இது உங்கள் இடம்: 2018ம் ஆண்டு அறிவிப்பு அமலுக்கு வருமா? | டீ கடை பெஞ்ச் | பக்கவாத்தியம்| டவுட் தனபாலு | அறிவியல் மலர்

இது உங்கள் இடம்: 2018ம் ஆண்டு அறிவிப்பு அமலுக்கு வருமா?

பதிவு செய்த நாள் : மே 29, 2022 | |
Advertisement
இது உங்கள் இடம்: 2018ம் ஆண்டு அறிவிப்பு அமலுக்கு வருமா?

அ.குணசேகரன், வழக்கறிஞர், புவனகிரி, கடலுார் மாவட்டத்திலிருந்து அனுப்பிய, 'இ - மெயில்' கடிதம்:



'பேரறிவாளன் விடுவிக்கப்பட்டது போல, ராஜிவ் கொலை வழக்கில் ஆயுள் தண்டனை பெற்ற, மற்ற ஆறு பேரையும் விடுதலை செய்ய வேண்டும்' என முதல்வர் ஸ்டாலினுக்கு, சிறையில் உள்ள குற்றவாளிகளில் ஒருவரான ரவிச்சந்திரன் கடிதம் எழுதியுள்ளார்.



தமிழக அரசுக்கே உரிய நிர்வாக ஆணைப்படி, சிறப்பு அதிகாரத்தை பயன்படுத்தி விடுதலை செய்ய வேண்டும் என்றும் வலியுறுத்தியுள்ளார். அனேகமாக கருணாநிதி பிறந்த நாளான, ஜூன், ௩ல், ரவிச்சந்திரன் உள்ளிட்ட ஆறு பேரும் விடுவிக்கப்பட்டாலும் ஆச்சர்யம் இல்லை. அதற்கு முன்னதாக, சில நடவடிக்கைகள் எடுக்கப்பட வேண்டியது அவசியம். மகாத்மா காந்தியின், 150வது பிறந்த நாளை முன்னிட்டு, 2018ல், மத்திய அரசு அறிவிப்பு ஒன்றை வெளியிட்டது.



அதில், நாடு முழுதும் உள்ள சிறைகளில், நீண்ட காலமாக சிறைவாசம் அனுபவித்து வரும், சில வகை குற்றவாளிகளுக்கு பொதுக் கருணை காட்டி விடுவிக்கலாம் என தெரிவிக்கப்பட்டிருந்தது. அதேநேரத்தில், குற்றவாளிகளை விடுவிப்பதில், சில விதிகளை கடைப்பிடிக்க வேண்டும் என்று கூறப்பட்டிருந்தது. அதில், முதல் விதி, யார் யாருக்கு கருணை காட்டலாம் என்பது. இரண்டாவது விதி, யார் யாருக்கு கருணை காட்டக்கூடாது என்பதாகும்.



முதல் விதியின்படி, மரண தண்டனை பெற்ற குற்றவாளிகள், மரண தண்டனை ஆயுள் தண்டனையாக குறைக்கப்பட்டவர்கள், வரதட்சணை கொடுமை, பாலியல் பலாத்காரம், ஆள் கடத்தல் குற்றங்கள், பொடா, தடா போன்ற பயங்கரவாத தடுப்பு சட்டங்களால் தண்டிக்கப்பட்டவர்கள், சட்டவிரோத பணபரிமாற்ற தடைச் சட்டம் வாயிலாக தண்டனை பெற்றவர்கள் மற்றும் ஊழல் குற்றவாளிகளுக்கு கருணை காட்டி, தண்டனையை குறைக்கக் கூடாது.



