சுவைக்க முடியாத சாக்லேட் மலைகள்!

பிலிப்பைன்ஸில் உள்ள போஹோல் தீவில் சாக்லேட் மலைகள் அமைந்துள்ளது. பெயருக்கு ஏற்றது போல இந்த சாக்லேட் மலைகள் பார்க்க இனிமையானதாக உள்ளது. அதற்காக நீங்கள் மலையை பெயர்த்து எடுத்து சாப்பிடவெல்லாம் முடியாது.

பிலிப்பைன்ஸில் தீவின் நடுவில் உள்ள இந்த அழகான மலைகளை மனிதர்கள்தான் உருவாக்கியிருப்பார்கள் என்று நினைத்தார்களாம். ஆனால், இது பவளப் படிவுகள் மற்றும் மழை நீர் அரிப்பின் காரணமாக ஏற்பட்டுள்ளதாக கண்டுபிடிக்கப்பட்டுள்ளது.

ஒரே அளவில் மொத்தம் 1200 முதல் 1800 மலைகள் வரைக்கும், சுமார் 50 சதுர கி.மீ., பரப்பளவில் பரவி காணப்படுகிறது.

இந்த மலைகள் அனைத்தும் பச்சை புல்லால் அழகாக மூடப்பட்டிருக்கிறது. ஆனால் கோடை காலங்களில் இந்த பச்சை நிறம் மாறி மலை முழுவதும் பழுப்பு நிறமாக மாறும். இது பார்ப்பதற்கு சாக்லேட் போல் இருப்பதால் சாக்லேட் மலைகள் என பெயர் வைத்துள்ளனர்.

பிலிப்பைன்ஸின் முக்கிய சுற்றுலா தலங்கள் பட்டியலில் உள்ள இந்த சாக்லேட் மலைகள் நாட்டின் மூன்றாவது தேசிய புவியியல் நினைவுச்சின்னமாக அறிவிக்கப்பட்டு, யுனெஸ்கோ உலக பாரம்பரிய பட்டியலில் சேர்க்க முன்மொழியப்பட்டுள்ளன.

இந்த சாக்லேட் மலைகளில் இம்பெராட்டா சிலிண்டிரிகா மற்றும் சாச்சரம் ஸ்பான்டேனியம் போன்ற புல் வகை தாவரங்கள் அதிகம் உள்ளன.

இந்த சாக்லேட் மலைகள் ஒரு காலத்தில் பெரிய புவியியல் மாற்றத்தால் கடலில் இருந்து வெடித்த பவளப்பாறைகள். பின்னர் பவளப்பாறைகள் பல நூறாண்டுகளாக காற்றாலும், நீராலும் அரிக்கப்பட்டு கடைசியில் இந்த அழகான வடிவத்தை பெற்றுள்ளதாகக் கூறப்படுகி்றது.