சீறிப் பாயும் கெஜ்ரிவால்! | Special Articles | Special Reports | Special Interest News | News Comment | Science News | TV Shows news | General News

சீறிப் பாயும் கெஜ்ரிவால்!

பதிவு செய்த நாள் : பிப் 23, 2020
Advertisement
  சீறிப் பாயும் கெஜ்ரிவால்!

சீறிப் பாயும் கெஜ்ரிவால்!'யாரை வேண்டுமானாலும் நம்பலாம். ஆனால், எப்போதுமே நம்மைச் சுற்றி, 'ஜால்ரா' போடும் கும்பலை மட்டும் நம்பவே முடியாது' என, எச்சரிக்கையுடன் கூறுகிறார், டில்லி முதல்வரும், ஆம் ஆத்மி தலைவருமான அரவிந்த் கெஜ்ரிவால்.சமீபத்தில் நடந்து முடிந்த சட்டசபை தேர்தலில் கிடைத்த வெற்றி, அவருக்கு மகிழ்ச்சியை அளித்தாலும், 'எப்போதும் உஷாராக இருக்க வேண்டும்' என்ற எண்ணத்தையும், அவரிடம் ஏற்படுத்தியுள்ளது. கெஜ்ரிவால், முதல் முறையாக டில்லி முதல்வராக பதவியேற்றபோது, அவரிடம் பல கனவுகள் இருந்தன.'ஆம் ஆத்மி கட்சியை நாடு முழுவதும் விரிவுபடுத்த வேண்டும்' என, நினைத்தார். இதை, தங்களுக்கு சாதகமாக பயன்படுத்திய சிலர், 'தலைவரே... உங்களுக்கு முதல்வர் பதவியெல்லாம் துாசு... இந்த நாட்டின் எதிர்கால பிரதமரே நீங்கள் தான்' என, 'ஐஸ்' வைத்தனர்.அந்த ஐஸ் மழையில் நனைந்த கெஜ்ரிவால், பிரதமர் மோடியை எதிர்த்து, லோக்சபா தேர்தலில் போட்டியிட்டு, மூக்குடைந்தது தான் மிச்சம். டில்லியை தாண்டி, அவரது கட்சிக்கு, எங்குமே வாய்ப்பில்லாமல் போய் விட்டது.இதற்கு பின் சுதாரித்த கெஜ்ரிவால், அந்த ஜால்ராக்களை துரத்தி அடித்து, டில்லி அரசியலில் மட்டும் கவனம் செலுத்தினார். இதோ... சட்டசபை தேர்தலில் வெற்றி பெற்று, முதல்வர் பதவியை மீண்டும் தக்க வைத்து விட்டார்.ஏற்கனவே ஓடிப்போன ஜால்ராக்கள், தற்போது மீண்டும் அவரை அணுகத் துவங்கியுள்ளன. கெஜ்ரிவாலோ, 'இந்தப் பக்கமே தலைகாட்டாதீர்கள்' என, கடுமையான கோபத்தில் சீறிப் பாய்கிறார்.'நம் எதிர்கால அரசியல் என்னவாகுமோ?''என்ன திட்டத்துடன் இருக்கிறார் என்றே தெரியவில்லை' என, காங்கிரஸ் எம்.பி., ராகுலைப் பற்றி குழப்பத்துடன் கூறுகின்றனர், அந்தக் கட்சியின் நிர்வாகிகள்.லோக்சபா தேர்தலில் ஏற்பட்ட தோல்விக்குப் பின், கட்சித் தலைவர் பதவியை ராஜினாமா செய்த ராகுல், ஒரு சில அறிக்கைகளை வெளியிடுவதுடன் சரி; மற்றபடி, கட்சி சார்ந்த நிகழ்ச்சிகள் எதிலும் பங்கேற்பது இல்லை.நாடு முழுவதும் உள்ள கட்சி நிர்வாகிகள், ராகுலை, தாங்கள் நடத்தும் நிகழ்ச்சிகளுக்கு அழைப்பதா, இல்லையா; அழைத்தால் பங்கேற்பாரா என்ற குழப்பத்தில் ஆழ்ந்துள்ளனர்.தன் சொந்த தொகுதியான, கேரளாவில் உள்ள வயநாட்டுக்கு மட்டும், அவ்வப்போது வந்து செல்கிறார். அதற்கு பின், அவரை தொடர்பு கொள்வதே மிகவும் கடினம். அவருடன் நெருங்கி பழகியவர்களுக்கு மட்டுமே, அவரது மொபைல் போன் எண் உள்ளிட்ட விபரங்கள் தெரியும்.இப்போது, அதற்கும் வாய்ப்பில்லாமல், மொபைல் போன் எண்ணையும் மாற்றி விட்டார். இதனால், அந்த நெருக்கமான பட்டியலில் இருப்பவர்களுக்கும், மொபைல் போன் எண் தெரியவில்லை. கட்சி நிர்வாகிகள், நண்பர்கள் உட்பட, யாருக்குமே ராகுலின் புதிய மொபைல் எண் தெரியவில்லை.கட்சியில் நீண்ட காலமாக இருக்கும் ராகுலின் விசுவாசிகள், 'அவரது எதிர்கால அரசியல் ஒரு பக்கம் இருக்கட்டும்; நம் எதிர்கால அரசியல் என்னாகும் என தெரியவில்லையே...' என, கவலையிலும், குழப்பத்திலும் ஆழ்ந்துள்ளனர்.

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X