இதனால், முதல் விதியால் கருணை பெற்றவர் கூட, இரண்டாவது விதியால் கருணை பெறும் தகுதியை இழந்து விடுவார். இந்த பொது அறிவிப்பை அனைத்து மாநிலங்களுக்கும் அனுப்பி, நிபுணர் குழு பரிந்துரைப்படி, தண்டனையை கவர்னர்கள் குறைக்கலாம் என்று தெரிவிக்கப்பட்டிருந்தது. கைதிகள் விடுதலை விஷயத்தில், ௨௦௧௮ம் ஆண்டு அறிவிப்பில் கூறப்பட்டுள்ள இந்த விதிமுறைகளை இனி பின்பற்ற, மத்திய - மாநில அரசுகளுக்கு உத்தரவிடும்படி கோரி, காங்கிரஸ் சார்பில் உச்ச நீதிமன்றத்தில் வழக்குத் தொடரலாம்.

இதன் வாயிலாக, ராஜிவ் கொலையாளிகள் விடுதலையை தடுக்க முற்படலாம். தற்போது நம் நாட்டில், கருணை காட்ட யாருக்கு அதிகாரம் உள்ளது என்பதை விட, யாருக்கு எல்லாம் கருணை காட்டக்கூடாது என்பதற்கு தெளிவான சட்டம் இல்லை. இந்த ஒரே காரணத்தால் தான், உச்ச நீதிமன்றம் தனக்கு சிறப்பு அதிகாரம் அளிக்கும் பிரிவு, 142ஐ பயன்படுத்தி பேரறிவாளனை விடுவித்துள்ளது.

எனவே, உடனடியாக மத்திய அரசும், நீதித்துறையும் இணைந்து, எந்தெந்த குற்றவாளிகளுக்கு கருணைக் காட்டக் கூடாது என்பதை உடனடியாக தீர்மானித்து, அதை பார்லிமென்டில் சட்டத் திருத்தமாக கொண்டு வர வேண்டியது காலத்தின் கட்டாயம்.அதற்கு, 2018ல் மகாத்மா காந்தியின், 150வது பிறந்த நாளை ஒட்டி, மத்திய அரசு வெளியிட்ட பொது அறிவிப்பில் கூறப்பட்டுள்ள பரிந்துரைகள், மிகவும் உபயோகமாக இருக்கும் என்பதில் சந்தேகமில்லை.



இதற்கு விடியல் தருவாரா முதல்வர்?



ஜெ.மனோகரன், மதுரையில் இருந்து அனுப்பிய, 'இ - மெயில்' கடிதம்:



தமிழகத்தில், அரசியல் கட்சிகளின் பொதுக் கூட்டங்கள், கோவில் திருவிழாக்கள், பொது நிகழ்ச்சிகள் உள்ளிட்டவற்றை நடத்துவோர், வாகனங்கள் அதிகமாக செல்லும் பிரதான சாலையை அல்லது பொதுமக்கள் அதிகளவில் குடியிருக்கும் தெருக்களை நாள் முழுதும் மறித்து, எந்த வாகனமும் செல்ல முடியாதபடி தங்களின் செயல்களை அரங்கேற்றுகின்றனர்;

அதற்காக மேடைகளும் அமைக்கின்றனர். சமீபத்தில் கூட மதுரை நகரில் பிரதான சாலையை மறித்து, மேடை அமைத்து, ஓராண்டு சாதனை விளக்க பொதுக் கூட்டத்தை, ஆளுங் கட்சியான தி.மு.க.,வினர் நடத்தினர். இதனால், அவ்வழியாக அவசரமாக செல்ல வேண்டிய ஆம்புலன்ஸ்கள் உள்ளிட்ட பல வாகனங்கள் செல்ல முடியாத நிலைமை உருவானது. இந்தக் கொடுமையான பழக்கம், பல ஆண்டு களாக தொடர்கிறது. எனவே, சாலைகள் மற்றும் தெருக்களை மறித்து நிகழ்ச்சிகளை நடத்தாமல் இருக்க, அரசியல் கட்சியினர் உள்ளிட்டோருக்கு, தமிழக அரசு தடை விதிக்க வேண்டும்.



