பழைய வீட்டை வாங்குவோர் சந்திக்கும் சிக்கல்கள் என்ன?

சிலர் கனவு இல்லத்தை தாண்டி, பட்ஜெட்டுக்குள் வீடு வாங்க பழைய வீடுகளை தேர்வு செய்கின்றனர். அதில் இருக்கும் புதிய சிக்கல்கள் என்பதை அறிந்து கொள்வது நல்லது.

நீங்கள் பழைய வீட்டை வாங்குவதாக முடிவு செய்தால், அதிகபட்சம்,10 ஆண்டுகள் வரையிலான பழைய வீடுகளை தேர்ந்தெடுக்கலாம்.

அதற்கு மேல், அதிக ஆண்டுகள் கழித்த பழைய வீடு என்றால், அதை வாங்கிய நீங்கள் வீட்டுக்கடனை முடிப்பதற்குள், கட்டடம் மோசமான நிலைக்கு சென்றுவிடும்.

கட்டி முடிக்கப்பட்டதில் இருந்து, 10 ஆண்டுகள் வரையிலான வீடுகள் என்றாலும் அதை முறையான பரிசோதனை இன்றி வாங்குவது நல்லதல்ல.

கட்டட அமைப்பியல் பொறியாளர் வாயிலாக, அந்த கட்டடத்தின் உறுதித்தன்மை, குறிப்பாக துாண்களின், கான்கிரீட் தளங்களின் உறுதியை ஆய்வு செய்து, வீடு வாங்குவது நல்லது.

பழைய வீடுகளுக்கு, அதன் மொத்த மதிப்பில், 80 சதவீத தொகையை வங்கிகள் கடனாக கொடுப்பதுடன், பத்திரப்பதிவுக்கான செலவு தொகையையும் சேர்த்து கடன் கிடைக்கும்.

பழைய வீடு வாங்கும் போது, உரிமையாளர் சொல்லும் தொகையுடன், அந்த வீட்டில் சீரமைப்பு பணிக்கான செலவு, பத்திரப்பதிவுக்கான செலவு ஆகியவற்றையும் கருத்தில் வைத்து, விலை பேசுவது நல்லது.

ஏனெனில், பழைய வீட்டை வாங்கும் போது அதில் உடைப்புகள் உள்ளிட்ட விஷயங்களை சரி செய்வது, மிக முக்கிய பணியாக உள்ளது என்கின்றனர் கட்டுமான துறை வல்லுனர்கள்.