ஸ்ரீநகர்: கன்னியாகுமரியில் இருந்து காஷ்மீர் வரையிலான காங்கிரஸ் முன்னாள் தலைவர் ராகுலின் பாரத ஒற்றுமை யாத்திரை முடிவுக்கு வந்துள்ளது. தனிப்பட்ட முறையில் ராகுல் மீதான கண்ணோட்டம் மாறியது, கட்சித் தொண்டர்கள் இடையே உற்சாகம் ஏற்பட்டுள்ளது என நேர்மறையான பலன்கள் கிடைத்தாலும், கட்சியில் குழப்பம், சர்ச்சைகள், கோஷ்டி மோதல் நீடிப்பதால், இந்த நடைபயணம், 2024 லோக்சபா தேர்தலுக்கு உதவுமா என்ற சந்தேகத்தை எழுப்பியுள்ளது.

காங்கிரஸ் முன்னாள் தலைவர் ராகுல், கன்னியாகுமரியில் இருந்து காஷ்மீர் வரையிலான பாரத ஒற்றுமை யாத்திரையில் ஈடுபட்டார். கன்னியாகுமரியில் கடந்தாண்டு செப்., 7ம் தேதி துவங்கிய இந்த பாதயாத்திரை, காஷ்மீரில் நேற்று நிறைவு பெற்றது. கடந்த 140 நாட்களில், 12 மாநிலங்கள், இரண்டு யூனியன் பிரதேசங்களில், 4,000 கி.மீ., துாரத்துக்கு இந்த நடைபயணம் நடந்தது.

இந்த பயணத்தின்போது, 12 பொதுக் கூட்டங்கள், 100 தெருமுனை சந்திப்புகள், 13 பத்திரிகையாளர் சந்திப்புகளில் ராகுல் பங்கேற்றார். மேலும், 275 நடை உரையாடல், 100 இடங்களில் அமர்வு கலந்துரையாடல்களிலும் அவர் ஈடுபட்டார்.

புதிய நம்பிக்கை

இந்த பயணத்துக்கு இடையே, கட்சியின் தலைவர் தேர்தல் நடந்து, மூத்த தலைவர் மல்லிகார்ஜுன கார்கே தலைவரானார். ராகுலின் பயணத்தின்போது, கார்கே உட்பட கட்சியின் மூத்த தலைவர்கள் பங்கேற்றனர். முன்னாள் தலைவரும், ராகுலின் தாயுமான சோனியா, இரண்டு இடங்களில் நடை பயணத்தில் பங்கேற்றார். பொதுச் செயலரும், சகோதரியுமான பிரியங்கா பல்வேறு மாநிலங்களில் ராகுலுடன் நடை பயணத்தில் பங்கேற்றார்.

தேசிய மாநாட்டு கட்சி, சிவசேனா உட்பட சில தோழமை கட்சிகளின் தலைவர்களும், ராகுலுடன் பங்கேற்று ஆதரவு தெரிவித்தனர். இந்த நடைபயணம் நேற்றுடன் முடிவுக்கு வந்துள்ள நிலையில், இந்தப் பயணத்தால் ராகுலுக்கும், கட்சிக்கும் என்ன பலன் கிடைத்துள்ளது என்ற கேள்வி எழுந்துள்ளது.

இது குறித்து அரசியல் நோக்கர்கள் கூறியுள்ளதாவது: இந்தப் பயணத்தால் கிடைத்துள்ள பலன், ராகுல் மீதான கண்ணோட்டம் சற்று மாறியுள்ளது தான். பகுதி நேர அரசியல்வாதியாக, பொறுப்புகளை ஏற்க மறுக்கும் தலைவராக இருந்த அவர், தற்போது சற்று தீவிர அரசியல்வாதியாக மாறியுள்ளார். நாடு முழுதும் நடந்த இந்த பயணத்தால், கட்சித் தொண்டர்களிடையே புதிய நம்பிக்கை ஏற்பட்டு உள்ளது.

அதே நேரத்தில் இந்த பயணம் கட்சியில் உள்ள குழப்பங்கள், கோஷ்டி மோதல்களை வெளிப்படுத்தியதுடன், புதிய சர்ச்சைகளையும் ஏற்படுத்திஉள்ளது. மஹாராஷ்டிராவில் நடந்த பயணத்தின்போது, ஹிந்துத்துவா தலைவர் வீர் சாவர்க்கர் குறித்து ராகுல் கூறிய கருத்துகள் சர்ச்சையை ஏற்படுத்தின. கூட்டணி கட்சியான சிவசேனாவும் எதிர்ப்பு தெரிவித்தது. அதுபோல், ராஜஸ்தானுக்கு நுழைவதற்கு முன், அந்த மாநில முதல்வர் அசோக் கெலாட், மூத்த தலைவர் சச்சின் பைலட் இடையே மீண்டும் பனிப்போர் ஏற்பட்டது.

ஆதிக்கம் தொடர்கிறது

வட மாநிலங்களில், ராகுல் 'டி - சர்ட்' மட்டும் அணிந்து நடைபயணத்தில் ஈடுபட்டது விவாதப் பொருளானது. சில இடங்களில் கட்சி நிர்வாகிகள், தொண்டர்கள் சிலர் உயிரிழந்ததும் சர்ச்சையை ஏற்படுத்தியது.

ஜம்முவுக்குள் நுழைவதற்கு முன், ராணுவம் நடத்திய துல்லிய தாக்குதல் குறித்து மூத்த தலைவர் திக்விஜய் சிங் கூறிய கருத்து சர்ச்சையை ஏற்படுத்தியது. ஆனால், இதற்கு ராகுல் எதிர்ப்பு தெரிவித்தார்.

ஒட்டு மொத்தத்தில் இந்த நடைபயணம் ராகுலுக்கு தனிப்பட்ட முறையில் பெரிய வெற்றியாகும். அதே நேரத்தில் இந்தப் பயணம் லோக்சபா தேர்தலில் கட்சிக்கு அதிக ஓட்டுகள் பெறுவதற்கான வாய்ப்பை ஏற்படுத்துமா என்பது சந்தேகமே.

கட்சியின் தலைவராக மல்லிகார்ஜுன கார்கே இருந்தாலும், சோனியா குடும்பத்தின் ஆதிக்கம் தொடர்கிறது என்பதையும் இந்தப் பயணம் உணர்த்தியுள்ளது. பல மாநில கட்சித் தலைவர்களுக்கு அழைப்பு விடுக்கப்பட்டும், அவர்கள் பாதயாத்திரையில் பங்கேற்காமல் புறக்கணித்தனர். இதனால், 2024 லோக்சபா தேர்தலில், காங்கிரஸ் தலைமையில் எதிர்க்கட்சிகள் கூட்டணி அமையுமா என்பது கேள்விக்குறியே. இவ்வாறு அவர்கள் கூறினர்.

ஸ்ரீநகர்: கன்னியாகுமரியில் இருந்து காஷ்மீர் வரையிலான காங்கிரஸ் முன்னாள் தலைவர் ராகுலின் பாரத ஒற்றுமை யாத்திரை முடிவுக்கு வந்துள்ளது. தனிப்பட்ட முறையில் ராகுல் மீதான கண்ணோட்டம்

திருப்போரூர் திருவிழா - இது சொந்தவீடு வாங்கும் பெருவிழா!

கனவு இல்லம் வாங்குவது என்பது ஒவ்வொருவரின் வாழ்நாள் ஆசை. அந்த ஆசை நிறைவேற, மக்கள் கடினமாக உழைத்து பணத்தைச்சேமித்து வைப்பார்கள்.