த.மா.கா., தலைவர் வாசன்: மருத்துவக் கல்லுாரியில் படிப்பதற்காக, அரசு பள்ளியில் பயின்று, 'நீட்' தேர்வான மாணவர்களுக்கு, 7.5 சதவீதம் உள் இட ஒதுக்கீடு வழங்க, தமிழக அரசு சட்டம் இயற்றியுள்ளது. அதற்கு, கவர்னர் ஒப்புதல் அளிக்காமல் உள்ளார். அவர் ஒப்புதல் அளித்தால், ஏழை, எளிய, நடுத்தர வர்க்க மாணவர்கள், மருத்துவக் கல்வி பயில வாய்ப்பு ஏற்படும்.
'டவுட்' தனபாலு: இந்த விவகாரத்தில் அரசியல் செய்து, தமிழக மாணவர்களின் எதிர்காலத்தை சூனியமாக்கும் பிற அரசியல் கட்சித் தலைவர்கள், கட்சிக்கு, நுாறு மாணவர்களை தத்தெடுத்து, சிறந்த பயிற்சி அளித்து, மருத்துவப் படிப்புக்கு தேர்வு செய்தால் என்ன என்ற, 'டவுட்' நடுநிலையாளர்களுக்கு வருகிறதே!


தமிழக பா.ஜ., தலைவர் முருகன்: தமிழக அரசியலில், மிகப்பெரிய தாக்கத்தை ஏற்படுத்தக் கூடிய யாத்திரையை, வரும், ௬ல் துவக்க உள்ளோம். யாத்திரையின் வெற்றி, சட்டசபைக்கு உள்ளே, பா.ஜ., செல்வதற்கான வெற்றியாக அமையும்.

'டவுட்' தனபாலு: நீங்கள் நடத்தவுள்ள, இந்த யாத்திரை குறித்து, எதிர்க்கட்சித் தலைவர்கள் கண்டனம் தெரிவிக்காமல் இருப்பதால், அந்த யாத்திரையை அவர்கள் கண்டுகொள்ளவில்லையோ என்ற, 'டவுட்' ஏற்படுகிறது. எனினும், கொரோனா நேரத்தில், இதுபோன்ற யாத்திரைகள், ஊர்வலங்கள் அவசியம் தானா என்ற கேள்வியும் எழுகிறது!

பா.ம.க., நிறுவனர் ராமதாஸ்: தமிழகத்தில், 'நீட்' தேர்வு விவகாரத்தில், 'அரசு பள்ளி மாணவர்கள் சாதிக்கின்றனர்; அவர்களுக்கு விடிவு காலம் பிறந்து விட்டதால், எந்தச் சலுகையும் தேவையில்லை' என, திட்டமிட்டு, பிரசாரம் முன்னெடுக்கப்படுகிறது. எனினும், 7.5 சதவீத இட ஒதுக்கீடு என்ற உயிர் தண்ணீர், உடனே ஊற்றப்படாவிட்டால், அரசு பள்ளி மாணவர்களில், ஒருவர் கூட மருத்துவப் படிப்பில் சேர முடியாது.

'டவுட்' தனபாலு: நீட் தேர்வுக்கு, தமிழகம் போல, பிற மாநிலங்களில் எதிர்ப்பு கிடையாது; இட ஒதுக்கீடும் கிடையாது. அந்த மாநிலங்களில், அனைத்து பிரிவு மாணவர்களும் வெற்றிக்கொடி நாட்டுகின்றனர். எனவே, இந்த விவகாரத்தை அரசியல்வாதிகள் கைவிட்டாலே, தமிழக மாணவர்கள் சாதிப்பர் என்பதில், 'டவுட்'டே இருக்க முடியாது!