சேலம்: கலை பண்பாட்டு துறை சார்பில், சேலம், அம்மாபேட்டை, செங்குந்தர் திருமண மண்டபத்தில், வள்ளி திருமண நாடகம், நேற்று நடந்தது. சேலம் நாடக நடிகர் சங்க செயலர் சவுண்டப்பன் தொடங்கிவைத்தார். சேலம் தெற்கு தொகுதி எம்.எல்.ஏ., சக்திவேல், வள்ளியின் தந்தை நம்பிராஜன் வேடத்தில் நடித்தார். அதில், வள்ளி திருமண நாடக வசனங்களை பேசிய அவர், திடீரென, தமிழக அரசின் சாதனைகளை விளக்கினார். நாடக இறுதியில், அ.தி.மு.க.,வுக்கு ஆதரவு கேட்டு, பிரசாரமாக முடித்துக்கொண்டார். இவர் பேசிய காட்சிகளை, வீடியோவாக பதிவு செய்த அ.தி.மு.க.,வினர், சமூக வலைதளங்களில் வெளியிட்டு, பிரசாரத்துக்கு பயன்படுத்தி வருகின்றனர்.