கொங்கு நாட்டு முதல்வர்- ஈஸ்வரனுக்கு புது பட்டம்: கோவையில் சுவர் விளம்பர சர்ச்சை| Dinamalar

'கொங்கு நாட்டு முதல்வர்'- ஈஸ்வரனுக்கு புது பட்டம்: கோவையில் சுவர் விளம்பர சர்ச்சை

Updated : ஜூலை 16, 2021 | Added : ஜூலை 16, 2021 | கருத்துகள் (22) | |
கோவை : 'கொங்கு நாட்டு முதல்வரே' என, கொ.ம.தே.க., கட்சி பொதுச் செயலாளர் ஈஸ்வரனுக்கு பட்டம் சூட்டி, கோவை மாவட்டத்தில் சுவர் விளம்பரம் செய்யப்பட்டுள்ளது.தமிழகத்தின் மேற்கு பகுதியான கொங்கு மண்டலத்தில், 10 லோக்சபா தொகுதிகள், 61 சட்டசபை தொகுதிகள் அடங்குகின்றன. அருகாமையில் உள்ள சில தொகுதிகளை சேர்த்து, 90 சட்டசபை தொகுதிகளுடன் 'கொங்கு நாடு' தோற்றுவித்து, தனி யூனியன் பிரதேசமாக
கொங்கு நாட்டு முதல்வரே, ஈஸ்வரன், சுவர் விளம்பரம், கொங்கு நாடு

கோவை : 'கொங்கு நாட்டு முதல்வரே' என, கொ.ம.தே.க., கட்சி பொதுச் செயலாளர் ஈஸ்வரனுக்கு பட்டம் சூட்டி, கோவை மாவட்டத்தில் சுவர் விளம்பரம் செய்யப்பட்டுள்ளது.

தமிழகத்தின் மேற்கு பகுதியான கொங்கு மண்டலத்தில், 10 லோக்சபா தொகுதிகள், 61 சட்டசபை தொகுதிகள் அடங்குகின்றன. அருகாமையில் உள்ள சில தொகுதிகளை சேர்த்து, 90 சட்டசபை தொகுதிகளுடன் 'கொங்கு நாடு' தோற்றுவித்து, தனி யூனியன் பிரதேசமாக அறிவிக்க, மத்திய அரசு திட்டமிட்டுள்ள தகவல், சில நாட்களுக்கு முன் பரவியது. ஒரு சாரார் எதிர்ப்பு தெரிவித்தாலும், கொங்கு மண்டலத்தை சேர்ந்தவர்களில் சிலர் நேரடியாகவும், சிலர் மறைமுகமாகவும் ஆதரவு தெரிவித்து வருகின்றனர்.

பா.ஜ., கூட்டங்களில், 'கொங்குநாடு' உருவாக்க ஆதரவு தெரிவித்து, தீர்மானங்கள் நிறைவேற்றப்படுகின்றன. தி.மு.க., கூட்டணியில் கொங்குநாடு மக்கள் தேசிய கட்சி அங்கம் வகிக்கிறது. இதன் பொது செயலாளரும், 'உதயசூரியன்' சின்னத்தில், திருச்செங்கோடு தொகுதியில் போட்டியிட்டு வென்ற ஈஸ்வரனுக்கு, 'கொங்குநாட்டு முதல்வரே' என, அக்கட்சியினர் பட்டம் சூட்டி, கோவை மாவட்டத்தில் சுவர் விளம்பரம் எழுதியுள்ளனர்.

சுதந்திர போராட்ட தியாகி தீரன் சின்னமலையை போற்றும் வகையில், சங்ககிரி ஓடாநிலையில் நடக்க உள்ள நினைவஞ்சலி நிகழ்ச்சிக்கு, சுவர் விளம்பரம் எழுதப்படுகிறது. கோவை மதுக்கரை ஒன்றியம், சீரபாளையம் அருகே போடிபாளையம் கிளை சார்பில், 'கொங்குநாட்டு முதல்வரே' என, ஈஸ்வரனுக்கு பட்டம் சூட்டியுள்ளனர்.


latest tamil news


சமீபத்தில், தமிழக சட்டசபை கூட்டத்தில், கவர்னர் உரையில், 'ஜெய்ஹிந்த்' என்கிற சொல் தவிர்க்கப்பட்டத்தை, ஈஸ்வரன் சுட்டிக்காட்டி, சர்ச்சையை ஏற்படுத்தினார். இப்போது, 'கொங்குநாடு முதல்வர்' கோஷத்தை, அக்கட்சியினர் துவக்கியுள்ளனர். இது, கூட்டணி கட்சியினர் இடையே சலசலப்பை ஏற்படுத்திஉள்ளது.



'தலைமை பார்த்துக் கொள்ளும்'


தி.மு.க., கோவை புறநகர் கிழக்கு மாவட்ட பொறுப்பாளர் சேனாதிபதியிடம் கேட்டபோது, ''கொ.ம.தே.க.,வினர் செய்துள்ள சுவர் விளம்பரம் தொடர்பாக, கட்சி தலைமைக்கு தகவல் தெரிவிப்போம். அவர்கள் பார்த்துக் கொள்வார்கள்,'' என்றார்.

மதுக்கரை ஒன்றிய கொ.ம.தே.க., செயலாளர் பாலுவிடம் கேட்ட போது, ''13 ஆண்டுகளாக, பல்வேறு அடைமொழி கொடுத்து, சுவர் விளம்பரம் எழுதுகிறோம்; பிளக்ஸ் பேனர் வைக்கிறோம்; போஸ்டர் ஒட்டுகிறோம். அந்தந்த பகுதி நிர்வாகிகள் விருப்பத்துக்கேற்ப எழுதுவர். 'கொங்குநாடு' பற்றிய பிரச்னையில், கட்சி பொது செயலாளர் கருத்தே, எங்கள் கருத்து,'' என்றார்.

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X