இதய ஆரோக்கியம் காக்கும் ப்ளேவனால்

விதைகள், கோக்கோ, க்ரீன் டீ, சில வகை பழங்கள், காய்கறிகள் போன்றவற்றிலுள்ள முக்கியமான ஒரு சத்து ப்ளேவனால் (Flavonols).

இதனால், நம் உடலுக்கு ஏற்படும் நன்மைகள் குறித்து நிறைய ஆய்வுகள் ஏற்கனவே வெளிவந்துள்ளன.

இந்நிலையில், இங்கிலாந்தைச் சேர்ந்த பர்மிங்காம் பல்கலை சமீபத்தில் மேற்கொண்ட ஓர் ஆய்வில் ப்ளேவனால் இதய ஆரோக்கியம் காப்பது தெரியவந்துள்ளது.

ஆய்வில், கொழுப்பு உணவு உட்கொண்ட பின், ஒரு குழுவுக்கு ப்ளேவனால் அதிகமுள்ள பானமும், மற்றொரு குழுவுக்கு ப்ளேவனால் குறைவான பானமும் தந்து பரிசோதிக்கப்பட்டது.

சில கணிதப் புதிர்களைத் தீர்க்குமாறு கூறி அன்றாட வாழ்வில் எதிர்கொள்ளும் மன அழுத்தத்தின்போது அதிகரிக்கும் இதயத் துடிப்பு, ரத்த அழுத்தம் இரண்டையும் கண்காணிக்கப்பட்டது.

இதில், ப்ளேவனால் அதிகமுள்ள பானத்தை உட்கொண்டவர்களுக்கு இதயச் செயல்பாடு அவ்வளவாகப் பாதிக்கப்படவில்லை என்பது தெரியவந்தது.

பொதுவாக அதிகக் கொழுப்புள்ள உணவுகள், மன அழுத்தம் ஏற்படும் நேரத்தில் இதயச் செயல்பாட்டைப் பாதிக்கும்.

ஆனால், இந்த ஆய்வின் மூலம் இப்படியான உணவுகள் சாப்பிடும்போது ப்ளேவனாலை அதிகமாக உட்கொண்டால் பாதிப்பு குறைவாக இருக்கும் என கண்டுபிடிக்கப்பட்டுள்ளது.

தினமும் 400 - 600 மில்லி கிராம் ப்ளேவனாலை எடுத்துக் கொண்டால் இதய ஆரோக்கியம் மேம்படும் என்று விஞ்ஞானிகள் கூறுகிறார்கள்.