கபடவேட அமெரிக்காவின் ஆயுத பேரமும் கந்துவட்டி வியாபாரி சீனாவின் தந்திரமும்!

Updated : அக் 24, 2021 | Added : அக் 22, 2021 | கருத்துகள் (13)
Share
Advertisement
ஒரு நாட்டை அடிமை ஆக்க, ஆயுதத்தின் மூலம் வெற்றி பெறலாம் அல்லது கடனைக் கொடுத்து அடிமையாக்கி விடலாம். முன்னது அமெரிக்காவின் கொள்கை; பின்னது சீனாவின் கொள்கை.ஒரு நாடு, உள்நாட்டு கலவரங்கள், போராட்டங்களைச் சமாளிக்கவும், அண்டை நாட்டு ஆக்கிரமிப்பு போர்களை எதிர்கொள்ளவும், அமெரிக்காவிடம் ஆயுதம் வாங்கி, பிறகு அடிமையாகிறது. மற்றொரு நாடு, பொருளாதார முன்னேற்றத்திற்கு சீனாவிடம்
உரத்தசிந்தனை

ஒரு நாட்டை அடிமை ஆக்க, ஆயுதத்தின் மூலம் வெற்றி பெறலாம் அல்லது கடனைக் கொடுத்து அடிமையாக்கி விடலாம். முன்னது அமெரிக்காவின் கொள்கை; பின்னது சீனாவின் கொள்கை.

ஒரு நாடு, உள்நாட்டு கலவரங்கள், போராட்டங்களைச் சமாளிக்கவும், அண்டை நாட்டு ஆக்கிரமிப்பு போர்களை எதிர்கொள்ளவும், அமெரிக்காவிடம் ஆயுதம் வாங்கி, பிறகு அடிமையாகிறது. மற்றொரு நாடு, பொருளாதார முன்னேற்றத்திற்கு சீனாவிடம் கடன் வாங்கி, அடிமை ஆகிறது.இரண்டாம் உலகப் போருக்குப் பின், உலக சரித்திரத்தை கூர்ந்து நோக்கினால், பல நாட்டு போர்களிலும், போராட்டங்களிலும் மறைமுகமாகவோ, நேரடியாகவோ அமெரிக்கா ஈடுபட்டு, அந்தந்த நாடுகளுக்கு ஆயுத விற்பனை செய்திருப்பது புலப்படும்.

அந்த நாடுகளை அடிமையாக்கி, உயிர்ச் சேதம், பொருட்சேதம் ஏற்பட்டு அழிவு நிலைக்கு இட்டுச் சென்ற கதை கூட உண்டு.ஆப்கனை கைகழுவியது, புதிய விஷயமல்ல; இது போல், பல போர்களில் பின்வாங்கி உள்ளது.அமெரிக்கா, உலகில் உள்ள போராளிகளுக்கு, தீவிரவாதிகளுக்கு, கடத்தல்காரர்களுக்கு, சர்வதேச ஆயுத வியாபார மாபியாக்கள் மூலம் ஆயுத விற்பனை செய்யும். இந்த மாபியாக்கள், சீனா, வடகொரியா, ரஷ்ய நாடுகளுக்குக் கூட உதவுவர். உலகெங்கும் இவர்களுக்கு, 'நெட்வொர்க்' உண்டு.

நம் நாட்டில், ஜாதி வெறி கொண்ட அரசியல்வாதிகள் இவர்களுக்கு உதவுவர். அமெரிக்காவின், 56 சதவீத ஆயுத தொழிற்சாலைகள், தனியார் மயமாக்கப்பட்டவை. ராணுவ தளவாடங்கள், நவீன போர் விமானங்கள் தாங்கிய கப்பல்கள் ஏற்றுமதியின் மூலம், பொருளாதாரத்தில் பலமிக்க நாடாக அமெரிக்கா திகழ்கிறது. 'நாங்கள் ராணுவ தளவாடங்களை தயாரிப்பது, உலக அமைதிக்கும், சமாதானத்தை நிலை நாட்டவும்' என்று கூறுவது கபட நாடகமே!


