வேளாண் துறை முன்னாள் அமைச்சரும், கிணத்துக்கடவு எம்.எல். ஏ.,வுமான தாமோதரன் கூறியதாவது: பிரசித்தி பெற்ற கோவை வேளாண் பல்கலையை ஒட்டி, இந்த அலுவலகம் அமைந்திருப்பதால், விவசாயிகளுக்கு பல விதங்களிலும் வசதியாக உள்ளது. இயற்கை விவசாயம் செய்வோர், மேற்கு மாவட்டங்களில் தான் அதிக எண்ணிக்கையில் உள்ளனர்.ஏற்றுமதி வாய்ப்புகளை கருத்தில் கொண்டு பல விவசாயிகள் இயற்கை வேளாண்மைக்கு மாற திட்டமிட்டு வருகின்றனர். அவர்கள் எல்லோரும் சான்று பெறுவதற்காக சென்னைக்கு செல்ல வாய்ப்பில்லை. சான்றளிப்பு இயக்குனரகமும், வேளாண் பல்கலையும் அருகருகே இருப்பது தான் சிறப்பு. இதை இடம் மாற்றுவது வீண் வேலை. துறையில் பணியாற்றும் அலுவலர்களுக்கும் பெரும் சிரமம். தலைமையிடம் கோவையில் இருப்பதால் யாருக்கும் எந்த இடையூறும் இல்லை.எங்கு பயன், பயனாளிகள் அதிகம் இருக்கின்றனரோ அங்கு தான் அந்த அலுவலகம் இருக்க வேண்டும். இவ்வாறு, அவர் தெரிவித்தார்.

கீழ் பவானி பாசன விவசாயிகள் சங்க தலைவர் நல்லசாமி கூறுகையில், ''வேளாண் பல்கலை இருக்கும் இடத்தில் தான் விதைச்சான்றளிப்புத்துறை இருக்க வேண்டும். அந்த எண்ணத்தில் தான் அந்த அலுவலகம், கோவையில் அமைக்கப்பட்டது. சென்னை, செங்கல்பட்டு, திருவள்ளூர் எல்லாமே கான்கிரீட் காடுகளாக மாறி விட்டன. அங்கு வேளாண்மை என்பதே இல்லை. அத்தகைய சூழலில், கோவையில் இருக்கும் அலுவலகத்தை சென்னை கொண்டு செல்வது தவறான முடிவு. அமைச்சர் அறிவித்தபடி, இயக்குனரகத்தை சென்னைக்கு மாற்றினால், எந்த நோக்கத்துக்காக அந்த இயக்குனரகம் உருவாக்கப்பட்டதோ, அந்த நோக்கம் சிதைந்து விடும். பாதிக்கப்படுவது விவசாயமும், விவசாயிகளும் தான்,'' என்றார்.

கட்சி சார்பற்ற விவசாயிகள் சங்க மாநில பொதுச்செயலாளர் கந்தசாமி கூறுகையில், ''விதைச்சான்றளிப்பு மற்றும் அங்கக சான்றளிப்புத்துறை, கோவையில் இருப்பது தான் பல விதங்களிலும் சிறப்பு. கோவை சுற்றுப்பகுதியில் அதிக எண்ணிக்கையில் விவசாயிகள் அங்ககச்சான்று பெற்றுள்ளனர். அதை முறையாக கண்காணிக்க வேண்டும் எனில், அந்த அலுவலகம் இங்கே இருந்தாக வேண்டும். நிர்வாக நலன் என்று கூறி, சென்னைக்கு கொண்டு செல்வது சரியல்ல,'' என்றார்.