 இரவு முழுதும் சாலையில் படுத்து உறங்கிய முதல்வர் நாராயணசாமி, காலை 6 மணிக்கு தனது வீட்டிற்கு சென்று குளித்து விட்டு உடனடியாக போராட்டக் களத்திற்கு திரும்பினார்.போராட்டத்தில் பங்கேற்றவர்களுக்கு காலை டிபனாக இட்லி, பொங்கல், வடை, கேசரி பரிமாறப்பட்டது. மதிய உணவாக வெஜ் பிரியாணியும், சிக்கன் பிரியாணியும் வழங்கப்பட்டது. கோஷமிட்டு களைத்த தொண்டர்கள் ஆர்வத்துடன் பிரியாணியை பெற்று சாப்பிட்டனர். காலை உணவு முடிந்தவுடன் 10:30 மணியளவில், ஜெயமூர்த்தி எம்.எல்.ஏ., ஏற்பாட்டில் மசால் வடை, ஆம்லெட் வழங்கப்பட்டது. அரசு கொறாடா அனந்தராமன் ஏற்பாட்டில், போராட்டம் நடக்கும் இடத்திலேயே அடுப்பு பற்ற வைக்கப்பட்டு பஜ்ஜி, போண்டா, வடை சுடச்சுட தயார் செய்யப்பட்டது. மாலையில் அனைவருக்கும் வினியோகிக்கப்பட்டது. தொடர் தர்ணாவில் முதல்வர் நாராயணசாமியின் மகள் விஜயகுமாரி பங்கேற்றார். மகளிர் காங்., நிர்வாகிகள், தொண்டர்களுடன் 'கிரண்பேடியே திரும்பி செல்லுங்கள்' என்ற வாசகம் எழுதப்பட்ட பதாகைகளை ஏந்தியவாறு அவர் அமர்ந்திருந்தார். முதல்வர் அலுவலக சிறப்பு பணி அதிகாரி ராஜமாணிக்கம், முக்கியமான கோப்புகளை எடுத்துக் கொண்டு போராட்ட பந்தலுக்கு வந்தார். ஒவ்வொரு கோப்பையும் பொறுமையாக பார்த்து முதல்வர் நாராயணசாமி கையெழுத்திட்டார்.