நடிகரும், இயக்குனருமான மனோபாலா காலமானார்.

தமிழ் திரைப்பட இயக்குனரும், நடிகருமான மனோபாலா (69), கல்லீரல் பிரச்னைக்காக சிகிச்சை பெற்ற நிலையில், இன்று (மே 3) அவரது உயிர் பிரிந்தது.

இயக்குனர், தயாரிப்பாளர், நடிகர் என பல்வேறு பரிமாணங்களில் பயணித்த மனோபாலா 20க்கும் மேற்பட்ட படங்களை இயக்கி உள்ளார்.

200க்கும் மேற்பட்ட படங்களில் காமெடி மற்றும் குணச்சித்ர வேடங்களில் நடித்துள்ளார். டிவி சீரியலும் எடுத்துள்ளார். 3 படங்கள் தயாரித்தும் உள்ளார். டப்பிங் ஆர்ட்டிஸ்ட்டாகவும் இருந்துள்ளார்.

பாரதிராஜாவிடம் உதவி இயக்குனராக இருந்த மனோபாலா ஆகாய கங்கை மூலம் இயக்குனர் ஆனார். சிவாஜி, ரஜினி, விஜயகாந்த், பிரபு, கார்த்தி உட்பட பல முன்னணி நடிகர்களை வைத்து படம் இயக்கி உள்ளார்.

சிவாஜி, ரஜினி துவங்கி இன்றைய இளம் தலைமுறை நடிகர்கள் வரை பல நடிகர்களுடன் இணைந்தும் நடித்துள்ளார்.

இவரின் மறைவு திரை ரசிகர்கள் இடையே கடும் சோகத்தையும், அதிர்ச்சியையும் ஏற்படுத்தி உள்ளது.

மனோபாலாவின் உடல், சென்னை, சாலிகிராமத்தில் உள்ள அவரது இல்லத்தில் அஞ்சலிக்காக வைக்கப்பட்டுள்ளது. இறுதிச்சடங்கு நாளை (மே 4) காலை 10.30 மணியளவில் நடக்கிறது.