உடுமலை:குடிமங்கலம் ஒன்றியத்தில், பள்ளிகளுக்கான கட்டமைப்பு வசதிகள் ஏற்படுத்தும் பணி நடக்கிறது. கல்வியாண்டுதோறும், அரசு பள்ளிகளுக்கு தேவையான அடிப்படை கட்டமைப்பு வசதிகள் குறித்து அனைவருக்கும் கல்வி இயக்ககத்தின் வாயிலாக பட்டியல் அனுப்பப்படும்.இதில், பராமரிப்பு மற்றும் புதுப்பிக்கும் பணிகள் அதிகமாக உள்ள பள்ளிகளுக்கு முதற்கட்டமாக நிதியுதவி வழங்கப்படுகிறது. குடிமங்கலம் ஒன்றியத்தில், கட்டமைப்பு பணிகளுக்கு, 11 பள்ளிகளுக்கு அனைவருக்கும் கல்வி இயக்ககத்தின் சார்பில் நிதியதவி வினியோகிக்கப்பட்டுள்ளது. பள்ளிகளில், புதிய வகுப்பறை, கழிப்பறை, சாய்தளம் அமைக்கும் கட்டமைப்பு பணிகள் துவங்கப்பட்டுள்ளன. பணிகளை, மாணவர்கள், பள்ளிக்கு வருவதற்குள் நிறைவு செய்வதற்கும் அறிவுறுத்தப்பட்டுள்ளது.