இந்தக் கடிதத்தை படிக்கும் சிலர், 'ஏன் ஒரு நாள் மட்டும், மாற்றுப் பாதையில் வாகனங்கள் செல்ல முடியாதா?' என்ற கேள்வியை எழுப்புவர். 'கோல்டன் ஹவர்ஸ்' என்று சொல்லப்படும், குறிப்பிட்ட நேரத்திற்குள் ஆம்புலன்ஸ்கள் மருத்துவமனைகளுக்கு செல்லாவிட்டால், அபாய கட்டத்தில் இருக்கும் நோயாளிகள் இறந்து விடுவர்.

எனவே தான், இந்தப் பிரச்னைக்கு விரைவில் தீர்வு காண, முதல்வர் நடவடிக்கை எடுக்கும்படி வேண்டுகிறேன். 'ஸ்டாலின் தான் வாராரு; விடியல் தரப் போராரு' என்ற பாடலை மட்டும், ஆங்காங்கே ஒலிபரப்பினால் போதாது. இது போன்ற மக்கள் சந்திக்கும் பிரச்னைகளையும், போர்க்கால அடிப்படையில் தீர்ப்பது அவசியம்.



'ஈகோ' வேண்டாம் அமைச்சரே!



அ.வனிதா, மதுரையிலிருந்து அனுப்பிய, 'இ - மெயில்' கடிதம்:

'அரசுப் பள்ளி மாணவர்களுக்கு, 'நீட்' பயிற்சி அளிக்கப்படாது; மாணவர்கள் தாங்களே படித்துக் கொள்ள வேண்டும்' என்ற, பள்ளிக் கல்வித் துறை அமைச்சர் மகேஷின் அறிவிப்பு, அந்தத் தேர்விற்கு விண்ணப்பித்துள்ள அரசுப் பள்ளி மாணவர்களுக்கு மிகுந்த அதிர்ச்சியை அளித்துள்ளது.



முதுகலை பட்டம் முடித்தவர்களுக்கே, போட்டித் தேர்வுகளில் பங்கேற்க முறையான பயிற்சியும், வழிகாட்டலும் தேவைப்படும் போது, போதுமான அனுபவம் இல்லாத மாணவர்களுக்கு, இது பற்றிய பயிற்சி வழங்கும் பொறுப்பில் இருந்து, அரசு விலகிக் கொள்வது, ஏழை எளிய மாணவர்களுக்கு, மிகப் பெரிய பின்னடைவை ஏற்படுத்தும்.

அதேநேரத்தில், 'போட்டித் தேர்வுகளில் பங்கு கொள்ளும் வகையில், மாணவர்களுக்கு பள்ளியில் பயிற்சி அளிக்கப்படும்' என்று அமைச்சர் கூறியிருப்பது புரியாத புதிராக உள்ளது.சாதாரண கடைநிலை ஊழியர் பதவிக்கே, இன்ஜினியரிங் படித்தவர்களும், முதுநிலை பட்டம் பெற்றவர்களும் போட்டி போடும் போது, பிளஸ் ௨ முடித்த மாணவர்கள், எந்த போட்டித் தேர்வு எழுதி வேலைக்குப் போகப் போகின்றனர்?

தமிழகத்தில் உள்ள அரசுப் பள்ளி மாணவர்கள், பிளஸ் ௨ முடித்தவுடன், அவரவர் விரும்பும் உயர் கல்வி பயில அரசு தேவையான வசதிகளையும், வாய்ப்புகளையும் ஏற்படுத்தி தர வேண்டுமே தவிர, பொறுப்பைத் தட்டிக் கழிக்கக்கூடாது.'ஈகோ'வை விடுத்து, அரசுப் பள்ளி மாணவர்களுக்கு, நீட் தேர்வுக்கான பயிற்சி வழங்க அரசு ஏற்பாடு செய்ய வேண்டும். நீட் தேர்விற்கு இன்னும், ௫௦ நாட்களே உள்ளன. ஆகவே, விரைவாக முடிவெடுத்து அரசுப் பள்ளி மாணவர்களின் மருத்துவ கனவை நனவாக்க, தமிழக அரசு முன்வர வேண்டும்.