விசேஷம் என்ன தெரியுமா...



அமெரிக்காவின் இந்த முக்கியவெளியுறவுக் கொள்கை, எந்த கட்சி செனட்டர்களுக்கும் தெரியாது என்பது தான். ஈரான், சவுதி அரேபியா, கம்போடியா, வியட்நாம், லாவோஸ் உட்பட, 167 நாடுகளுக்கு ஆயுதங்களை விற்பனை செய்கிறது அமெரிக்கா.


அமெரிக்காவின் இரண்டு முகங்கள்



* அரை நூற்றாண்டுக்கு முன், ஈரான் மன்னராக ஷா இருந்தபோது அந்நாட்டிற்கு, ஆயுத தளவாடங்கள் தாங்கிய விமானங்களையும், ஏவுகணைகளையும், தரையிலிருந்து தரை தாவும் ஏவுகணைகளையும், கண்டம் விட்டு கண்டம் பாயும் சூப்பர்சானிக் ஏவுகணைகளையும், வெடிகுண்டுகளையும், 12 ஆயிரம் கோடி ரூபாய்க்கு விற்றது. அப்போதைய டாலருக்கு எதிரான இந்திய ரூபாயின் மதிப்பு 8 ரூபாய்.எண்ணெய் வளத்தைக் காக்கவே இந்த ஏற்பாடு என அமெரிக்கா அப்போது கூறியது.

அந்நாட்டின் அதிபராக ரிச்சர்டு நிக்சன் இருந்தார்.பின், 1979ல் ஈரானில் ஷா ஆட்சி வீழ்ந்து, இஸ்லாமியப் புரட்சியாளர் அயதுல்லா கோமேனி ஆட்சியைக் கைப்பற்றினார். ஆட்சியாளர்கள் அமெரிக்காவின் எதிரியாகினர். இன்றைய ஆப்கனை விட்டு, அமெரிக்க ராணுவம் எப்படி ஓடியதோ அதே நிலை தான் அன்றைய ஈரானிலும் நடந்தது. அமெரிக்கா விட்டுச் சென்ற ராணுவ தளவாடங்களை வைத்து, ஈரான் புரட்சியாளர்கள் அமெரிக்காவை எதிர்த்தனர்.

* ஈரானிலிருந்து விரட்டப்பட்ட அமெரிக்கா, தன் தளவாடங்களை, 1980ல் ஈராக்குக்கு கொடுத்து, ஈரானுடன் போரிட வைத்தது; ஈராக் கதி என்ன ஆயிற்று என்பது எல்லாருக்கும் தெரியும்.

* பனாமா, தென் அமெரிக்காவின் நேச நாடு. இங்கு அமெரிக்கா, ராணுவ தளவாடங்களை அமைத்து அங்குள்ள அரசு படைக்கும் பயிற்சி கொடுத்தது. அங்கு ஏற்பட்ட புரட்சியில், ஜெனரல் இமானுவேல் நோரியோகா ஆட்சிக்கு வந்தவுடன், பனாமாவில் அமெரிக்கா விட்டுச் சென்ற ஆயுதத்துடன், அமெரிக்க படையோடு போரிட்டது; இதுவும் வரலாறு!

* பாகிஸ்தானில் ராணுவ முகாம் அமைத்துள்ள அமெரிக்கா, ஆப்கனில் ஆட்சி செய்த சோவியத் யூனியன் ஆதரவு அரசை எதிர்த்து, மறைமுகப் போரை துவக்கியது. இதற்காக, முஜாஹிதீன் புரட்சியாளர்களை உருவாக்கி, பாகிஸ்தானில் பயிற்சியும் கொடுத்தது. பாகிஸ்தானின் உளவு அமைப்பான ஐ.எஸ்.ஐ., யுடன் கூட்டாக, முஜாஹிதீனை ஆப்கனுக்கு அனுப்பி போரிட வைத்தது. பின்வாங்கிய சோவியத் யூனியன், ஆப்கனை விட்டு விலகியபோது, முஜாஹிதீன்கள், தலிபான்கள், அல்கொய்தா அமைப்பினர், ஆப்கனில் குடிகொண்டனர்; இனக் கலவரங்களை ஏற்படுத்தினர். உள்நாட்டு போர் ஏற்பட்டது.

