அரூர்: அரூரில், மாணவியை கடத்திய தனியார் பள்ளி ஆசிரியரை, போக்சோவில், போலீசார் கைது செய்தனர். திண்டுக்கல் மாவட்டம், நிலக்கோட்டை அடுத்த சித்தர்கள் நத்தத்தை சேர்ந்தவர் சிவக்குமார், 36; இவர், தர்மபுரி மாவட்டம், அரூரிலுள்ள தனியார் பள்ளியில், ஆசிரியராக பணிபுரிந்து வந்தார். இவர், கடந்த நவ., 16ல், மதியம், 1:00 மணிக்கு, வீட்டிலிருந்து தோட்டத்துக்கு சென்ற, 17 வயது, பிளஸ் 2 மாணவியை, கடத்திச் சென்றுள்ளார். இது குறித்து மாணவியின் பெற்றோர் புகாரின்படி, அரூர் போலீசார், போக்சோவில் வழக்குப்பதிவு செய்து, விசாரித்து வந்தனர். இந்நிலையில், நேற்று ஈரோடு நடுப்பாளையத்தில், வாடகை வீட்டில் இருந்த, ஆசிரியர் சிவக்குமாரை, இன்ஸ்பெக்டர் லட்சுமி தலைமையிலான போலீசார், கைது செய்தனர்.