காங்கிரசார் நாட்டுப்பற்று என்றால் சும்மாவா!



ஆர்.மணியன், நாகர்கோவிலில் இருந்து அனுப்பிய, 'இ -மெயில்' கடிதம்:


சீனாவைச் சேர்ந்த, ௨௬௩ பேருக்கு முறைகேடாக விசா பெற்றுத்தந்த விவகாரத்தில், முன்னாள் மத்திய அமைச்சர் சிதம்பரத்தின் மகன் கார்த்தி, அவரது ஆடிட்டர் பாஸ்கர ராமன் ஆகியோர் மீது, சி.பி.ஐ., ஏற்கனவே வழக்கு பதிவு செய்துள்ளது; அதன் தொடர்ச்சியாக, தற்போது, அமலாக்கத் துறையும் வழக்கு பதிந்துள்ளது. விரைவில், முறைப்படி சம்மன் அனுப்பி விசாரிக்கவும் திட்டமிட்டுள்ளது.



பத்திரிகையில் இச்செய்தியை வாசிக்கும் போதே, நம்மால் சிரிப்பை அடக்க முடியவில்லை. காங்கிரஸ் கட்சியினர் மீது, இந்திய கோர்ட்டுகளில் வழக்கு தொடுத்து, தண்டனை வாங்கித் தருவது, அவ்வளவு சுலபமான காரியமல்ல. ஒருவேளை அமெரிக்கா, பிரிட்டன், ஜெர்மனி போன்ற வெளிநாட்டு கோர்ட்டுகளில் வழக்கு தொடுத்து வேண்டுமானால், தண்டனை வாங்கித் தரலாம்.

ஆனால், அதற்கும் ஏராளமான சட்ட சிக்கல்கள் இருக்கும். சிதம்பரமும், அவரின் மகன் கார்த்தியும் அரசியல்வாதிகள். மலை முழுங்கி மகாதேவர்களான இவர்களுக்கு, சி.பி.ஐ.,யும், அமலாக்கத் துறையும் சம்மன் வேண்டுமானால் அனுப்பலாம்;

ஆனால், அவர்கள் ஆஜராவரா என்பது சந்தேகமே! அப்படியே ஆஜரானாலும், கைது செய்யப்படாமல் இருக்க, நீதிமன்றத்தில் முன்ஜாமின் பெற்று விடுவர். சட்டத்தில் என்னென்ன ஓட்டைகள் உள்ளனவோ, அவற்றை எல்லாம் பயன்படுத்தி தப்பிக்க, இவர்கள் பகீரத பிரயத்தனம் செய்வர் என்பதில் சந்தேகமில்லை.



இவர்களுக்கு எதிரான, சி.பி.ஐ., மற்றும் அமலாக்கத் துறையின் நடவடிக்கையை பார்க்கும் போது, டி.ஆர்.ராமண்ணா தயாரித்து இயக்கி, ரவிச்சந்திரன், ஜெயலலிதா இணைந்து நடித்த, நான் திரைப்படத்தில், நகைச்சுவை நடிகர் கண்ணையா பேசும், 'என்னத்த ஆதாரம்... என்னத்த வழக்கு பதிவு... என்னத்த சம்மன்... என்னத்த விசாரணை...' என்ற வசனம் தான், நினைவுக்கு வருகிறது.

மியான்மரில் இருந்து சட்ட விரோதமாக, மேற்கு வங்க மாநிலத்திற்குள் ஊடுருவி குடியேறியுள்ள ரோஹிங்கியாக்களுக்கு, குடியுரிமை, குடும்ப அட்டை, ஆதார் அட்டை எல்லாம் கொடுத்து, வாக்காளர் பட்டியலில் அவர்களது பெயரையும் இணைத்து, சாதனை புரிந்தவர் அம்மாநில முதல்வர் மம்தா பானர்ஜி.

