இப்படி பொம்மைகளின் ரசனைகள் ஒவ்வொருவருக்கும் மாறிக்கொண்டே இருக்கும். அதனால் தான் தங்களது கைப்பை, வீட்டு அலங்காரம், நவராத்திரி விழா, திருமண விழா என எல்லா விழாக்களிலும் பொம்மைகள் முக்கிய இடம் வகிக்கின்றன. இதை நன்றாக புரிந்துள்ளார் சரண்யா, 34.திருப்பூர் கருவம்பாளையத்தில் வசித்து வரும் இவர் 'நீனி க்ராசெட்' என்ற பெயரில் கடந்த 5 ஆண்டுகளாக காட்டன் நுாலில் கைப்பின்னல் பொம்மை தயாரிப்பு ஈடுபட்டு வருகிறார். கை விரல்கள் மூலம் மாயஜாலங்களை செய்து வர்ண ஜாலங்களில் மிளிரும் அலங்கார பொருட்களையும் அற்புதமாக உருவாக்கிக்கொண்டிருக்கிறார்.
மேஜை அலங்கார விரிப்புகள், குழந்தைகள் விரும்பும் டெடிபியர் பொம்மைகள், ஹேண்ட் பேக், பர்ஸ், வீட்டு வாசலில் தொங்க விடப்படும் தோரணங்கள், தொப்பிகள், வண்ண கூடைகள், பிறந்த குழந்தைகளுக்கான ஆடைகள், கை, கால் உறை, செல்போன் பவுச், மாலை, கீ செயின் என எண்ணிலடங்கா அலங்கார படைப்புகளை உருவாக்கியுள்ளார். இவர் செய்யும் பொம்மைகள் கண்களை ஈர்க்கின்றன.அவர் நம்மிடம் பகிர்ந்தவை:எனக்கு சிறு வயதில் இருந்தே, கைவினை பொருட்களை தயாரிப்பதில் ஆர்வம் உண்டு. அந்த ஆர்வம் தான் நுால் மூலம் அலங்கார பொருட்களை விதவிதமாக தயார் செய்ய துாண்டியது. நீளமான ஊசியில் கொக்கி இருக்கும், அதில் காட்டன் நுாலை கோர்த்தபடி பொருட்களை வடிவமைக்க வேண்டும்.காட்டன் நுால்கள் மும்பையில் வாங்குகிறேன்.

பல வருடங்கள் ஆனாலும், நிறம் மங்காமல் பொலிவுடன் காட்சி அளிக்கும். அடிப்படை நுணுக்கங்களை கற்றுக்கொண்டால், அதன் பிறகு நம்முடைய கிரியேட்டிவிட்டி தான். அதை கொண்டு புதிது புதிதாக, லேட்டஸ்ட் மாடல் பொம்மைகளை உருவாக்கி அசத்தலாம்.எத்தனை முறை அடித்தாலும் தாங்கும் மரப்பாச்சி பொம்மை முதல் களிமண், பஞ்சு, பிளாஸ்டிக், பேசினால் திருப்பி பேசும் பொம்மைகள் வரை எத்தனையோ ரக பொம்மைகளை பார்த்துவிட்டோம். கையால் தயாரிக்கும் பொம்மைகளுக்கு எப்போதும் எங்கேயும் வரவேற்பு இருக்கும்.பிளாஸ்டிக்கை தவிர்க்க விரும்புகிறவர்கள், நுாலால் ஆன பொம்மைகளை வாங்கிச்செல்கின்றனர்.
ஆரம்பத்தில் குடும்ப உறவினர்கள், நண்பர்களுக்கு மட்டும் செய்து கொடுத்தேன். தற்போது பலரும் தங்கள் விரும்பத்துக்கேற்ப கலைப்பொருட்கள் கேட்கத்துவங்கியுள்ளனர். ஒரு பொம்மை செய்ய ஒருநாள் நிச்சயம் எடுக்கும். 4 இன்ச் முதல் செய்கிறேன்.விலைக்கு தக்கபடி இதில் கூடுதல் வேலைப்பாடுகளை செய்யலாம். பத்து வயதிற்கு மேற்பட்டவருக்கு பயிற்சி அளித்தும் வருகிறேன். வருமானத்திற்கு மட்டுமின்றி பல்வேறு சிக்கல்களை எதிர்கொண்டு மன உளைச்சலுக்கு ஆளாகும் பெண்களின் மனதுக்கு இதமளிக்கும் மருந்தாகவும் இந்த கலை இருக்கும்.