முஜாஹிதீன்களுக்கும், தலிபான்களுக்கும் இடையே போர் மூண்டது. அமெரிக்கா பயிற்சி கொடுத்த முஜாஹிதீனின் ஒரு பிரிவினர், தலிபான் போராளிகள், அமெரிக்காவுக்கு எதிராக செயல்பட்டனர். ஆப்கனின் நிலையை என்னவென்று சொல்வது! அமெரிக்கா ஆயுத வாடிக்கையாளர்களைப் பற்றி ஓர் ஆய்வு செய்து வைத்துள்ளது. மிகவும் ஆபத்தான நாடுகள், மிதமான ஆபத்துள்ள நாடுகள், சாதாரண நாடுகள், ஆபத்தில்லாத நாடுகள் என பிரித்திருக்கிறது.

ஒரு நாட்டின் அரசியல் மற்றும் ஆட்சியின் ஸ்திரத்தன்மை, மக்களை நடத்தும் விதம், ஜாதிவெறி, ஊழல், பணத்துக்கு அடிமையாகும் அரசியல்வாதிகள், பகுத்தறிவற்ற மக்கள் ஆகியோரைத் தன் வசப்படுத்துவதில், அமெரிக்கா கில்லாடி. பணத்தைக் கொடுத்து அனைத்தையும் கொத்தடிமை ஆக்கி விடுகிறது.

சோவியத் யூனியன் பிளவுபட்ட பிறகு ரஷ்யாவிலிருந்து இடது சாரி சிந்தனையாளர்களுக்கு இது போல உதவிகள் கிடைப்பதில்லை; அவர்கள் மட்டும் சீனாவிடம் கையேந்தி நிற்கின்றனர். ஆபத்தான நாடுகள் என்றும் சில நாடுகளைக் குறிப்பெடுத்து வைத்திருக்கிறது அமெரிக்கா. ஈராக், லிபியா, ஏமன், சூடான், காங்கோ ஆகியவை இதைப் பொருத்தவரை ஆபத்தான நாடுகள்.ரிச்சர்ட் நிக்சன் தொடங்கி தற்போதைய பைடன் வரை, அனைத்து அதிபர்களும், ஆயுத சப்ளை செய்து தான், நாட்டின் பொருளாதாரத்தை வலுப்படுத்துகின்றனர்.

உலக அளவில் 35 சதவீத ஆயுத வியாபாரம் அமெரிக்கா செய்கிறது. பிரான்ஸ் 23, ஏமன் 15, சீனா 6, ரஷ்யா 3, மற்ற நாடுகள் 15 சதவீத ஆயுத வியாபாரம் செய்கின்றன.இப்போது, அணுசக்தி நீர்மூழ்கிக் கப்பல் வியாபாரம் தான், 'டாப் கியரில்' செல்கிறது.அமெரிக்கா, பிரான்ஸ், ரஷ்யா, இந்தியா, ஜப்பான், சீனாவிடம் இந்த கப்பல்கள் உள்ளன.

ஆஸ்திரேலியா சமீபத்தில், பிரான்சிடமிருந்து இந்த கப்பலை வாங்குவதற்காக ஒரு ஒப்பந்தம் செய்தது. அதற்குள் அமெரிக்கா முந்திக் கொண்டு, பனிரெண்டு கப்பல்களை, ஆஸ்திரேலியாவுக்கு விற்று விட்டது. இதனால் தான், சமீபத்தில் பிரான்ஸ் அதிபர் இமானுவேல் மேக்ரோன், அமெரிக்க அதிபர் ஜோ பைடனை திட்டித் தீர்த்தார்.இப்படி, ஆயுத வியாபாரத்தில் தன்னை மிஞ்ச ஆள் இருக்கக் கூடாது என்று நினைக்கும் அமெரிக்காவுக்கு, 'ஆப்பு' அடிக்கவே வடகொரியா கிளம்பியுள்ளது.