அதேபோல, சீன நாட்டினருக்கு முறைகேடாக விசா பெற்றுத் தந்த தந்தையும், தனயனும், அவர்களுக்கு குடியுரிமை, குடும்ப அட்டை, ஆதார் அட்டை எல்லாம் கொடுத்து, வாக்காளர் பட்டியலிலும் பெயர் சேர்க்காமல் இருந்திருந்தால், அதுவரை மகிழ்ச்சி அடையலாம். மத்தியில் காங்கிரஸ் ஆட்சியில் இருந்திருந்தால், இந்நேரம் அதையும் செய்து முடித்திருப்பர். காங்கிரசார் நாட்டுப்பற்று என்றால் சும்மாவா!


நுழைவு தேர்வுகள் அவசியமே!



அ.குணசேகரன், புவனகிரி, கடலுார் மாவட்டத்திலிருந்து அனுப்பிய, 'இ - மெயில்' கடிதம்:


தமிழகம் முழுதும், 500க்கும் மேற்பட்ட பொறியியல் கல்லுாரிகள் உள்ளன. அவற்றின் வாயிலாக, ஒவ்வொரு ஆண்டும் ஒரு லட்சம் பட்டதாரிகள் வரை உருவாகின்றனர்.

அதே நேரத்தில், பொறியியல் கல்லுாரிகளில், அவர்களுக்கு தரமான கல்வி போதிக்கப்படாததால், பல ஆயிரம் பேர் வேலை கிடைக்காமல் அவதிப்படுகின்றனர் அல்லது குறைவான சம்பளத்தில் பணியாற்றுகின்றனர்; இதனால், பல லட்சங்களை செலவிட்டு பொறியியல் பட்டம் பெறும் அவர்கள், பல ஆண்டுகளுக்கு கடன்காரர்களாகவே நீடிக்கின்றனர்.



இந்நிலையில், 'பி.ஏ., - பி.எஸ்சி., படிப்புக்கு கூட நுழைவுத் தேர்வு நடத்த வேண்டும் என்று, மத்திய அரசு அறிவித்து வருகிறது. ஆனால், பிளஸ் 2 மதிப்பெண் அடிப்படையிலேயே, உயர் கல்வியில் சேர்க்கப்பட வேண்டும். 'நுழைவுத் தேர்வு தேவையில்லை என்பது தான், தமிழக அரசின் கொள்கை' என, உயர் கல்வித் துறை அமைச்சர் பொன்முடி தெரிவித்துள்ளார். அமைச்சரின் இந்த அறிவிப்பு வருத்தம் அளிக்கிறது.



இப்படியே போனால், தமிழகத்தில் விரைவில் பள்ளி, கல்லுாரிகளில் எந்த ஒரு பொதுத் தேர்வும் நடத்தப்படாது. அரசு பணி இடங்களுக்கு போட்டித் தேர்வும் கிடையாது. அதுவே, அரசின் கொள்கை முடிவு என, அறிவித்தாலும் ஆச்சரியமில்லை. 'திராவிட மாடல்' ஆட்சியில், பள்ளி, கல்லுாரி கல்வியை, குழி தோண்டி புதைத்து விடாமல் இருக்க வேண்டும்; அதனால், காப்பாற்றும்படி ஆண்டவனை பிரார்த்தனை செய்வோம்.



தேர்வுகள் வாயிலாகவே, ஒவ்வொரு மாணவனின் தகுதியையும் நிர்ணயிக்க முடியும். இப்போதுள்ள சூழலில், தமிழக பள்ளி மாணவர்கள், தமிழும் தெரியாமல், ஆங்கிலமும் புரியாமல், இரண்டிலும் அரைகுறை நிலைமையில் தான் உள்ளனர். அதில், மாற்றங்கள் வேண்டும் எனில், தரமான கல்வி கற்றுத் தரப்பட வேண்டும். நுழைவுத் தேர்வு மற்றும் போட்டித் தேர்வுகளை அவர்கள் தைரியமாக எதிர்கொள்ளும் சூழ்நிலையை உருவாக்க வேண்டும்.



