தஞ்சாவூர் மாவட்டம், கும்பகோணத்தை சேர்ந்த ரமேஷ்: பட்டு நெசவு தான் எங்களோட பூர்வீக தொழில். ஆரம்பத்துல பட்டுப்புடவை தறி நெய்ஞ்கிட்டு இருந்தேன்.ஆடுதுறை இயற்கை மருத்துவ சங்கத்துல இயற்கை உணவு பயிற்சி வாயிலாக, உடம்புல இருக்குற கழிவுகள் நீக்குறது குறித்த, மூன்று நாள் பயிற்சியில் பங்கேற்றே; அதை பின்பற்றவும் ஆரம்பித்தேன். காலையில் தேங்காய், வாழைப்பழம், பேரீச்சம் பழம், மதியம் சிறிது சாப்பாடு, இரவு பழங்கள்ன்னு எளிய உணவுகளை எடுத்துக் கொண்டேன். உடம்பில் இருக்கும் கழிவுகள் நீங்கி உடல் ஆரோக்கியமாக மாறியது. அதை என்னால் உணர முடிந்தது.இயற்கை உணவு தயாரிக்கிற பயிற்சியும் எடுத்துக் கொண்டேன். அடுப்பில்லாம இயற்கையா, 60 வகை உணவுகள் வரை செய்யலாம். சுரைக்காய் சாலட், வெண் பூசணிக்காய் கூட்டு, சுவையூட்டிய பாகற்காய், வெள்ளரிக்காய், புடலங்காய் கட்லெட், பல நாட்டுக் காய்கறிகள் ஒண்ணா சேர்த்து சாலட், மாப்பிள்ளை சம்பா அரிசியில் இனிப்பு அவல், எலுமிச்சை சாறு கலந்த கார அவல் என பட்டியல் நீளும்.அடுப்பில்லா உணவு, சிறு தானிய உணவு செய்வதை என் மனைவிக்கும் கற்றுக் கொடுத்தேன். இப்ப பல விதமான நிகழ்ச்சிகளுக்கு, எங்களை சமைக்க கூப்பிடுகின்றனர். அடுப்பில்லா உணவு, சிறுதானியம், பாரம்பரிய அரிசியில் செய்யும் உணவுகளுக்கு மட்டுமே முக்கியத்துவம் கொடுக்கிறோம். பாரம்பரிய அரிசியில் மாப்பிள்ளை சாம்பா, கறுங்குறுவை ரெண்டையும் அதிகம் பயன்படுத்துறோம்.தேங்காய்ப் பாலை எடுத்து, அதில் அவல் போட்டு ஊற வைப்பேன். 10 நிமிடங்களுக்கு பின் அதில் நாட்டு சர்க்கரை சேர்த்தால், தேங்காய்ப் பால் அவல் தயார். கறிவேப்பிலை, தேங்காய், தேவையான அளவு ஏலக்காய், இஞ்சி, கொத்தமல்லி தழையை சேர்த்து தண்ணீர் ஊற்றி, மிக்சியில் அரைத்தால், கறிவேப்பிலை கீர் தயாராகி விடும்.வாழைக்காயை சின்ன சின்னதாக நறுக்கிக் கொள்ள வேண்டும்.எலுமிச்சை சாறு, உப்பு, மஞ்சள் மூன்றையும் தேவையான அளவு கலந்து அதில் நறுக்கிய வாழைக்காயை போட்டு, 25 நிமிடம் ஊற வைக்க வேண்டும்.பின், நிலக்கடலை பொடி, சீரக துாள், மிளகு துாள், துருவிய தேங்காய் துாளை சேர்த்து கிளறி சாப்பிட்டால், 'அடுப்பில்லாமல் செய்த உணவா இது...' என எல்லாரும் கேட்பர்.வீட்டிற்கு வரும் விருந்தாளிகளுக்கு, ஆச்சரியமான சுவையில், ஆரோக்கியமான உணவு வகைகளைச் செய்து பரிமாறி மகிழ்விக்கலாம்.

சுலபமா லாபம் சம்பாதிக்க...

