திருவள்ளூர் மாவட்டம் கும்மிடிப்பூண்டி சட்டமன்ற தொகுதிக்குட்பட்ட ஊத்துக்கோட்டை பேரூராட்சி பகுதியில் 15 ஆயிரத்திற்கும் மேற்பட்டோர் உள்ளனர். பேரூராட்சி தலைவராக திமுகவைச் சேர்ந்த அப்துல் ரஷீத் உள்ளார். 15 வார்டு உறுப்பினர்களை கொண்ட இந்த பேரூராட்சியில் 118 தெருக்கள் உள்ளன. ஒப்பந்த அடிப்படையில் 8 ஆயிரம் ரூபாய் சம்பளத்தில் 26 தூய்மைப் பணியாளர்கள் பணியாற்றுகின்றனர். துப்புரவுப் பணியாளர்கள் 10 பேர் உள்ளனர். ஒப்பந்த ஊழியர்களான இவர்களுக்கு கடந்த 3 மாதங்களாக சம்பளம் வழங்கவில்லை என கூறப்படுகிறது. இதனால் பணிக்கு செல்லாமல் பேரூராட்சி அலுவலக வாசலில் தர்ணா போராட்டத்தில் ஈடுபட்டனர். 3 மாத சம்பளத்தை வழங்கினால் மட்டுமே பணி செய்யப்போவதாக தூய்மைப் பணியாளர்கள் தெரிவித்தனர்.