காஞ்சிபுரம் : காஞ்சிபுரம் மாவட்டத்தில், அரசு கட்டடங்கள், நுாலகம், ஊராட்சி அலுவலகம் போன்ற பல வகையான அரசு கட்டடங்கள் திறக்கப்படாமல், மக்கள் பயன்பாட்டுக்கும் வராமல் உள்ளன. இதனால், மக்கள் வரிப்பணம் கோடிக்கணக்கில் வீணடிக்கப்படுகிறது.

காஞ்சிபுரம் மாவட்டத்தில் கட்டப்படும் அரசு அலுவலகங்கள், பள்ளி, கழிப்பறை கட்டடம், உடற்பயிற்சி கூடம் போன்றவை பல்வேறு அரசு நிதியில் கட்டப்படுகின்றன.

சில கட்டடங்கள் நேரடி அரசு நிதியாகவும், ஊரக வளர்ச்சித்துறை நிதியிலும், எம்.எல்.ஏ., நிதி என பல வகையான நிதி ஆதாரம் வாயிலாக கட்டப்படுகின்றன.

அவ்வாறு கட்டப்படும் பல அரசு அலுவலகங்கள் உடனடியாக திறக்கப்பட்டு, மக்கள் பயன்பாட்டுக்கு கொண்டு வர வேண்டும்.

விஷ ஜந்துக்கள்

ஆனால், அரசியல் காரணங்களாலும், அதிகாரிகளின் மெத்தன போக்கு காரணமாக பல அலுவலகங்கள் கட்டி முடிக்கப்பட்டு பல மாதங்களாக அப்படியே கிடக்கின்றன.

காஞ்சிபுரம் மாவட்டத்தில், லட்சக்கணக்கான ரூபாய் மதிப்பில் கட்டப்பட்ட அரசு அலுவலகங்கள் பல, பாம்புகளும், விஷ ஜந்துக்களும் உலாவும் இடமாக மாறி வருகிறது.

அரசு அலுவலகங்களுக்கு புதிதாக கட்டடம் கட்ட, பொதுப்பணித்துறை, ஊரக வளர்ச்சித்துறை போன்ற துறைகள் முன்கூட்டியே கருத்துருக்கள் தயாரித்து, மதிப்பீடு செய்து, டெண்டர் விடப்பட்டு அதன்பிறகு கட்டுமான பணிகள் நடக்க பல மாதங்களாகின்றன.

அவ்வாறு பல கட்ட போராட்டத்துக்கு பிறகு கட்டப்படும் அரசு அலுவலகங்களை, திறப்பதில் கூட பல மாதங்கள் இழுத்தடிப்பது பொதுமக்களிடையேயும், அரசு அதிகாரிகளிடையேயும் அதிருப்தியை ஏற்படுத்துகிறது.

காஞ்சிபுரத்தில் ஏகாம்பரநாதர் சன்னிதி தெருவில் உள்ள நேரு கிளை நுாலக கட்டடம் 30 லட்சம் ரூபாய் மதிப்பிலும், அண்ணா நினைவு நுாற்றாண்டு பூங்காவில் 25 லட்சத்தில் உடற்பயிற்சி கூடமும், காஞ்சிபுரம் தி.மு.க., - எம்.எல்.ஏ., எழிலரசன் தொகுதி மேம்பாட்டு நிதியில் கட்டப்பட்டது.

அதிர்ச்சி

இந்த இரு கட்டடங்களும் கட்டி முடிக்கப்பட்டு பல மாதங்களாக அப்படியே கிடக்கிறது. இந்த இரு கட்டடங்களும் எப்போது திறக்கப்படும் என, மாநகராட்சி மற்றும் நுாலகத்துறை அதிகாரிகளுக்கே தகவல் தெரியாமல் உள்ளது.

காணொலி காட்சி வாயிலாக பல அரசு அலுவலகங்களும், விடுதி, மேம்பாலம் போன்றவற்றை முதல்வர் ஸ்டாலின் திறந்து வருகிறார்.

அவ்வாறு, காஞ்சிபுரம் மாவட்டத்தில் திறக்கப்படாத அரசு கட்டங்களை எளிமையாக திறக்க வாய்ப்புகள் இருந்தும், பல அரசு கட்டடங்கள் அப்படியே வீணாக கிடக்கின்றன.

காஞ்சிபுரம் மாவட்டத்தில், 20க்கும் மேற்பட்ட அரசு அலுவலகங்கள் வாடகை கட்டடத்தில் இயங்குகின்றன. போதிய இட வசதி இன்றி இயங்கும் அரசு அலுவலகங்கள் பல, சொந்த கட்டடம் இல்லாமல் தவிக்கின்றன.

ஆனால், புதிதாக கட்டி முடிக்கப்பட்டும், திறப்பு விழா கூட நடத்தாமல், பல அரசு அலுவலகங்கள் உள்ளது, பொதுமக்களுக்கு அதிர்ச்சியை ஏற்படுத்தியுள்ளது.

காஞ்சிபுரம் : காஞ்சிபுரம் மாவட்டத்தில், அரசு கட்டடங்கள், நுாலகம், ஊராட்சி அலுவலகம் போன்ற பல வகையான அரசு கட்டடங்கள் திறக்கப்படாமல், மக்கள் பயன்பாட்டுக்கும் வராமல் உள்ளன. இதனால்,