காஞ்சிபுரம் மாவட்டத்தைச் சேர்ந்த விவசாயி காந்தி: என் வயது, ௬௨. சின்ன வயதில் இருந்தே மீன் வளர்ப்புன்னாலே ஓர் ஆர்வம்.சும்மா இருக்கிற நேரங்களில் ஏரிகள், கிணறுகளில் மீன் பிடிப்பேன். அப்புறம் அப்படியே படிச்சு வேலைக்கு போயிட்டேன்.
வேலை செய்யும் போதே, ௨ ஏக்கர் நிலத்தை வாங்கினேன். விவசாயம் செய்தபடி, கூடுதல் வருமானத்துக்கு மீன் வளர்ப்புல இறங்கலாம்ன்னு முடிவு செய்து, ௨௦௧௨ம் வருஷம் இறங்கினேன்.
காஞ்சிபுரம் மாவட்ட வேளாண் பொறியியல் துறை வாயிலாக மானியத்துல இலவசமாகவே மீன் குட்டையை அமைத்தேன்.

அவர்களே மானியத்துல மீன் குஞ்சுகளை வாங்கி கொடுத்தனர். குளத்தில் விட்ட சிறிது நாட்களிலேயே மீன்களின் செதில்களில் புழு விழுந்திடுச்சு.
மீன் வளர்ப்புக்கு ஆர்வம், பயிற்சி மட்டும் இருந்தால் போதாது; அனுபவம் இருந்தா தான் ஜெயிக்க முடியும் என புரிந்தது. அதன்பின் ஒவ்வொரு விஷயத்தையும் நுணுக்கமாக ஆராய்ந்தேன். எங்கே தப்பு நடக்குது, ஏன் நடக்குது என யோசித்து, சரி செய்தேன்.
வாங்கிட்டு வர்ற மீன் குஞ்சுகளை , நாற்றங்கால் மீன் குளத்தில், 40 நாட்கள் வளர்த்து தான் பெரிய மீன் குளத்தில் விடுவேன்.

கோதுமை தவிடு, அரிசி மாவு, வீணான காய்கறிகள், மீன் தீவனம் போன்றவற்றை உணவா தர்றேன். தண்ணியோட நிறத்தை பச்சை நிறத்தில் பராமரிக்கணும்..
குளத்தில் விட்ட 4 மாதத்தில் ஒரு மீன் 300 - 500 கிராம் அளவுக்கு வளர்ந்திடும்.குளத்தில், ௨,௦௦௦ - ௨,௨௦௦ குஞ்சுகளை விடுவேன். இந்த அளவு அதிகம் தான். ஆனால், அதற்கேற்ற மாதிரி தீவனம், பராமரிப்பு, ஆக்சிஜன் அளவை பராமரித்து வருகிறேன்.
தவளை, பாம்பு சாப்பிட்டது போக, ௨,௦௦௦ குஞ்சுகள் விற்பனைக்கு தேறும். மொத்தம் ௧௧௫ நாட்களில் இருந்து மீன் அறுவடை ஆரம்பிக்கும். அப்படி
ஆண்டுக்கு மூணு அறுவடை.
வாரம் ஒருமுறை 200 கிலோ வீதம் 4 வாரங்களுக்கு 800 கிலோ மீன் கிடைக்கும். 1 கிலோ மீன் 150- 200 ரூபாய்க்கு விலை போகும். குறைந்தபட்சம் ௧௫௦ ரூபாய் என வைத்தாலும், ௧
லட்சத்து, ௨௦ ஆயிரம் ரூபாய் வருமானம் கிடைக்கும். செலவு, 55 ஆயிரம் ரூபாய் போக, ஒரு அறுவடைக்கு ௬௫ ஆயிரம் ரூபாய் லாபம் கிடைக்கும். ஆண்டுக்கு இது மாதிரி ௩ அறுவடை எடுப்போம்.
புதிதாக மீன் வளர்ப்பில் இறங்குபவர்களுக்கு முதல் இரண்டு ஆண்டுகள் கஷ்டமாக தான் இருக்கும். பழகிடுச்சுன்னா, ரொம்ப சுலபமா லாபம் சம்பாதிக்கலாம்.