'அவர்களுக்கு ஒரு நியாயம்; எங்களுக்கு ஒரு நியாயமா...' என, பா.ஜ., தலைவர்களை பார்த்து, கடுப்புடன் கூறுகிறார், மத்திய உணவுத் துறை அமைச்சரும், லோக் ஜன சக்தி கட்சி தலைவருமான, ராம்விலாஸ் பஸ்வான். இவரது கட்சி, பா.ஜ., தலைமையிலான, தே.ஜ., கூட்டணியில், நீண்ட நாட்களாக அங்கம் வகிக்கிறது. 'பா.ஜ.,வில், 70 வயதை கடந்தவர்களுக்கு, கட்சியிலும், ஆட்சியிலும், எந்த முக்கிய பதவியும் வழங்கப்படுவது இல்லை' என்ற, எழுதப்படாத விதிமுறை பின்பற்றப்படுகிறது.அத்வானி, முரளி மனோகர் ஜோஷி போன்ற மூத்த தலைவர்கள் எல்லாம், இந்த காரணத்துக்காக தான், ஓரம் கட்டப்பட்டனர். லோக் ஜன சக்தி கட்சி தலைவர் பஸ்வானுக்கு, 72 வயதாகி விட்டது. இதனால், கூட்டணி தர்மத்தின்படி, இந்த முறை, அமைச்சர் பதவியை, தனக்கு பதிலாக, தன் மகன், சிராக் பஸ்வானுக்கு தரும்படி, பா.ஜ., தலைவர்களிடம் வற்புறுத்தினார், பஸ்வான். பா.ஜ., தலைவர்களுக்கோ, சிராக் பஸ்வானுக்கு, அமைச்சர் பதவியை கொடுப்பதில் இஷ்டம் இல்லை. 'சொதப்பி விட்டால், ஆட்சிக்கு தானே கெட்ட பெயர்' என, உஷாராக உள்ளனர். இதனால், அமைச்சர் பதவி, மீண்டும், ராம்விலாஸ் பஸ்வானுக்கே தரப்பட்டது.இதனால், நொந்து போன அவர், 'நாம், ஆரோக்கியமாக இருக்கும்போதே, நம் வாரிசை, முக்கிய பதவியில் அமர்த்தி, அழகு பார்த்து விடலாம் என்றால், இந்த, பா.ஜ., தலைவர்கள், 'போங்கு' ஆட்டம் ஆடுகின்றனரே' என, விசும்புகிறார். 'அனுபவம் இல்லாதவரை எப்படிங்க அமைச்சராக்குறது...' என்கின்றனர், பா.ஜ.,வினர்! யார் அந்த கறுப்பு ஆடு?சோதனை மேல் சோதனை ஏற்படுவதால், நொந்து நுாலாகியுள்ளார், மேற்கு வங்க முதல்வரும், திரிணமுல் காங்கிரஸ் தலைவருமான,மம்தா பானர்ஜி. 'லோக்சபா தேர்தலில், மேற்கு வங்கத்தில், 42 தொகுதிகளிலும் வெற்றி பெறுவோம். பா.ஜ., மண்ணை கவ்வும்' என, சவடால் விடுத்து வந்தார், அவர். ஆனால், 18 தொகுதிகளில் வெற்றி பெற்று, மம்தாவுக்கு, அதிர்ச்சி வைத்தியம் அளித்தது, பா.ஜ., இந்த அதிர்ச்சியிலிருந்து மீள்வதற்குள், திரிணமுல் காங்கிரசைச் சேர்ந்த, எம்.எல்.ஏ.,க்கள், கவுன்சிலர்கள் பலரை, தங்கள் பக்கம் இழுத்து, மேலும் ஒரு அதிர்ச்சி அளித்தனர், பா.ஜ., தலைவர்கள். அடிக்கு மேல் அடி விழுவதால், என்ன செய்வது என தெரியாமல், திகிலடித்து போயுள்ளார், மம்தா. இது குறித்து, தனக்கு மிகவும் நெருக்கமானவர்களிடம் விசாரித்தபோது, 'உங்கள் கட்சியில் உள்ள முக்கியமான சிலர், கறுப்பு ஆடுகளாக செயல்பட்டு, பா.ஜ., தலைவர்களிடம், 'போட்டு' கொடுக்கின்றனர். கட்சியின் முக்கியமான முடிவுகளை எல்லாம், முன் கூட்டியே தெரிவித்து விடுகின்றனர்; அவர்களை களை எடுங்கள்' என்ற விஷயத்தை கூறியுள்ளனர். இதையடுத்து, தனக்கு மிகவும் வேண்டிய, நம்பத் தகுந்த, போலீஸ் அதிகாரிகளை அழைத்து, 'எங்கள் கட்சியில் கறுப்பு ஆடுகளாக செயல்படும் தலைவர்கள் யார் என்ற தகவலை தாருங்கள்; அப்புறம் வைத்துக் கொள்கிறேன், கச்சேரியை...' என, கடும் கோபத்துடன் உத்தரவிட்டுள்ளார்.