Dinamalar

இரண்டு விண்டோவில் ஒரு ஒர்க்புக்:

சில வேளைகளில், எக்ஸெல் ஒர்க்புக் ஒன்றின் இரண்டு பகுதிகளில், ஒரே நேரத்தில் பணியாற்ற வேண்டியதிருக்கும். ஒவ்வொரு முறையும் அங்கும் இங்குமாகச் சென்று பணியாற்றுவது சற்று சிரமமான காரியம். கவனம் சிதறும் வாய்ப்புகள் உள்ள செயலும் கூட. ஆனால், விண்டோஸ் இதற்கு ஒரு நல்ல வழி தருகிறது. இரண்டு விண்டோக்களில் ஒரே ஒர்க்புக்கினைத் திறந்து நாம் விரும்பும் இடங்களில் செயல்பட வாய்ப்பு உள்ளது. இது எக்ஸெல் 97 முதல் இன்றைய எக்ஸெல் 2007 வரை கொண்டிருக்கும் ஒரு வசதி ஆகும்.
முதலில் ஒரு விண்டோவில் குறிப்பிட்ட ஒர்க்புக்கினைத் திறந்து செயல்படவும். இதற்கு Window மெனுவில் New Window என்பதில் கிளிக் செய்திடவும். எக்ஸெல் 2007 என்றால், ரிப்பனில் வியூ டேப் திறந்து அதில் விண்டோ குரூப் என்பதில் நியூ விண்டோ தேர்ந்தெடுக்கவும்.
எக்ஸெல் இந்த கட்டளைகளுக்கு, புதிய விண்டோ ஒன்றினைத் திறக்கும். நீங்கள் இரண்டு விண்டோக்களிலும், ஒரே ஒர்க்புக்கின் இரு வேறு இடங்களில் உங்கள் எடிட்டிங் வேலையை மேற்கொள்ளலாம்.
இங்கு ஒன்றை நீங்கள் கவனிக்கலாம். ஒவ்வொரு விண்டோவின் டைட்டில் பாரிலும், ஒர்க்புக்கின் பெயருடன், விண்டோவின் எண்ணும் காட்டப்படும். Book1:1 மற்றும் Book1:2 என அவை இருக்கும். இதே முறையில் தான் விண்டோவின் மெனு மற்றும் டாஸ்க் பாரில் காட்டப்படும்.
ஒவ்வொரு விண்டோவும், அதே ஒர்க்புக்கின் இரு வேறு தோற்றங்களைக் காட்டுகின்றன. ஒன்றில் ஏற்படுத்தப்படும் மாற்றம் அடுத்த விண்டோவிலும் ஏற்படுத்தப் படும். எனவே மேற்கொள்ள வேண்டிய மாற்றங்களை இரண்டிலும் ஏற்படுத்திப் பின்னர், சேவ் செய்து ஒரே ஒர்க்புக்காகப் பார்க்கலாம்.

எக்ஸெல் சிறப்பு செயல்பாடுகள்:

எக்ஸெல் தொகுப்பில் பயன்படுத்தப்படும் சில பங்சன்களுக்கான கட்டளைச் சொற்களும் அவை தரும் தீர்வுகளும் இங்கு தரப்படுகின்றன.
1. அன்றைய நாளினை ஒரு செல்லில் பெற today()
2. அன்றைய தேதி மற்றும் நேரத்தைப் பெற Date and Time
3. கொடுக்கப்படும் மதிப்புகளின் கூட்டுத் தொகையினைப் பெற sum()
4. கொடுக்கப்பட்ட மதிப்புகளின் சராசரி மதிப்பினைப் பெற average()
5. கொடுக்கப்பட்ட மதிப்புகளில் மிகக் குறைந்த மதிப்பினைப் பெற min()
6. கொடுக்கப்பட்ட மதிப்புகளில் மிக அதிகமான மதிப்பினைப் பெற max()
7. கொடுக்கப்பட்ட மதிப்புகள் எத்தனை என்று கணக்கிட count()
8. காலியாக இல்லாத செல்களின் எண்ணிக்கையைப் பெற counta()
9. குறிப்பிட்ட ஒரு நிலையை நிறைவு செய்திடும் செல்கள் எத்தனை என்று அறிய countif()
10. குறிப்பிட்ட கண்டிஷன் போட்டு அதனை நிறைவு செய்திடும் மதிப்பினை அறிய if(this,then,else)and() / or()
11. ரேண்டம் எண் பெற rand()
12. மதிப்பு ஒன்றை அடுத்த முழு இலக்கத்திற்கு அமைக்க round()
13. ஒரு எண்ணின் ஸ்குயர் ரூட் எண்ணைப் பெற sqrt()

எக்ஸெல் தொகுப்பில் தகவல்களை பேஸ்ட் செய்திட கண்ட்ரோல்+வி அல்லது பேஸ்ட் பட்டனைத்தான் பயன்படுத்த வேண்டும் என்பதில்லை. ஒரு செல்லில் உள்ள தகவல்களை கண்ட்ரோல்+சி கொடுத்து காப்பி செய்திடுங்கள். பின் எந்த செல்லில் அவற்றை பேஸ்ட் செய்திட வேண்டுமோ அந்த செல்லில் கர்சரைக் கொண்டு செல்லுங்கள். பின் ஜஸ்ட் என்டர் தட்டுங்கள். ஆஹா! பேஸ்ட் ஆகிவிட்டதா உங்கள் தகவல்கள்.