இல்லையெனில், இந்தியாவில் உயர் கல்வியில், ௫௩ சதவீதம் பேர் படித்திருப்பது தமிழகத்தில் தான் என, கணக்கிற்கு வேண்டுமானால் பெருமை பீற்றிக் கொள்ளலாம். அந்தக் கல்வி, கறிக்கு உதவாத ஏட்டுச் சுரைக்காயாகவே இருக்கும்; மாணவர்களின் எதிர்கால நலனிற்கு உதவாது. எனவே, மாணவர்களின் திறமை வளர வேண்டும் எனில், நுழைவுத் தேர்வுகள் நடத்துவது அவசியமாகும்.




கண்ணீரை துடைக்கட்டும் மேட்டூர் தண்ணீர்!



அ.அப்பர்சுந்தரம், மயிலாடு துறையிலிருந்து அனுப்பிய, 'இ - மெயில்' கடிதம்:



75 ஆண்டுகளுக்கு பின், கோடை காலமான மே மாதத்தில், மேட்டூர் அணை நிரம்பி, இம்மாதம், 24-ம் தேதி முதல் டெல்டா பாசனத்திற்காக தண்ணீர் திறந்து விடப்பட்டுள்ள செய்தி, மகிழ்ச்சி அளிப்பதாக உள்ளது.

கர்நாடகாவில் காவிரி நீர்ப்பிடிப்பு பகுதிகளில், இறைவன் மற்றும் இயற்கையின் அருளால், அதிகப்படியான மழை பொழிந்து தமிழகத்தை நோக்கி வந்த தண்ணீரால், வழக்கத்திற்கு முன்னதாகவே, மேட்டூர் அணை திறக்கப்பட்டுள்ளது.

விவசாயத்திற்கு தண்ணீர் திறந்து விட்ட முதல்வர் ஸ்டாலினுக்கு நன்றி. விவசாயத்துக்கு என, தனி பட்ஜெட் தாக்கல் செய்த, இன்றைய தமிழக அரசின் செயல்பாடுகளுக்கு, இயற்கையும் உறுதுணையாக இருப்பது போல, மேட்டூர் அணையிலிருந்து தண்ணீர் திறந்து விடப்பட்ட செயல் அமைந்துள்ளது.

அடுத்த, 10 ஆண்டுகளுக்கு பின், எந்த ஒரு விவசாயியும், விவசாய கடன் கேட்டு வங்கிகளுக்கு அலையும் நிலைமை இருக்காது என, சமீபத்தில் சட்டசபையில், தமிழக விவசாய அமைச்சர் எம்.ஆர்.கே.பன்னீர்செல்வம் அறிவித்தார்; அவரின் சொல் செயல் வடிவமாக மாற வேண்டும். அதற்கு அனைத்து விவசாயிகளும், மே மாதத்திலேயே மேட்டூர் அணையிலிருந்து வருகின்ற காவிரி தண்ணீரை முழுமையாக பயன்படுத்தி, சிறப்பாக விவசாயம் செய்து, தங்கள் வாழ்வையும், வளத்தையும் மேம்படுத்திக் கொள்ள வேண்டும்.


தண்ணீரை வீணாக்காமல் சிக்கனமாக செலவு செய்து, அமோக விளைச்சல் காண வேண்டும். மேட்டூர் தண்ணீர் விவசாயிகளின் கண்ணீரை துடைக்க வேண்டும் என, நாட்டு நலனில் அக்கறையுள்ள அனைவர் சார்பிலும், இறைவனை வேண்டுகிறேன்.




Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X