''எத்தைத் தின்றால், பித்தம் தெளியும் என்ற நிலையில இருக்கா ஓய்...'' என, பழமொழி கூறியபடியே, பெஞ்சில் அமர்ந்தார், குப்பண்ணா.''யாரு பா...'' எனக் கேட்டார், அன்வர்பாய்.''ஆரம்பத்துல, 'பேஷா' இருந்த, தே.மு.தி.க.,வோட வளர்ச்சி, இப்ப, தேய்பிறையா போயிண்டு இருக்கு... கட்சியை துாக்கி நிறுத்த, பிரேமலதாவும், மகன் விஜய பிரபாகரனும் எடுத்த முயற்சிக்கு, ஓரளவுக்கு தான் பலன் கிடைச்சது ஓய்...''சமீபத்துல, ஆஸ்தான ஜோதிடர்கிட்ட ஆலோசனை கேட்டிருக்கா... அவாளும், 'கட்சிக் கொடியை உச்சத்துல வச்சா, கட்சியும் உயர்ந்த இடத்தை அடையும்'ன்னு ஆலோசனை சொல்லிஇருக்கா ஓய்...''இதனால, சென்னை, கோயம்பேடு கட்சி ஆபீஸ்ல, 118 அடி உயரத்துல கம்பம் நட்டு, கொடி ஏத்தியிருக்கா... இதுக்கு, நிச்சயம் பலன் கிடைக்கும்ன்னு, பிரேமலதா நம்பிண்டு இருக்காங்க ஓய்...''இதுல என்ன வேடிக்கைன்னா, கொடி கம்பத்துக்கான மொத்த செலவையும், காஞ்சிபுரம் மாவட்டச் செயலர் அனகை முருகேசன் தலையில கட்டிட்டா ஓய்...'' எனக் கூறி சிரித்தார், குப்பண்ணா.''மணல் பிரச்னையை, தி.மு.க., கையில எடுக்க போகுதுங்க...'' என, அடுத்த விஷயத்திற்கு வந்தார், அந்தோணிசாமி.''எந்த ஊருல பா...'' எனக் கேட்டார், அன்வர்பாய்.''அரசு ஊழியர்களுக்கு வாடகை குடியிருப்பு கட்டும் திட்டத்தை, வீட்டு வசதி வாரியம் செயல் படுத்துதுங்க... கோவை, கவுண்டம்பாளையத்துல, 1,848 வீடுகள் கட்டுறாங்க... இதுக்காக, மூணு பிரிவுல கான்ட்ராக்டர்களை, வாரியம் நியமிச்சதுங்க...''குறிப்பிட்ட சில பணிகள் தவிர, மற்ற பணிகளுக்கு, ஆற்று மணலை தான் பயன்படுத்தணும்னு விதிமுறை போட்டிருக்காங்க... ஆனா, கான்ட்ராக்டர்கள், எல்லா வேலைக்கும், 'எம் - சாண்ட்' பயன்படுத்தியிருக்காங்க...''இது, வாரிய தொழில்நுட்ப பிரிவு ஆய்வுல அம்பலமாகிடுச்சுங்க... இதுல, அரசுக்கு, 50 கோடி ரூபாய் வரை இழப்பு ஏற்பட்டுருக்குன்னும் சொல்றாங்க... இந்த விவகாரத்தை, தி.மு.க., கையில எடுக்க முடிவு பண்ணியிருக்குங்க...'' என்றார், அந்தோணிசாமி.''தன் இடத்துல, மகனை களமிறக்கிட்டாரு வே...'' என, கடைசி தகவலை ஆரம்பித்த அண்ணாச்சியே தொடர்ந்தார்...''தி.மு.க., தலைவர் ஸ்டாலின் மகன் உதயநிதியின் நண்பர், மகேஷ் பொய்யாமொழி... திருச்சியில, இவருக்கு முக்கியத்துவம் கொடுக்கணும்னு, 'மாஜி' அமைச்சர் நேருவுக்கு, முதன்மை செயலர்னு மாநில பதவியை கொடுத்து, சென்னைக்கு அனுப்பிட்டாவல்லா...''கிட்டத்தட்ட, 20 வருஷங்களுக்கும் மேலா, திருச்சியில ராஜ்யம் நடத்திட்டு இருந்த நேரு, மாவட்டத்துல தன் மகன் அருணை களமிறக்கிட்டாரு... சமீபத்துல, திருவெறும்பூர்ல நடந்த கட்சிக்காரர் இல்ல நிகழ்ச்சியில, நேருவுக்கு பதிலா, அருண் கலந்துக்கிட்டாருவே...''அருணுக்கு, நேருவின் ஆதரவாளர்கள் அமர்க்களமா வரவேற்பு குடுத்து, மாலை, மரியாதைன்னு அசத்தியிருக்காவ... இது மட்டுமில்லாம, உள்ளாட்சித் தேர்தல்ல ஜெயிச்ச, தி.மு.க., கவுன்சிலர்கள் சிலர், அருண் கால்ல விழுந்து, ஆசீர்வாதமும் வாங்கிஇருக்காவ வே...'' என்றார் அண்ணாச்சி.நண்பர்கள் கிளம்ப, கல்லாவை நோக்கி நாயர் நகர்ந்தார்.
கூட்டணி கட்சிகளுக்கு எதிராக அ.தி.மு.க.,வில் குமுறல்!
