சென்னை: 'கட்சியின் கட்டுப்பாட்டை மீறி செயல்பட்ட, சென்னை மேற்கு மாவட்ட நிர்வாகிகள் ஐந்து பேர், அனைத்து பொறுப்புகளில் இருந்தும் நீக்கப்படுகின்றனர்' என, தமிழக பா.ஜ., தலைவர் அண்ணாமலை தெரிவித்துள்ளார்.
அவரது அறிக்கை: சென்னை மேற்கு மாவட்டத்தில் ஜன., 29ல் மாவட்ட செயற்குழு கூட்டம் நடந்தது. அப்போது, மாவட்ட துணை தலைவர் பிரகாஷ், மாநில நெசவாளர் பிரிவு செயலர் ரமேஷ், பொதுக்குழு உறுப்பினர் சசிதரன், பொருளாதார பிரிவு மாவட்ட தலைவர் புருஷோத்தமன், செயற்குழு உறுப்பினர் சென்னை சிவா ஆகியோர், கட்சியின் கட்டுப்பாட்டை மீறி, கட்சிக்கு களங்கம் விளைவிக்கும் செயல்களில் ஈடுபட்டு உள்ளனர்.
இதனால், அவர்கள் கட்சியின் அனைத்து பொறுப்புகளில் இருந்தும் தற்காலிகமாக நீக்கப்படுகின்றனர். கட்சியின் நிர்வாகிகள், தொண்டர்கள், அவர்களிடம் கட்சி சார்பாக எவ்வித தொடர்பும் வைத்து கொள்ள வேண்டாம். இவ்வாறு, அதில் கூறப்பட்டுள்ளது.
