''வெளிநாடு பயணத்துக்கு தயாராயிண்டு இருக்கார் ஓய்...'' என வந்ததுமே, மேட்டருக்கு வந்தார், குப்பண்ணா.''யாருங்க அது...'' எனக் கேட்டார், அந்தோணிசாமி.''அ.தி.மு.க., முன்னாள் அமைச்சர் வைகைச் செல்வன், இலக்கியவாதியுமா இருக்காரோல்லியோ... வெளிநாடு வாழ் தமிழர்கள் சங்கம் சார்புல, இவரை நிறைய கூட்டங்களுக்கு அழைக்கறா ஓய்...''டில்லி தமிழ் சங்கம் சார்பா வர, 25ம் தேதி நடக்கற பொங்கல் விழா கருத்தரங்குல கலந்துக்கறார்... ''அப்பறமா, மலேஷியா, சிங்கப்பூர்ல நடக்கற இலக்கிய விழாக்கள்ல கலந்துக்கறவர், ஏப்ரல் மாசம், கம்போடியாவுல, அங்கோர் தமிழ் சங்கம் நடத்தற, உலகத் திருக்குறள் மாநாட்டுலயும் கலந்துக்கறார் ஓய்...'' என்றார், குப்பண்ணா.''புரோக்கர்கள் ராஜ்யம் தான் பா நடக்குது...'' என, அடுத்த மேட்டருக்கு அடி போட்டார், அன்வர்பாய்.''எந்தத் துறையில வே...'' எனக் கேட்டார், அண்ணாச்சி.''கோவை சரக போக்குவரத்து இணை கமிஷனர் அலுவலகம், கோவை தெற்கு ஆர்.டி.ஓ., அலுவலகங்கள்ல, புரோக்கர்கள் வச்சது தான், சட்டமா இருக்கு... 'டிரைவிங் லைசென்ஸ்' வாகன பதிவுன்னு வர்றவங்களை மட்டும் உள்ளே விடுற வாட்ச்மேன்கள், பெற்றோர், உறவினர்களை கூட அனுமதிக்க மாட்டேங்கிறாங்க பா...''ஆனா, புரோக்கர்கள் வந்தா மட்டும் ராஜ மரியாதையோட அனுப்பிடுறாங்க... புரோக்கர்கள், அலுவலகத்துக்குள்ளயே இருந்து, அதிகாரிகளுக்கு எடுபிடி வேலைகளை செஞ்சு குடுத்து, காரியங்களை முடிச்சுக்குறாங்க பா...''அலுவலக ஜெனரேட்டரை ரிப்பேர் பார்க்கிறது, பாத்ரூம்ல குழாய் மாத்துறதுன்னு எல்லா வேலைகளையும் புரோக்கர்களே செஞ்சு குடுத்துடுறாங்க... ''முறைகேடுகளை தடுக்க, என்ன தான், 'ஆன்லைன்' முறைகளை கொண்டு வந்தாலும், இவங்க ஆட்டத்தை குறைக்கவே முடியலை பா...'' என்றார், அன்வர்பாய்.''ஆன்மிக அரசியல்ல தீவிரமா இறங்கிட்டாரு வே...'' என, டீயை உறிஞ்சியபடியே, கடைசி தகவலுக்கு வந்தார், அண்ணாச்சி.''ரஜினி தான் இன்னும் கட்சியே ஆரம்பிக்கலையே பா...'' என, வியப்பு தெரிவித்தார், அன்வர்பாய்.''முழுசா கேளும்... சென்னையை ஒட்டியிருக்கிற பால் பண்ணை தொகுதியில, எதிர்க்கட்சி, எம்.எல்.ஏ.,வா இருக்கிறவரை தான் சொல்லுதேன்... அவர், கட்சியிலயும், மாவட்ட அளவுல பொறுப்புல இருக்காரு வே...''சமீபகாலமா இவர் மேல, தலைமைக்கு நிறைய புகார்கள் போய், தலைமையும், இவர் மேல கோவத்துல இருக்காம்... ''இதனால, பயந்து போன, எம்.எல்.ஏ., தன் அலுவலகத்துல, உட்கார்ற சேருக்கு கீழே, மந்திரிச்ச ரெண்டு தகடுகளை வச்சுருக்காரு வே...''தினமும், பூஜை, புனஸ்காரம்னு முடிச்சிட்டு தான், வெளியிலயே கிளம்புதாரு... ''கையிலயும், மந்திரிச்ச சிகப்பு கயிறு சுத்தியிருக்காரு வே... 'தலைவர், அவர் மகன் மனசுல இடம் பிடிக்க தான், இப்படி ஆன்மிக பாதைக்கு போயிட்டார்'னு சிலரும், 'அவருக்கு நிறைய திருஷ்டி இருக்கு... அதான் இப்படி இருக்கார்'னு ஒரு தரப்பும் பேசிட்டு இருக்கு வே...'' என, முடித்தார் அண்ணாச்சி.ஒலித்த மொபைல் போனை எடுத்த குப்பண்ணா, ''சுதர்சனம்... உம்ம தம்பி வெளிநாடு போயிட்டாரோல்லியோ...'' என, பேசியபடியே நடக்க, மற்றவர்களும் எழுந்தனர்.