மேச்சேரி: மேச்சேரி சந்தைக்கு, தட்டைப்பயிறு வரத்து அதிகரிப்பால், கொள்முதல் விலை சரிந்தது. சேலம் மாவட்டம், மேச்சேரி சுற்றுப்பகுதியில், விவசாயிகள் மானாவாரி பயிர்களில் ஒன்றான தட்டைப்பயிறை, அதிகளவில் சாகுபடி செய்வர். தற்போது, அறுவடை தொடங்கிய நிலையில், மேச்சேரி சந்தைக்கு, தட்டைப்பயிறு வரத்து அதிகரித்துள்ளது. நேற்று, 3 டன் வரை விற்பனைக்கு கொண்டுவந்தனர். இதனால், அதன் விலை, குவிண்டால், 5,000 ரூபாய்க்கு வியாபாரிகள் கொள்முதல் செய்தனர். ஒரு மாதத்துக்கு முன், வரத்து, 1 முதல், 1.5 டன் வரை மட்டும் இருந்த நிலையில், குவிண்டால், 5,700 ரூபாய்க்கு கொள்முதல் செய்தனர். தற்போது, வரத்து அதிகரிப்பால், நேற்று, கொள்முதல் விலை சரிந்ததாக வியாபாரிகள் கூறினர்.