மும்பை: அகில இந்திய விவசாய சபை சார்பில் ஆயிரக்கணக்கான மஹாராஷ்டிர விவசாயிகள், வேளாண் சட்டங்களுக்கு எதிராக தலைநகர் மும்பை நோக்கி பேரணி சென்றுக் கொண்டிருக்கின்றனர்.

மத்திய அரசு கொண்டு வந்த 3 புதிய வேளாண் சட்டங்களுக்கு வட மாநிலங்களில் கடும் எதிர்ப்பு எழுந்துள்ளது. டில்லியை முற்றுகையிட்டு 2 மாதங்களுக்கும் மேலாக போராட்டம் நடத்தி வருகின்றனர். சுப்ரீம் கோர்ட் இச்சட்டங்களை நிறுத்தி வைத்து, பிரச்னைகளை ஆராய குழு அமைத்துள்ளது. மத்திய அரசு 18 மாதங்களுக்கு சட்டங்களை நிறுத்தி வைக்க தயார் என்று அறிவித்துள்ளது. ஆனால் விவசாயிகள் சட்டங்களை திரும்பப் பெற வேண்டும் என்பதில் உறுதியாக உள்ளனர்.

குடியரசு தினத்தன்று டில்லியில் பிரம்மாண்ட டிராக்டர் பேரணிக்கு அவர்கள் தயாராகி வருகின்றனர்.

இந்நிலையில் மஹாராஷ்டிராவைச் சேர்ந்த சிறு சிறு விவசாய சங்கங்கள், அகில இந்திய விவசாயிகள் சபை என்ற பெயரில் ஒன்றிணைந்து நாசிக்கிலிருந்து 180 கி.மீ தூரம் உள்ள மும்பைக்கு சனிக்கிழமை பேரணி தொடங்கினர். இன்று மாலைக்குள் அவர்கள் மும்பை வந்தடைவார்கள். பின்னர் ஆசாத் மைதானத்திலிருந்து நாளை பேரணி நடத்த உள்ளனர்.

இந்த பேரணியில் ஆளும் கட்சியில் அங்கும் வகிக்கும் தேசியவாத காங்., தலைவர் சரத்பவார் பங்கேற்பார் என கூறப்படுகிறது. முன்னதாக இவர் வேளாண் சட்டங்கள் குறித்து மத்திய அரசை எச்சரித்திருந்தார். போராடும் விவசாயிகளின் உணர்வுகளைப் புரிந்து கொள்ளத் தவறினால் மத்திய அரசு விளைவுகளை சந்திக்கும் என்று கூறியிருந்தார். விவசாயிகளின் பொறுமையை சோதிக்கக்கூடாது என்றார்.