வடகொரியாவிடம் கொக்கரிப்பு

உலகில் உள்ள தீவிரவாத அமைப்பு அனைத்திற்கும், ஆயுத சப்ளை செய்வதில் வேகம் காட்டுகிறது வடகொரியா.வடகொரியாவின் ஆயுதத்தை வாங்கிய முதல் நாடு ஜிம்பாப்வே. 1980 முதல் இன்று வரை, ஆயுதக் கொள்முதல் செய்கிறது.

ஜிம்பாப்வே ஜனாதிபதி ராபர்ட் முகஹோவாவும், வட கொரிய அதிபர் சங்கும் இணைபிரியா நண்பர்கள்.லிபியா, ஏமன், உகாண்டா, மடகாஸ்கர், சிரியா, ஈராக், ஈரான், வியட்நாம் போன்ற நாடுகளுக்கு வடகொரியா ஆயுத சப்ளை செய்கிறது.எங்கெல்லாம் அமெரிக்கா ஆயுதங்களை விற்பனை செய்கிறதோ, அங்கெல்லாம் தீவிரவாதிகளுக்கு வடகொரியா ஆயுதங்களை விற்கும்.

வடகொரியாவின் கண்டம் விட்டு கண்டம் பாயும் ஏவுகணை 8,100 மைல்களை, 30 நிமிடங்களில் தாண்டும் வல்லமை கொண்டது. வடகொரிய தலைநகரிலிருந்து அமெரிக்காவை தாக்கும் வல்லமை கொண்டது. இதனால் தான், அமெரிக்கா இப்போது கொந்தளிக்கிறது. போறாத குறைக்கு, வடகொரியாவிடம் அணு ஆயுதங்களும் ஏராளமாக உள்ளன.எவ்வளவு தான் வடகொரியா தனிமைப்படுத்தப்பட்டாலும், அதன் சர்வதேச ஆயுத பேரம் அதைக் காப்பாற்றுகிறது.

இப்படி அமெரிக்கா, உலக நாடுகளை கொத்தடிமையாக்கி வைத்திருக்க, சீனாவோ தன் கந்துவட்டி வியாபாரத்தின் மூலம், மற்ற நாடுகளை தந்திரமாக கவர்கிறது. எப்படி?நாளை பார்ப்போம்!

டாக்டர் சு. அர்த்தநாரி
இதய ஊடுருவல் நிபுணர்


தொலைபேசி: 98843 53288

இ - மெயில்:prabhuraj.arthanaree@gmail.com

Advertisement




வாசகர் கருத்து (13)

