இந்த கிராமத்தை அடுத்த ஆண்டு டிசம்பர் 8 வரை தத்தெடுக்கிறோம். மாதந்தோறும் டாக்டர், நர்ஸ் இந்த கிராமத்துக்கு வந்து மருத்துவ முகாம் நடத்துவர். இங்குள்ள, 60 குடும்பங்களை சேர்ந்த மக்கள், ராணுவ மருத்துவமனையில் இலவச பரிசோதனை செய்து கொள்ளலாம். இங்குள்ள மக்களின் தேவைகளை நிறைவேற்ற தயாராக இருக்கிறோம்.மீட்புப் பணியில் ஈடுபட்ட தமிழக காவல் துறை, தீயணைப்பு படையினர், மருத்துவக்குழு, மின் வாரியம், வெலிங்டன் ராணுவ மருத்துவமனை, வெலிங்டன் ராணுவ மையம்; வெலிங்டன் ராணுவ கல்லுாரியில் உள்ள அனைவருக்கும் நன்றி. முதல்வர் ஸ்டாலின் மற்றும் தமிழக அரசுக்கும் நன்றி. இவ்வாறு, அவர் பேசினார்.

நிகழ்ச்சியில், 'உங்களது வேலைக்கு எங்கள் அங்கீகாரம்' என்ற ராணுவத்தின் பதக்கம், மெட்ராஸ் ரெஜிமென்ட் சென்டர் கமாண்டன்ட் ராஜேஷ்வர் சிங், நீலகிரி கலெக்டர் அம்ரித், நீலகிரி எஸ்.பி., ஆசிஷ் ராவத் ஆகியோருக்கு வழங்கப்பட்டது.தீயணைப்பு அதிகாரி, மருத்துவ குழுவினர், ராணுவ மருத்துவ குழுவினர் உட்பட பலருக்கும் நன்றி சான்றிதழ்கள் மற்றும் பரிசுகள் வழங்கப்பட்டன. விபத்து ஏற்பட்ட இடத்தை ராணுவ அதிகாரிகள் பார்வையிட்ட பின், மக்களுக்கு போர்வைகள், சோலார் எமர்ஜென்சி விளக்குகள் மற்றும் உணவு பொருட்கள் வழங்கப்பட்டன.

வெலிங்டன் நாகேஷ் சதுக்கம், நஞ்சப்பா சத்திரம் பகுதிகளில் நடந்த நன்றி நிகழ்ச்சிகளில், தென் பிராந்திய ராணுவ தளபதி அருண், ராணுவ அதிகாரிகள் மற்றும் வீரர்கள் முன்பு ஹிந்தியிலும், மருத்துவ குழுவினர் மற்றும் கலெக்டர் உள்ளிட்ட அதிகாரிகள் முன் ஆங்கிலத்திலும், பொது மக்கள் முன் தமிழிலும் பேசி அசத்தினர்.

நஞ்சப்பாசத்திரத்தில் விபத்து நடந்த போது, கிருஷ்ணசாமி, சந்திரகுமார் ஆகியோர் விபத்து குறித்து உடனடியாக தீயணைப்பு துறை, போலீசாருக்கு தகவல் கொடுத்தனர். இவர்களை பாராட்டிய தளபதி அருண், தலா 5,000 ரூபாய் ரொக்கம் வழங்கினார். பின், அவர்களிடம் சம்பளம் குறித்து கேட்டறிந்து, பாராட்டு தெரிவித்தார்.