திருப்பூர்:திருப்பூரில் நாளை ஸ்டாலின் பங்கேற்கும், 'உங்கள் தொகுதியில் ஸ்டாலின்' நிகழ்ச்சிக்கான ஏற்பாடுகள் மும்முரமாக நடக்கிறது.தமிழகம் முழுதும் தி.மு.க., தலைவர் ஸ்டாலின் 'உங்கள் தொகுதியில் ஸ்டாலின்' என்ற பெயரில் தேர்தல் பிரசாரத்தில் ஈடுபட்டு வருகிறார். நாளை (21ம் தேதி) திருப்பூர் - காங்கயம் ரோடு, பள்ளக்காட்டுபுதுாரில் திருப்பூர் வடக்கு மாவட்டம் மற்றும் மத்திய மாவட்டத்துக்கு உட்பட்ட நான்கு தொகுதி மக்களைச் சந்திக்கிறார். மக்கள் சந்திக்கும் பிரச்னைகள் குறித்து மனுக்கள் பெறவுள்ளார்.'இதில் பங்கேற்று பொதுமக்கள் தங்கள் பிரச்னைகளை எழுத்துபூர்வமாக ஸ்டாலினிடம் வழங்கலாம்; கட்சியினர் பெருமளவு திரண்டு வர வேண்டும்' என மாவட்ட செயலாளர் பத்மநாபன் மற்றும் செல்வராஜ் ஆகியோர் தெரிவித்துள்ளனர்.நாளை காலை 8:00 மணிக்கு நடைபெறும் இந்நிகழ்ச்சியில் கட்சியின் மாநில மற்றும் மாவட்ட நிர்வாகிகள், தொகுதிக்குட்பட்ட கட்சியினர் பங்கேற்கவுள்ளனர்.நிகழ்ச்சி நடைபெறவுள்ள இடத்தில் பிரமாண்டமான மேடையும், பார்வையாளர்கள் அமர பந்தலும் அமைக்கும் பணி மும்முரமாக நடந்து வருகிறது.