டு கல்வி கட்டணம், மூன்று லட்சத்து, 86 ஆயிரம் ரூபாய் வசூலிக்கப்படுகிறது. அதே நேரம் மற்ற அரசு மருத்துவ கல்லூரியில், 13 ஆயிரத்து, 610 ரூபாய்தான் கட்டணம். அரசு மருத்துவ கல்லூரியாக மாற்றி, இரண்டு ஆண்டாகியும் கட்டணத்தை குறைக்கவில்லை. கொரோனா ஊரடங்கால் மூடப்பட்ட நிலையில், ஏழு மாதங்களுக்கு பிறகு, நேற்று கல்லூரி திறக்கப்பட்டது. பெற்றோர்களுடன் வந்த மாணவர்கள், கல்லூரி வளாகத்தில், திடீர் ஆர்ப்பாட்டத்தில் ஈடுபட்டனர். பெருந்துறை டி.எஸ்.பி., செல்வராஜ், போலீசார் பேச்சுவார்த்தை நடத்தினர். உடன்பாடு ஏற்படாத நிலையில், தாசில்தார் முத்துகிருஷ்ணன், கல்லூரி டீன் மணி பேசினர். ஜன.,15 வரை கல்வி கட்டணத்தை கட்ட நிர்பந்தமில்லை. அதன்பின் கட்டணத்தை குறைக்க, அரசுக்கு கோரிக்கை வைப்பது என உடன்பாடு ஏற்பட்டது. இதனால் போராட்டம் முடிவுக்கு வர, மாணவ, மாணவியர் கல்லூரிக்கு சென்றனர்.
தினமலர் டெலிகிராம் சேனலில் பார்க்கலாம் Click here to join
Telegram Channel for FREE
