திருப்பூர்;கொரோனா ஊரடங்கு காலத்தில், தனித்திறனை வெளிப்படுத்தி, சிறந்த படைப்புகளை உருவாக்கிய நிப்ட்-டீ கல்லுாரி மாணவர்களுக்கு, நேற்று விருது வழங்கப்பட்டது.கொரோனா பரவலை தடுப்பதற்காக, கடந்த மார்ச் மாதம் முதல், பள்ளி, கல்லுாரிகள் மூடப்பட்டன. ஊரடங்கு காலத்திலும், திருப்பூர் முதலிபாளையம், 'நிப்ட்-டீ' ஆடை வடிவமைப்பு கல்லுாரி மாணவர்கள், ஏராளமான கலை நயம்மிக்க படைப்புகளை உருவாக்கினர்.சனா டெவலப்பர்ஸ் நிறுவனம் மற்றும் ஜூனியர் சேம்பர் இன்டர்நேஷனல் இணைந்து, கொரோனா காலத்தில் சிறந்த படைப்புகளை உருவாக்கிய மாணவர்களை தேர்வு செய்துள்ளது. அந்த மாணவர்களுக்கு, 'நிப்ட்-டீ' கல்லுாரியில் நேற்று நடந்த விழாவில், விருது வழங்கப்பட்டது.சிறப்பான ஓவியம் தீட்டிய, சஞ்சய்குமார், ஸ்வேதா, நிவேதா, பரமசிவம், வசந்த் ஆகியோருக்கு, ஏற்றுமதியாளர் சங்க தலைவர் ராஜா சண்முகம், 'நிப்ட்-டீ' கல்லுாரி தலைவர் மோகன், முன்னாள் தலைவர் முருகானந்தன் விருது வழங்கி பாராட்டினர். கல்லுாரி முதல்வர் பாலகிருஷ்ணன், முதன்மை டிசைனர் பூபதி விஜய் உட்பட பேராசிரியர்கள், மாணவர்கள் பங்கேற்றனர்.