நல்ல பாக்டீரியாக்களை வளர்க்கும் உணவுகள் இவை

புரோபயாடிக் எனும் நல்ல பாக்டீரியாக்கள் குடல் ஆரோக்கியத்தை மேம்படுத்த உதவுவது தெரிந்ததே. தயிர், இட்லி மாவு, பாலாடைக்கட்டி, மோர் போன்றவற்றில் இயற்கையாகவே உள்ளன.

நார்ச்சத்து நிறைந்த உணவுகளை அதிகம் சாப்பிடும் போது தான், செரிமான மண்டலத்திலுள்ள கோடிக்கணக்கான புரோபயாடிக் பாக்டீரியாக்கள் வளர்வதற்கான சூழல் உருவாகும்.

பல நுாற்றாண்டுகளாக பழைய சோறு என்கிற நீராகாரம், உணவின் ஒரு அங்கமாக உள்ளது. இதில் நிறைய நல்ல நுண்ணுயிர்கள் உள்ளன.

ஆரோக்கியமான செரிமானத்திற்கு உதவுவதுடன், இரைப்பை குடல் நோய் தொற்றுகளை குணப்படுத்துகிறது. 12 மணி நேரம் புளிக்க வைக்கப்பட்ட சோறில், சமைத்த சோறை விட 21 மடங்கு அதிக இரும்புச்சத்து உள்ளது.

வாழைப்பழம்... நார்ச்சத்து, வைட்டமின்கள், தாதுக்கள் நிறைந்துள்ளன. அழற்சியை குறைத்து, வயிற்றில் நல்ல பாக்டீரியாக்களை உருவாக்க உதவுகிறது.

சர்க்கரை கலந்த தயிர், தேன் இவற்றுடன் வாழைப்பழம் சேர்த்து சாப்பிடுவது நல்ல பலன் தரும்.

ஆப்பிள்... ஆன்டி-ஆக்ஸிடன்ட், வைட்டமின் சி நிறைந்துள்ளது. இதிலுள்ள 'பெக்டின்' கொழுப்பை கட்டுக்குள் வைக்கும். செரிமானம், செல்களின் வளர்சிதை மாற்றத்தை நிர்வகிக்க உதவும்.

பார்லி/ஓட்ஸ்... இரண்டிலும் 'குளுக்கன்' உட்பட கரையக்கூடிய நார்ச்சத்துக்கள் அதிகமுள்ளன. இவை, பெருங்குடல் ஆரோக்கியத்தை மேம்படுத்துகிறது.

ஓட்சை பாலில் ஊற வைத்து சமைக்காமலும், சமைத்தும் சாப்பிடலாம்.