தமிழக சுற்றுச்சூழல் துறை அமைச்சர், கருப்பணன் பேட்டி:தமிழகத்தில், உள்ளாட்சி தேர்தல் தொடர்பாக, நீதிமன்றத்தில், தி.மு.க., தொடுத்த வழக்கில், தடை உத்தரவு உள்ளது. அந்த வழக்கை, தி.மு.க., திரும்ப பெற்றால், டிசம்பரில், உள்ளாட்சி தேர்தலை நடத்த, தமிழக அரசு தயாராக உள்ளது. லோக்சபா தேர்தலில், பொய்யான வாக்குறுதிகளை அளித்து, தி.மு.க., கூட்டணியினர், 38 இடங்களில் வெற்றி பெற்றுள்ளனர். இவர்களால், மக்களுக்கு எந்த நன்மையும் இல்லை. தமிழகத்தில், தி.மு.க., ஆட்சிக்கு வருவதற்கு, 100 சதவீதம் வாய்ப்பில்லை.
தமிழக பால்வளத்துறை அமைச்சர், ராஜேந்திர பாலாஜி பேச்சு: தமிழகத்தில் ஐந்து ஆண்டுகளாக, பால் கொள்முதல் விலையை உயர்த்தவில்லை. தற்போது உயர்த்தியது, உற்பத்தியாளர்கள் மத்தியில், மகிழ்ச்சியை ஏற்படுத்தி உள்ளது. கால்நடை பராமரிப்பிற்கான செலவுகள் அதிகரிக்கும் போது, பால் விலையை கூட்டும் கட்டாயம் ஏற்பட்டுள்ளது.
பா.ஜ.,வைச் சேர்ந்த, முன்னாள் மத்திய அமைச்சர், பொன்.ராதாகிருஷ்ணன் பேட்டி: கடந்த, 50 ஆண்டுகளில் தமிழகம், எதிர்பார்த்த வளர்ச்சி பெறவில்லை. தி.மு.க., செய்த தவறுகளை சரி செய்ய, நீண்ட காலமாகும். அவற்றை சரி செய்ய, துரித நடவடிக்கைகளை எடுக்க வேண்டும். பா.ஜ., அரசு, துணிச்சலான நடவடிக்கைகளை எடுத்து வருவதால், மக்கள் ஆதரவு பெருகி வருகிறது. தமிழக ஆட்சியில் அடுத்து, பா.ஜ., அங்கம் வகிக்கும்.
தமிழ்நாடு விவசாயிகள் சங்கங்களின் கூட்டமைப்பு செயலர், நல்லசாமி பேட்டி: தமிழக அரசு, பசும் பால் கொள்முதல் விலையை லிட்டருக்கு, 32 ரூபாய், எருமை பாலுக்கு, 41 ரூபாய் என, முறையே நான்கு, ஆறு ரூபாய் உயர்த்தியிருப்பது, கண் துடைப்பானது. பால் உற்பத்தியாளர்கள் ஒன்றும், செல்வந்தர்கள் இல்லை. இன்று வரை, கடனில் வாழும் விவசாயிகளாகவே உள்ளனர். ஆனாலும், நான்கு, ஆறு ரூபாய் விலை உயர்வை, பலரும் கண்டிக்கும் நிலை ஏற்பட்டுள்ளது.
காங்., பொதுச்செயலர் பிரியங்கா, 'டுவிட்டர்' பக்கத்தில் கருத்து பதிவு: பொருளாதார மந்தநிலை குறித்து, மத்திய அரசு மவுனம் காப்பது ஆபத்து. தொழில் நிறுவனங்களின் உற்பத்தி, பாதிக்கப்பட்டு உள்ளது. தொழிலாளர்கள், வேலை இழந்து வருகின்றனர். ஆனால், பா.ஜ., அரசு, அனைத்தையும் பார்த்து, வாய்மூடி நிற்கிறது. இந்த மிகப்பெரிய பொருளாதார மந்த நிலைக்கு, காரணம் யார்?
