கந்தன்,ஆறுமுகம்,சக்திபாலன்,சண்முகம்,சரவணன்,சுப்பிரமணியன்,கார்த்திகேயன்,தண்டபாணி என்று நாம் வணங்கும் முருகப்பெருமானைப்பற்றி நமக்கு தெரிந்தது சில பெயர்கள்தான் ஆனால் அவருக்கு 125ற்கும் மேற்பட்ட பெயர்கள் உள்ளன அவரது வரலாற்றைச் சொல்லும் கந்த புராணத்தை படித்தால் அந்தப் பெயர்களைத் தெரிந்து கொள்ளலாம்.

அதில் சில பெயர்களையும் அதற்கான காரணத்தையும் தேவர் மண்டப துாண்களில் பொறித்துள்ளனர்.இது நாள் வரை மீதமான விபூதி,குங்குமத்தை கொட்டும் இடமாக ,சும்மாயிருந்த அந்த துாண்கள் இப்போது முருகனின் பல்வேறு பெயர் பேசும் கற்சிற்பங்களாக அல்ல பொற்சிற்பங்களாகியுள்ளன.

கங்கை நதிக்கு ஒப்பான சரவணப் பொய்கையில் வளர்ந்தவராதலால் காங்கேய மூர்த்தி என்றும்,சூரபத்மன் வம்சத்தில் வந்த தாரகாரன் என்ற அரக்கனை வதம் செய்தவர் என்பதால் தாரகாரமூர்த்தி என்றும்,சூரபத்மனை வதம் செய்ய தேவர்கள் ஒன்றிணைந்து முருகனை தலைவராக தேர்ந்து எடுத்த போது இந்திரனே தலைவராக இருக்கட்டும் நான் அவருக்கு சேனாதிபதியாக இருந்து வெற்றியை ஈட்டித்தருகிறேன் என்றாதனால் சேனான்யன் என்றும்,சூரபத்மனின் வதத்தின் போது வீரபாகு உள்ளீட்ட சேனைத் தலைவர்களுக்கு தலைவனாக இருந்தவர் என்பதால் தேவசேனாதிபதி என்றும்,முருகப் பெருமானுக்கு இந்திரன் பரிசாக வழங்கியது ஒரு மயில் ,சூரபத்மனை வதம் செய்தபிறகு அவனது விருப்பத்தின் பேரில் சூரபத்மனை மயிலாக மாற்றி அதனையே தனது வாகனமாகவும் வைத்துக் கொண்டவர் இப்படி மயிலோடு நெருக்கமான முருகனை மயிலின் மற்றொரு பெயரான சிகி என்ற பெயரைக் கொண்டு சிகிவாகணன் என்றும்,சிவனின் நெற்றிக்கண்ணில் இருந்து வெளிப்பட்ட அக்னியை தாங்கியவர் என்பதால் அக்னி ஜாதாயன் என்றும்,சூரியனின் வெப்பத்திற்கும் மேலான சக்தி கொண்டு அசுரர்களை அழித்தவர் என்பதால் செளரபேயன் என்றும் அவருக்கு பல பெயர்கள் உள்ளன.

அந்தப் பெயருக்கு உள்ள முருகன் எப்படி இருப்பார் என்பதை கந்த புராணத்தின் துணை கொண்டு சிற்பி நேர்த்தியாக வடித்துள்ளார் வெறும் சிற்பமாக இருக்கக்கூடாது என்பதற்காக அந்த சிற்பத்தின் தன்மை குறித்து கல்வெட்டாகவும் பொறித்துள்ளனர் ஆகவேதான் இது கற்சிற்பங்கள் அல்ல பேசும் பொற்சிற்பங்கள்.

-எல்.முருகராஜ்