  • புதியவை
  • பழையவை
  • அதிகம் விவாதிக்கப்பட்டவை
  • மிக மிக தரமானவை
  • மிக தரமானவை
  • தரமானவை
மலரின் மகள் - EDINBURGH,யுனைடெட் கிங்டம்
28-அக்-202119:07:10 IST Report Abuse
மலரின் மகள் எதோ யு டியூபில் சிலவற்றை பார்த்துவிட்டு கட்டுரை எழுதியிருப்பதாக தெரிகிறது. உலகின் சிறந்த அறிவாளிகள் அனைவரையும் அரவணைத்து செல்வது. மிகப்பெரிய அறிவார்ந்த இன்வென்ஷன் இன்னோவேஷன் மூலம் அனைத்து துறைகளையும் மேம்படுத்து உலகம் முழுதும் விற்பனை செய்கிறார்கள். அமெரிக்காவின் வளங்கள் மிகவும் பிரமாண்டம். கூகுள், அமெசான், டெஸ்லா எல்லோரும் என்ன ஆயுத விற்பனையா செய்கிறார்கள். ஜி.ஈ, சீமென்ஸ் கம்பனிகள் எல்லாம் என்ன ஆயுதமா தயாரிக்கிறார்கள். உணவு பால் உற்பத்திகளில் என்று அமெரிக்கா சோடை போனது? தொழிநுட்பங்கள் புதிய புதிய தொழில் நுட்பங்கள். ஜாதி வாரி கொடாக்கள் என்று பிற்படுத்தப்பட்டவர்கள் கல்வியறிவு பெறாதவர்கள் என்று பின்தங்கியவர்களுக்கு மட்டுமே வேலைவாய்ப்புக்கள் என்று நமது தேசம் போல அமெரிக்க செய்வதில்லை. அறிவாளிகள் இங்கு வேலைக்கும் அமைதியான நல்லவாழ்விற்கும் திறமைக்கும் மதிப்பிளப்பை செய்வதால் அவர்கள் அமெரிக்காவில் குடியேறினார்கள். அவர்கள் மூலம் தொழித்துறை முதல் கால்நடை, விவசாயம் கடல் சார் உணவு என்று அனைத்திலும் பிரமாண்டமாக செய்கிறார்கள். சாயமூட்டப்பட்ட ஜவுளி நெசவு செய்வதில்லை என்று வேண்டுமானால் சொல்லலாம். சமயோசிதமாக எதை எப்போது விட்டுவிட்டு வேறு நிலைக்கு மாறவேண்டுமோ அதற்கு தக்க சமயத்தில் மாறிவிடுகிறார்கள். யுடிலிடேரியன் என்னும் தியரியை உருவாக்கி வைத்திருக்கிறார்கள், நம் போல நீதி நெறி கிடையாது. லாபம் குறிக்கோள். எந்த ஒரு நிகழ்வு செயலிலும் லாபம் இருக்கவேண்டும். பயனில்லாத விவகாரங்களை கவனிப்பதில்லை. மீ மீ அண்ட் மீ என்பதே தாரக மந்திரம். பகைவனுக்கருள்வாய் என்றோ வாழும் உயரிகளுக்கெல்லாம் உணவிடவேண்டும் என்பதோ கிடையாது. மாதத்திற்குள் சண்டை போட்டு கொண்டவர்கள் அமெரிக்காவை அணுகி ஆயுதம் பெற்று கொண்டார்கள். ஒவ்வொருவருக்கும் தொடர்ந்து கூடுதல் சக்திவாய்ந்த ஆயுதங்கள் என்று கொடுத்து குரங்கு நடுநிலைமை வகித்து அப்பம் பங்கு போட்டு கொடுத்த கதையை முழுதும் அறிந்தவர்கள். அந்த குரங்கிற்கே பாடம் சொல்லித்தந்து இப்படி செய்யவேண்டும் செய்தால் நன்கு அப்பம் முழுதும் நீயே பெறலாம் என்று பொத்தவர்கள். டாலர் வலிமை கூடி கொண்டே போவது எதனால் ஆயுதங்களாலா. பன்முகத்தன்மை கொண்டவர்கள். சிலர் இப்படியும் வேறு சிலர் அப்படியும் பேசுவார்கள், மீண்டும் அவர்கள் மாற்றி பேசுவார்கள். சுயலாபம் என்பதற்கு எப்படியும் பேசலாம் என்பதே? ராஜாக்கள் தங்களின் மக்களை கட்டுப்படுத்தகவும் தங்களுக்கு பிரச்சினைகள் வந்துவிடாமலிருக்கவும், அவர்களை தாக்கி காலி செய்து வேறொருவர் பதவிக்கு வந்துவிடாமல் இருப்பதற்காகவும் அமெரிக்காவுடன் இணக்கமாக இருந்து அவர்களின் சர்வதேச உறவை பெற்று கொண்டு மிகப்பெரிய பணம் தருகிறார்கள் ஆயுதம் பெறுகிறோம் என்ற