குழந்தையின்மையை ஏற்படுத்துமா அயோடின் குறைபாடு?

நாம் தினசரி உணவில் சேர்த்துக்கொள்ளும் உப்பு, இறைச்சி, சில பழங்களில் அயோடின் தாதுக்கள் உள்ளன. நமது உடல் உறுப்புகள் சீராக இயங்குவதற்கு இந்த அயோடின் பெரிதும் உதவுகிறது.

அயோடின் குறைபாடு ஏற்படுவதன் மூலம் 'ஹைப்போதைராய்டிசம்' மற்றும் மலட்டுத்தன்மை போன்ற பல பிரச்னைகள் ஏற்படுவதற்கான வாய்ப்புகள் அதிகமாக காணப்படுகின்றன.

குழந்தைப்பேறுக்கு தயாராகும் தம்பதியினர் அந்த சமயத்தில் எடுத்துக்கொள்ளும் உணவின் மூலமாக, நாளொன்றுக்கு 150 மைக்ரோ கிராம் அயோடின் உடலில் சேருமாறு பார்த்துக்கொள்ள வேண்டும்.

முக்கியமாக பெண்கள், கர்ப்ப காலத்திலும், ஆரம்பகால குழந்தைப் பருவத்திலும் அயோடின் தேவையை சரியான முறையில் பூர்த்தி செய்ய வேண்டும்.

உலக சுகாதார அமைப்பின் தகவல் படி கர்ப்ப காலத்திலும், குழந்தைக்கு தாய்ப்பால் கொடுக்கும் போதும் பெண்களுக்கு அயோடின் சற்று அதிகமாக தேவை. (அதாவது 220 - 290 மைக்ரோ கிராம் அளவு)

சமீபத்தில் நடந்த ஆய்வுகளில், கரு முட்டைகளும் அயோடினை உட்கிரகிக்கும் என்பதால், தேவையான அளவு கிடைக்காவிட்டால், மலட்டுத்தன்மை ஏற்படக்கூடும் என தெரிய வந்துள்ளது.

தைராய்டு ஹார்மோன் சேர்க்கை நடைபெறுவதற்கு அயோடின் அடிப்படையான ஒன்று. இது சீரான உடல் எடை மற்றும் வளர்ச்சிதை மாற்றம், கருமுட்டைகளின் ஆரோக்கியம் ஆகியவைக்கு உதவுகிறது.

மேலும், அயோடின் குறைப்பாட்டால் ஆண்களுக்கு உயிரணுக்களின் எண்ணிக்கையும் சரிய வாய்ப்புள்ளது.

அயோடின் உள்ள உப்பை பயன்படுத்துவது, பால், பாலாடைக்கட்டி, யோகர்ட், முட்டை, சிக்கன், மீன் போன்றவற்றை அடிக்கடி சேர்ப்பதன் மூலம் அயோடின் பற்றாக்குறையை தவிர்க்கலாம்.