மகாராஷ்ட்ராவில் சிவசேனா, தேசியவாத காங்கிரஸ், காங்கிரஸ் ஆகிய கட்சிகளை கொண்ட கூட்டணி அரசு ஓராண்டை பூர்த்தி செய்திருக்கிறது. இதையொட்டி, யூடியூப் சேனலுக்கு தேசியவாத காங்கிரஸ் தலைவர் சரத் பவார் சிறப்பு பேட்டியளித்தார். நாட்டுக்கு தலைமை தாங்கும் அளவுக்கு ராகுல் தயாராகி விட்டாரா? அவரிடம் பொறுப்பை அளிக்க நாட்டு மக்கள் தயாராக உள்ளார்களா? என்ற கேள்வி முன்வைக்கப்பட்டது. அதற்கு பதிலளித்த சரத் பவார், ராகுலிடம் நிலையான தலைமைப் பண்பு இல்லை என்றார். ஒரு விஷயத்தை கையில் எடுத்தால் உறுதியான நிலைப்பாட்டுடன் கடைசிவரை செயல்படுவதில்லை; அவரது செயல்பாட்டில் சில பிரச்னைகள் உள்ளன. ஆனாலும் நேரு குடும்பம் மீது காங்கிரஸ் தொண்டர்கள் உயர்வான மதிப்பை வைத்துள்ளனர். ராகுல்தான் கட்சியை வழிநடத்த வேண்டுமென விரும்புகின்றனர். கட்சியில் உள்ள அனைவரும் அவர் தலைமையை ஏற்கிறார்களா? என்பது மிகவும் முக்கியம். அது அவர்கள் கட்சி விவகாரம். இதற்கு மேல் அதுபற்றி பேச நான் விரும்பவில்லை என சரத்பவார் கூறினார்.