வியாபார கணக்கில். ஒருவகையில் லஞ்சம் தான். பொறுக்காகவோ அல்லது வேறு தேசங்களை அடிமை படுத்துவதற்காகவோ வா வாங்கி குவிக்கிறார்கள் ஆயுதங்களை. பணமாக கொடுத்தல் லஞ்சம். அதே நேரம் ஒரு காரியத்தை செய்து முடித்து கொடுப்பதற்கு ஒரு விதியை சாதகமாக்கி தருவதற்கு, ஒப்பந்தங்களை முன்கூட்டியே தீர்மானிப்பதற்கு லஞ்சம் என்பதை பணமாக கொடுத்தல் பிரச்சினை, அதற்கு பதியலாக அவர்கள் செய்யும் வியாபாரங்களை, செய்யவில்லை என்றால் செய்யவைத்து அதை மிக அதிக விலைக்கு வாங்கி அவர்களுக்கு அதீத லாபம் என்றவகையில் சட்டபூர்வமாக லஞ்சப்பணத்தை தருவதே. உலகிலேயே அமெரிக்காவிடமிருந்து அதிக ஆயுதங்களை கொள்முதல் அதுவும் மிகவும் சக்திவாய்ந்த ஆயுதங்களை கொழுமுதல் செய்கிறது ஒரு தேசம் அந்த தேசம் இஸ்ரேலுடன் இப்போது உடன் படுக்கை செய்து கொண்டிருக்கிறது. எந்த தேசத்துடனும் போரில் வெற்றி கொள்ளவில்லை. அபப்டி என்றா வாங்கிய ஆயுதங்கள் எதற்காக. புள்ளி விவரங்களை வைத்து கட்டுரைகளை எழுதினால் பாராட்டலாம். உங்களின் மனதின் எண்ணமாகத்தான் இதை கொள்ளமுடியும் தவிர, உண்மையாக அல்ல. ராணுவத்திற்கு பயிற்சிக்கு என்று அமெரிக்காவால் வெளிநாடுகளில் அவர்கள் ராணுவத்தை முகாமிடவைத்து இருப்பது மிகப்பெரிய பணத்தை லவட்டி கொள்வதற்கு தான் அவர்களின் பட்ஜெட்டிலிருந்தே. அமெரிக்க ஆப்கானிஸ்தானியர்களுக்கு பாகிஸ்தான் தளத்தில் மூன்று லட்சம் பேருக்கு ராணுவ பயிற்சி அதி நவீன பயிற்சி அளித்ததாக கணக்கு எழுதி அதிகாரிகள் ராணுவமட்டத்தில் அடித்து விட்டார்கள் பெரும் கொள்ளையை என்று தானே சொல்கிறார்கள். வெறும் இருபதாயிரம் பேருக்கு மட்டுமே ராணுவ பயிற்சி எனோ தானோ என்று தந்திருக்கிறார்கள். கணக்கு எழுதப்பட்டது மூன்று லட்சம் ராணுவ வீரர்களுக்கு என்று. வெறும் அறுபதாயிரம் தாலிபான்களை பயிற்சி பெற்ற மூன்று லட்சம் ஆப்கான் அரசுப்படையால் வெல்லமுடியாதா என்ன. எங்கே போனார்கள் அவர்கள்.
Rate this:
Cancel
GANESUN - Delhi,இந்தியா
23-அக்-202123:23:36 IST Report Abuse
GANESUN அஜிரமானமானவன் சோடா குடிக்கிறான்,
Rate this:
Cancel
23-அக்-202122:18:53 IST Report Abuse
அப்புசாமி இவ்வளவும் தெரியும். ஆனாலும் சீனாவிலிருந்து பொருள் இறக்குமதியும் அமெரிகாவிலிருந்து ஆயுத இறக்குமதியும், ஆத்மநிர்பரா கூப்பாடும் குறையாது
Rate this:
Barakat Ali - Medan,இந்தோனேசியா
24-அக்-202109:04:35 IST Report Abuse
Barakat Aliநினைச்ச உடனே மேக் இன் இந்தியா திட்டம் மூலமா ஆயுதம் தயாரிச்சுட முடியுமா? என்ன படிச்சிருக்கே ?...
Rate this:
கிச்சாமி - மங்கலம்,இந்தியா
31-அக்-202100:40:34 IST Report Abuse
கிச்சாமிசரியான எதிர்க்கேள்வி கேட்டா பதில் சொல்லத்தெரியாத அளவுக்கு...?...
Rate this:
Cancel

உங்கள் கருத்தைப் பதிவு செய்ய

(Press Ctrl+g   to toggle between English and Tamil)
Login :
New to Dinamalar ?
கருத்து விதிமுறை

We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X