''எந்த தேர்வுல நடந்த குளறுபடியை சொல்லுதீரு...'' எனக் கேட்டார், அண்ணாச்சி.''மதுரை காமராஜ் பல்கலைக்கு உட்பட்ட நாலு மாவட்டங்கள்ல, 90 கல்லுாரிகள் இருக்கு... இந்த கல்லுரிகள்ல, 2019 நவம்பர்ல நடந்த, செமஸ்டர் தேர்வு விடைதாள்களை, மதிப்பீடு செய்ய, பல்கலைக்கு எடுத்துண்டு போனா ஓய்...''அதை திருத்தி, சம்பந்தப்பட்ட கல்லுாரிகளுக்கு, பல்கலைக்கு சொந்தமான பஸ்கள்ல அனுப்பி வைச்சிருக்கா... அதுல, திண்டுக்கல்ல இருக்கற ஒரு கல்லுாரியோட, 153 விடைத்தாள் இருந்த ஒரு கட்டு மட்டும் மாயமாயிடுத்து...''உடனே சுதாரிச்சுண்ட, விடைத்தாள் பொறுப்பு வகிக்கும் அலுவலர்கள், நவம்பர்ல, எந்த பஸ்ல, விடைத்தாள் 'மிஸ்' ஆனதுன்னு சொன்னாளோ, அந்த பஸ்ல இருந்ததுன்னு சொல்லி, சமீபத்துல, விடைத்தாள்களை எடுத்து கொடுத்துருக்கா ஓய்...''அதெப்படி மூணு மாசமா, அந்த பஸ்லயே கிடந்ததுன்னு, கேள்வி கேட்ட துணைவேந்தர் கிருஷ்ணன், ஆறு பேரை, 'டிரான்ஸ்பர்' பண்ணி, சர்ச்சையை முடிச்சுண்டார்... 'ஆனாலும், இந்த விவகாரத்துல, ஏதோ மோசடி நடந்துருக்கு'ன்னு, பல்கலையில பேசிக்கறா ஓய்...'' என்றார், குப்பண்ணா.''பேராசை, பெரு நஷ்டத்தை கொடுத்துருக்கு பா...'' என, அடுத்த தகவலுக்கு மாறினார், அன்வர்பாய்.''யாருக்குங்க...'' எனக் கேட்டார், அந்தோணிசாமி.''சமீபத்துல, ரஜினி நடிச்ச தர்பார் படத்தால, சில ஏரியாவுல நஷ்டம் ஆகிடுச்சுன்னு, சில வினியோகஸ்தர்கள் பேட்டி கொடுத்து, ரஜினிகிட்ட, பணமும் கேட்டாங்க பா...''அவங்களை எல்லாம் துாண்டி விட்டது, மதுரை, 'அன்பான' பைனான்சியர் தான்னு ரஜினிக்கு தகவல் கிடைச்சிருக்கு... கடுப்பான நடிகர், டில்லியில இருக்கற அதிகார மையத்துகிட்ட விஷயத்தைச் சொல்ல, அதன் தொடர்ச்சியா தான், பைனான்சியர் வீட்டுல நடந்த, வருமான வரித்துறை, 'ரெய்டு'ன்னு சொல்றாங்க பா...'' என விளக்கினார், அன்வர்பாய்.''பேரம் பேசுறவங்களை சேர்க்காதீயன்னு சொல்லிட்டாவ வே...'' என, கடைசி தகவலுக்கு சென்றார், அண்ணாச்சி.''யாரை, எங்க சேர்க்க கூடாதாம் ஓய்...'' எனக் கேட்டார், குப்பண்ணா.''லோக்சபா தேர்தல்ல, அ.தி.மு.க., கூட்டணியில, பா.ம.க., - தே.மு.தி.க., - பா.ஜ., - த.மா.கா., உள்ளிட்ட கட்சிகள் இருந்துச்சு... உள்ளாட்சி தேர்தல்லயும், அதே கூட்டணி இருந்துச்சு வே...''அடுத்த வருஷம், சட்டசபை தேர்தல் நடக்க போகுதுல்லா... அதுல, கூட்டணியில நெறைய இடம் கேட்கணும்கிற நினைப்புல தான், 'குட்ட குட்ட குனிய மாட்டோம்'னு, விஜயகாந்த் மனைவி பிரேமலதா பேசியிருக்காங்க வே...''மறுபக்கம், 'அதிக இடத்துல ஜெயிச்சா, ஆட்சியில பங்கு கேட்கலாம்'ன்னு, பா.ம.க., தலைவர்களும் பேசிட்டு இருக்காவ... அ.தி.மு.க., தலைமை அலுவலகத்துல, சமீபத்துல நடந்த ஆலோசனை கூட்டத்துல, கூட்டணி கட்சிகள் பத்தியும் பேசியிருக்காவ... மூத்த நிர்வாகி ஒருத்தர், 'பேரம் பேசுற கட்சிகளை, கூட்டணியில சேர்க்க வேண்டாம்'னு கோபமா பேசியிருக்காரு வே...''ஆனா, 'அவங்க அப்படி தான் பேசுவாங்க... அதெல்லாம் தேர்தல் சமயத்துல பார்த்துக்கலாம்'னு, மூத்த அமைச்சர் ஒருத்தர், அமைதிப்படுத்தியிருக்காரு வே...'' என, முடித்தார் அண்ணாச்சி.பெரியவர்கள் கிளம்ப, பெஞ்ச் மவுனமானது.