பத்திரிகை செய்தி: முதல்வர் இ.பி.எஸ்., தலைமையிலான அரசு, மூன்றாண்டுகளை கடந்த, நான்காவது ஆண்டில் நேற்று அடியெடுத்து வைத்துள்ளது. மூன்றாண்டுகளுக்கு முன், பிப்., 16ல் தான், கவர்னர் மாளிகையில், தமிழகத்தின், 14வது முதல்வராக இ.பி.எஸ்., பொறுப்பேற்றார்.'டவுட்' தனபாலு: இப்போதைய அரசியல் சூழ்நிலையில் இது, மிகப் பெரிய சாதனை என்பதால் தான், பத்திரிகைகளில் இது பெரிய அளவில் செய்தியாக வந்துள்ளதோ என்ற, 'டவுட்' ஏற்படுகிறது. பொறுப்பேற்ற நாள் முதல், எதிர்க்கட்சிகளின் வெறுப்பு அரசியலுக்கு ஆளாகி, நித்தியகண்டம்; பூரண ஆயுசாக, இ.பி.எஸ்., அரசு உள்ளது என, அ.தி.மு.க.,வினர்கூறுகின்றனரே! கவிஞர் வைரமுத்து: ஒரு செயல் அளவுக்கு மீறி போனால் ஆபத்தை உண்டாக்கும் என, திருவள்ளுவர் எச்சரிக்கிறார். மயிலிறகு போன்ற மென்மையான பொருளைக் கூட அளவுக்கு அதிகமாக ஏற்றினால், வண்டியின் அச்சு முறிந்து விடும் என எச்சரிக்கிறார். இதை, ஆட்சியாளர்கள் அறிவது நல்லது.
'டவுட்' தனபாலு: நீங்கள் எச்சரிக்க விரும்புவது, இப்போதைய ஆட்சியாளர்களான, அ.தி.மு.க.,வினரையா, குடியுரிமை திருத்த சட்டத்தை பிடித்து தொங்கிக் கொண்டிருக்கும், தி.மு.க.,வையா என்ற, 'டவுட்' ஏற்படுகிறது. அளவுக்கு அதிகமான போராட்டங்களை நடத்தியும், துாண்டிவிட்டும் வருவதால், அக்கட்சியைத் தான் நீங்கள் சொல்கிறீர்களோ என்ற, 'டவுட்' வருகிறது!ம.தி.மு.க., அறிக்கை: எவ்வித கால தாமதமும் செய்யாமல், நகர்ப்புற உள்ளாட்சி தேர்தல் மற்றும் விடுபட்ட, ஒன்பது மாவட்டங்களுக்கு, உள்ளாட்சி தேர்தலை, மாநில தேர்தல் ஆணையம் நடத்த வேண்டும். அதற்கான அறிவிப்பை, உடனடியாக வெளியிட வேண்டும்.'டவுட்' தனபாலு: நடந்து முடிந்த, ஊரக உள்ளாட்சி தேர்தலில், உங்கள் கட்சி பலத்த பின்னடைவை சந்தித்துள்ள நிலையில், நகர்ப்புற உள்ளாட்சி தேர்தலை உடனடியாக நடத்தச் சொல்வதன் மூலம், உங்கள், 'பலத்தை' மீண்டும் ஒரு முறை அறிந்து கொள்ள துடிக்கிறீர்களோ என்ற, 'டவுட்' ஏற்படுகிறது. ஊரகங்களிலேயே வெற்றி பெற முடியாத உங்கள் கட்சி, போட்டி அதிகமுள்ள நகர்ப்புறங்களில் போணியாகுமா என்ற டவுட்டும் வலுத்துள்ளதே!
