துணைமேயர் மீது புகார் அளிக்க வந்த கர்ப்பிணியை அலைக்கழித்த கொடுமை| Dinamalar

சம்பவம் செய்தி

தமிழ்நாடு

துணைமேயர் மீது புகார் அளிக்க வந்த கர்ப்பிணியை அலைக்கழித்த கொடுமை

Added : மார் 11, 2014

திருச்சி: அ.தி.மு.க., துணைமேயர் ஆசிக்மீரா மீது புகார் தெரிவிக்க நேற்றும் கமிஷனர் அலுவலகத்துக்கு வந்த எட்டு மாத கர்ப்பிணியை, "கமிஷனர் இல்லை' எனக்கூறி புகாரை வாங்காமல் போலீஸார் திருப்பி அனுப்பியதால், அப்பெண் ஏமாற்றத்துடன் சென்றார்.
மறைந்த அ.தி.மு.க., அமைச்சர் மரியம்பிச்சை மகன் ஆசிக் மீரா, திருச்சி மாநகராட்சி துணைமேயராக உள்ளார். திருச்சி, சங்கிலியாண்டபுரம், மணல்வாரித்துறை ரோடு பகுதியை சேர்ந்த ரஞ்ஜித் சிங் ராணா மகள் துர்கா (என்ற) துர்கேஸ்வரி, 28.
இவர் நேற்று முன்தினம் திருச்சி போலீஸ் கமிஷனர் அலுவலகத்துக்கு துணைமேயர் ஆசிக்மீரா மீது புகார் அளிக்க வந்தார்.
அவரது புகார் மனுவில் தெரிவித்திருப்பதாவது:
நானும், துணைமேயர் ஆசிக்மீராவும் காதலித்து திருமணம் செய்து கொண்டோம். அவரால் மூன்று முறை கருத்தரித்தேன். அவர் நிர்ப்பந்தத்தால் கருவை கலைத்தேன். திடீரென அவரது அத்தை மைமூன்நிஷா மகள் சாஜிதாபேகத்தை இரண்டாவது திருமணம் செய்து கொண்டார்.
இதுபற்றி கேட்டபோது, என்னை சமாதானம் செய்தார். மீண்டும் கருவுற்று தற்போது, எட்டு மாதமாக உள்ளேன். தனது மாமியார் பேச்சைக்கேட்டு, கருவை கலைக்கும்படி மிரட்டுகிறார். எனவே, என் கணவர், துணைமேயர் ஆசிக்மீரா, அவரது மாமியார் மைமூன்நிஷா, அவரது சகாக்கள் பாபு, சரவணன், உமர் ஆகியார் மீது நடவடிக்கை எடுக்க வேண்டும். இவ்வாறு மனுவில் தெரிவித்திருந்தார்.
மாநகர போலீஸ் கமிஷனர் சைலஷ்குமார் யாதவ் இல்லாததால் அவர், பொன்மலை போலீஸ் ஸ்டேஷனுக்கு புகார் அளிக்கச் சென்றார். போலீஸார் புகாரை வாங்கவில்லை.
நேற்று காலை, 10.30 மணிக்கு கமிஷனர் அலுவலகத்துக்கு வந்தார். நீண்ட நேரம் கழித்து அவரை அழைத்த போலீஸார், ""கமிஷனர் இன்றும் இல்லை. பொன்மலை போலீஸில் புகாரை கொடுத்து ரசீது பெற்றுக்கொள்ளுங்கள்,'' எனக்கூறி அனுப்பினர்.
இதனால் நொந்துபோன துர்கேஸ்வரி கூறுகையில், ""கருவுற்று எட்டு மாதம் ஆகியதால், என்னால் தனியாக எங்கும் செல்ல முடியவில்லை. கமிஷனர் அலுவலகத்துக்கு ஆட்டோவில் வந்து, மாடி ஏறிச்செல்லவும் முடியவில்லை. நீண்டநேரம் காக்க வைத்து என்னை திருப்பி அனுப்பினர். வாந்தி வருவதுபோல இருந்ததால் பொன்மலை போலீஸ் ஸ்டேஷனக்குச் செல்லாமல் வீட்டுக்கு சென்றேன்,'' என்றார்.

Advertisement


We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X