சென்னை : 'நீலகிரி மாவட்டம் கூடலுாரில், காங்கிரஸ் முன்னாள் தலைவர் ராகுல், நாளை நடைபயணம் மேற்கொள்கிறார்' என, தமிழக காங்கிரஸ் தலைவர் அழகிரி தெரிவித்துள்ளார்.
அவரது அறிக்கை: இந்திய தேசிய ஒற்றுமைக்காக, தமிழகத்தில் ராகுல் துவங்கிய முதல் கட்ட நடைபயணம், 59 கி.மீ., துாரம் கன்னியாகுமரி மாவட்டத்திலும்; 450 கி.மீ., துாரம் கேரள மாநிலத்திலும் நடந்தது.வரும், 29ம் தேதி நீலகிரி மாவட்டம், கூடலுாருக்கு வருகிறார் ராகுல். அன்று மாலை 4:00 மணிக்கு கூடலுார் ஆமைக்குளம் பகுதியில் அமைந்துள்ள அரசு கலை அறிவியல் கல்லுாரிக்கு அருகில் உள்ள கோழி பாலத்திலிருந்து நடைபயணத்தை தொடர்கிறார்.
அப்பகுதியில் மட்டும், 6 கி.மீ., பயணம் மேற்கொள்ளும் அவர், மாலை 6:00 மணிக்கு ஏற்பாடு செய்யப்பட்டுள்ள பொதுக்கூட்டத்தில் பேசுகிறார். அவரது நடைபயணத்தின் வாயிலாக, கூடலுார் பகுதியில் உள்ள படுகர் இன மக்களையும், அங்கே வாழ்கிற மொழி சிறுபான்மை மக்களையும், நேரடியாக சந்திக்கிற வாய்ப்பு ராகுலுக்கு கிட்டியிருக்கிறது. இவ்வாறு அழகிரி கூறியுள்ளார்.
உங்களுக்காக சிபாரிசு செய்யப்படுகிறது
